NGGOMO WENE 23 - Nanduk Ngget Tul Pidnak Wene

- 6 -

¹ Kat-nen nde ap nggok imin nunggwi mende nasolar-e, ”Ap yu-ge ap nggok-nen yusu-o” luk yebet kudtag-o.

² Kat-nen kwarat norak kebem wokma-t nde, kindi-net pep purag-o.

³ Nunggwi mende undu konak saga kurugom puwa ereba na-ge mondok kwarat ninggi nenggerak iri-ge yurak pug-o. Erep-nen-e kat kare posolat-nen kwaruwa nde ma-o.

- 7 -

⁴ Yi mende ndi mende ombo yurak pem-e pabik paboksa yurak pug-o. Kindi-net pep purag-o.

⁵ Kat kisilobulo-ge isiyamu worak luk pubu towe wunun teram nggwe mbiridnak nggal kat karengge-ge enlengen sambok yidnak nggal nak lak ma-o.

- 8 -

⁶ Kar-e indi meya nap imin nunggwi mende nasolat, at-nen naso mende undu konak ereba na ukwe ukwe yurak pug-o.

⁷ At-nen yak korosolar-e: ”Nab-o. Erep min nambena puruk min-o” yak kuruwa iri-ge ndemeret yak kuruwa-ge lag-o. Alat nde, we indi-ge nin perasolat-nen emnde bem nak-nen yuwa-o.

⁸ Nde, kat-nen lungguk mberak pugun ereba na-ge tugurug-et kela keya bugun-o. Kat-nen wene konak at imin yugun ereba na-ge ebe lak mende nde kwat ma-o.

- 9 -

⁹ Kar-e ap wid indi worak iri-ge nggomo wururak pug-o. Kat-nen nggomo yak tugun iri na-ge kuluwa-ge lag-o.

- 10 -

¹⁰ Nanduk komborak-nen nggweyak abu kuri mbarak pidnak iri na-ge siyag-et tet kwidsa lorak pug-o. Li mul onmborak mbal indidnak nggweyak ereba na-ge mariget ter-o luk nemena wanurak pug-o.

¹¹ It enambigit yoso Nagawan Indo amawi worak me, ar-e enambigit yosolar-e, kat kebem kore ma-o.

- 11 -

¹² Kat mul kurugwi nap-nen yak kuruwa iri na kwara yebet karuk, mondok kwara wanurag-o.

- 12 -

¹³ Kat kilirak nggomo ondosolar-e, kindi angin min min yurak pug-o. Kat-nen mul nggambu bem undugun pem wat ma-ge lag o.

¹⁴ Alat nde, inmiri nde yugun-o.

- 13 -

¹⁵ Nambara wa-e. Kat nde kindi nggat nggat worag-et kwat yosola-ge, an-e mondok nalen kwarar-o.

¹⁶ Kat-nen nde mondok yurak wene-t yosola, kolosolar-e, an-e nalen-nen kek yimin-o.

- 14 -

¹⁷ Meya yugwi nap-nen kwarugwi ereba na ”An nggal kwatleb-a!” luk yurak pug-o. Pempa Nagawan Indo-nen yidnak yidnak nak kwarosolat woragun ala-ge,

¹⁸ kat kiyuruk kalen pem-et woragun-o.

- 15 -

¹⁹ Kwara kuli-o, nambara wa-e. Kindi nggat nggat worak irit kwat yosolar-e, kat-nen kwarosolat woragun-e kwara-t lombot pi-o.

²⁰ Kar-e inndi nden kaso yi nunggwi nap min uno kasa leraben nunggwi nap min-e yagiga kundurak pug-o.

²¹ Iri kwarugwi nab-e yanem-et insilobulo lak nap kwat ma-o. Kat-nen nde nene nak yik tenak woralar-e, yanem-et kusum-e meya ndelep pelep tak nde yirik woragun-o.

- 16 -

²² Keid nde woralep puk nggal-nen-e kar-e lak woraleb-et nde, keid ebem-nen kar-e worasu me, keid-nen yidnak yidnag-et kwari-o. Kiya nde indi worak yosoluk worala-ge, kek tak posolar-e abuwa-t yurag-o.

²³ Ndemeret mul undugwi wene min indi worak elem min nggomo undugwi min yebet kagwi min iri mende oboksa-ge mondok onggo purag-o. Alat nde, nggok lombok me, onggo wanurag-e lag-o.

²⁴ Ap misik nde ambara iri na nde mondok indi nggat nggat worak konak ala karug-e, eid iri na-ge alen kujwa-o. Nde, ambara indi nggat nggat worak iri na bem indi-t kek yuwa-o.

²⁵ Keid min kiya min-e kat kebem enalin enalen yogolat wolmag-o. Nde, kwe kat nderak kibij-e alen kasolat wolmag-o.

- 17 -

²⁶ Nambara wa-e. Kwara lombot perenak woraruk, ap-nen kebage imbirik mburuwakluk an-nen worasu nebage yu nak wanurag-o.

²⁷ Kweyap terak waring kagwi kweyap ereba-ge lak tak unpurak sabu logo-nen yusu-o.

²⁸ It terak waring kagwi kweyap iri-ge ap nden unpugwi nap nggal tu ndumu pak turuk, ap onkwerak worak kwarat ereba na mbabi rak enpaga mba yili-o.

- 18 -

^29-30 Kar-e anggut amburu kwarat nonggolat, inndi nden kaso yi pempa undu kagwi nap min enpem mbusu-ge kar-e karu, lak? Iri yugwi nab-e anggun panggun andi bandi kwarat wanili-o. Ir-e pempa yane nak worogolat, yuk puk nak mbogolat, enlengen mep worok yosolat, ebem-e mep nak yisi mbosolat kwarusu-o. Nde, yanem ereba-ge keya burag-e ndag-et nde kwarusu-o.

³¹ Anggut amburu iri-ge erare na konak, iri-nen indi wanosolat, embe arem erare na kil mol tak konak, undu na konak ontonggolem arem mberak pugwi irit nde, anggut amburu iri-nen kindi ngaruwakluk keram wolmomtak pug-o.

³² Nuruk kub-e waro-nen ondosoma nggal worasolar-e,

³³ kerengen-e punuksa laluk laluk yosolat, kindi uwi yaga woragit lak, kemndam nggwe-ge kasa kasa wene mbilarosolat,

³⁴ kar-e koma yi koma enggendumu worala, koma bem-nen posid owak sindik ereba na abi bem woraidnak nggal woralat, yi koma nggweyerep nggwayerep mborosola enggendumu woraidnak nggal kindi lak luk abung abung landuluk nugun-o.

³⁵ Iri kwasa woralat-nen kat-nen yosolar-e: ”Abuk! An yu-ge ap-nen norogolat puk pak nirikma yur-a? Alat nde, an-e kwat nibiga iri-ge nindi-ge yebet kasu bug-o. A! An-e nerengen lamburusu yu-ge! Iri ala-ge, an-e yi nde tuguruk nayeg-o” luk yugun-o.