NGGOMO WENE 22 - Nanduk Ngget Tul Pidnak Wene

¹ Insilobulo kwarat worak iri-ge te-t nde, unu konak wolmomtak iri-ge mondok nggok-nen yusu-o. Emas min perak min wok undurak iri-ge marik-nen yusu-t nde, ap-nen unnu konak yik kagwi iri-ge mondok nggok lombog-o.

² Enarengge worak na irit, enarengge lak na irit, it onowene-ge misiget nak worasu-o. Nde, iri-ge it oboksa Nagawan Indo nak-nen ndak worak enpamu-o.

³ Inndi worak nap-nen-e lak tak unpurak mende enpem mburak nde karug-e, mondok inggi mbal koragwi-o. Alat nde, ap wid-nen-e kagit ereba-t mburukmu, lak tak onposo mende-ge enpem mboso-o.

⁴ Nagawan Indo indi aye worak woragolat, inndi teberak woragwi nab-e ukwe mende bem ndak irit woragolat, kek tak onpogolat, enalen pam irit wolma-o.

⁵ Lugud tak kwarugwi nap untulabiyem sabu min kapsuwe min worasu iri-ge kat-nen nde kimiri mbarak wolmomtak kindingen ala-ge, inggi mbarak wolmomtag-o.

⁶ Li marig-e at-nen kona wolmomtak wene-ge kwara mul togolat wolmomtag-o. Iri yosoma-ge, indi worak yosolar-e, at nggomo wiridnak iri na nggal-et kwarosolat wolma-o.

⁷ Insilobulo lak nab-e insilobulo worak nap ndegel unpugwi-o. Nde, namat wanid nap iri na-ge wok tidnak nap iri na ndegel oboso-o.

⁸ Lugud tak kwarugwi uwi pil kaidnag-e anggun worak mende enpem mbuwa-o. Abok nggwe-ge at-nen kasa ereba indi-n pidnak kwat enperenak woraso ereba na-ge lak ma-o.

⁹ Ap indi konag-e nunggwi mende-ge enarengge lak nap mak ondoso me, Nagawan Indo-nen imbiringgat tak ubuwa-o.

¹⁰ Yuk puk mbugwi min sirid mbarak woragwi min neyak puk keyak puk woragwi mende min oboksa lak maklug-e, ap nggweyel unpugwi nab-e mondok langgara wirik unpurag-o.

¹¹ Ap indi mbek tak wolmomtak nak yebet kasolat, wene konak yek ngek nak yosolat kwaroso nab-e nagawan anggam indi kundik irit kwat ma-o.

¹² Nagawan Indo-nen-e enaru yugwi ndemeret konak wene ereba na-ge kwara puksa tena wolmakluk, ennesiget yugwi nap-nen ennesiget yugwi wene nam tak poso-o.

¹³ Ap perari lembe-ge ma wolmomtak nak nggok tak posolat-nen yosolar-e: ”Singa ndakngge-ge an nok nebeyekluk tulabiyem mbepme nabuwok pak tak worasu-o” yosoluk, ma nak woraso-o.

¹⁴ Kweyap ndugum terak nugwi enne amburu iri-ge tamuk nggal-nen yusu-o. Nagawan Indo isilepma ebem worasu nab-e tamuk iri bem lop nok ma-o.

¹⁵ Li marig-e we wid-nen kwarugwi ereba na-t kwat tenak woragwi-t nde, it enpage iri nden kujwakluk, nggambu bem wurugwi-o.

¹⁶ Ta-nen nde yi mende ndi mende ombo yeklug-e, insilobulo lak nab-e anggun panggun tak onposolat, enarengge worak nab-e arengge wok ondosolat ma-t nde, abok-nen-e mondok erengenma lak nde kwat ma-o.

Enaru nap-nen wirik pugwi wene tigapulu 22:17–24:22

¹⁷ Kwara kuli-o. Enaru nap-nen wirik pugwi wene mul kirimin-o! An-nen mirik kibimin wene-ge kwara yebet ki-o.

¹⁸ Kat-nen nde an-nen mul kirimin wene nde karem pugundig-e, kar-e kalen pem woragun-o. Kat-nen nde wene iri na parugu woralar-e, kat-nen yurag-e lid lud tak puruk irit woragun-o.

¹⁹ Kar-e kindi-ge Nagawan Indo ebem-et wat tak woranokluk, an-e yawo-t mirik kibimin-o.

²⁰ Wirik pugwi wene tigapulu (30) iri-ge kat kamanggim mbarak kubukmu-o. Nde, wene iri arem-e enaru yugwi elem min nggomo wene konak min kobong tak-nen yusu-o.

²¹ Nde, wene iri-nen mul korosolar-e, mondok ndemeret wene-t mul korosola, abok ap-nen kin wok kobogola-ge, kat-nen-e onggo-ge mondok lud tak nak yak undugun-o.

- 1 -

²² At umbunu lak iri na karuk, insilobulo lak nap enarengge mengga wanurak pug-o. Ap enpem wene mbarugwi sa-nen enpem wene mbarogolar-e, ap enmawi lak anggun panggun arem woragwi nab-e lel mberel unpurak pug-o.

²³ Nagawan Indo-ge it enambigit nggwe-t yosolat, enmawi lak iri lel inpili nab-e inndisep lak tak puwa-o.

- 2 -

²⁴ Ndag-et insilepma wu yugwi inmin-e yagiga kundurak pug-o.

²⁵ Iri yugundig-e, kat-nen na at-nen kwaroso iri na kwarosolat, iri mende kwarugwi iri na-ge lak tak purak meya ma-o.

- 3 -

²⁶ It nin-nen namat wanidnag-e ”Uwi yagimin-o” luk urul purak pug-o.

²⁷ Abog-e kat-nen uwi yagurak meya ala-ge, nene yoso kondoro min-et wanuwa-o.

- 4 -

²⁸ Nanduk komborak-nen nggweyak abu kuri mbarak pidnak iri na-ge siyag-et tet kwidsa lorak pug-o.

- 5 -

²⁹ Ab-e yabu-ge mondok enpam ndak wanogola, eneyaso, lak? Ap iri-ge we o ma yabu ereba wok turag-e lag-o. Are, yabu-ge nagawan woraso sa iri me wok turag-o.