NGGOMO WENE 15 - Nanduk Ngget Tul Pidnak Wene

¹ Wene onggo kona enne ndeyak pem-et yogola-ge, insilepma yidnak iri na-ge teyok yoso-o. Nde, enne amawi min onggo yogola-ge, insilepma ebem lud yoso-o.

² Ap inndi nggat nggat worak nap-nen wene wirik pugwi iri na-nen-e enaru yurak indingen tak poso-o. Alat nde, ap wid-nen wene wirik pugwi iri-ge wid-nen yebet kagwi ebe lak ereba na nak lom worak-nen yusu-o.

³ Nagawan Indo-nen-e nin me nan me kwat yusu mende ereba na-ge oboksa kaso-o. At-nen-e konak kwatli min meya kwatli min-e kwara lombot posolat woraso-o.

⁴ Wene konak wirik pugwi iri-nen-e ebem lud enalen tak poso-o. Inndi kalak purak wene wirik pugwi iri-nen-e enmawi lak tak poso-o.

⁵ Ap wid-nen-e eid-nen nggomo wiridnak ereba na-ge te rak poso-o. Indi worak nap-nen-e: ”Ob-et yak nirigen-o” luk, nggomo worosolat met pidnak iri na-ge wanoso-o.

⁶ Konak nap ama-ge isilobulo kwarat woraso-o. Alat nde, meya yoso nap iri na arengge mende-ge angin worak mende ebem mbosolat, lak yoso-o.

⁷ Indi worak nap-nen wirik pusu wene-ge konak tena wolmomtak wene nak mburusu-o. Alat nde, ap wid-nen yebet kaso iri-ge iri nggal-e mondok lag-o.

⁸ Nagawan Indo-nen-e konak nap-nen tepan yili-ge kulusu-o. Alat nde, meya yugwi nap-nen at amanggim pidnak mende-ge isili rak nde pusu-o.

⁹ Wene tarugwi nap-nen kwarugwi iri-ge Nagawan Indo-nen-e isili kaso-o. Alat nde, Nagawan Indo indi-n pidnak kwatli nab-e enabuwa-t kaso-o.

¹⁰ Meya kwatli nab-e abok andi bandi rak unpuwa-o. Nggomo wururak imbit yusu nab-e wat ma-o.

¹¹ Nagawan Indo iri-ge ap watluk ndok wurugwi sa min-et oboksa aru me, nggesa-nen ki nap-nen yebet kagwi iri at erengen pem-nen kura wolma-o?

¹² Ap erep pesel onposo nab-e at nggomo wururag-e indi peraso bug-o. Ap inndi worak nap ereba na-nen nggomo nuruwag-o luk peragwi bug-o.

¹³ Inndi arem enalen min woragola-ge, entare na yek tag-et woragwi-o. Alat nde, inndi puru rak woragolar-e, enpem nggwirik, enmawi lak woragwi-o.

¹⁴ Inndi worak nap-nen-e enaru yugwi mende nak kore yugwi-o. Alat nde, ap wid-nen-e at-nen wid woraso iri na min nak yid mbal tenak woraso-o.

¹⁵ Anggun panggun arem woraso nap-nen-e pempa anggun nak kasolat woraso-o. Nde, yek tak alen pem woraso nap-nen-e pempa yek tak alen pem woraso-o.

¹⁶ Enarengge marig-et parugu woragolat-net nde, Nagawan Indo indi aye worak wolmomtak iri-ge konag-o. Alat nde, silobulo kwarat parugu woragolat-net nde, unmud kundugu nak wolmomtak iri-ge meya-o.

¹⁷ Uno undu konag-et nonggolar-et nde, kuri worak pem nili iri-ge meya-nen yusu-o. Alat nde, mburungga nak nonggolar-et nde, nabuwa kabuwa bem nili iri-ge mondok konak lombok-nen yusu-o.

¹⁸ Ap ndag-et insilepma yugwi iri-nen ndowaga-ge yuk puk mbugwi ijak worak pugwi-o. Alat nde, mamak pugwi nap-nen-e lambuksa woragwi elem ennggendumu kwarak pugwi-o.

¹⁹ Perari worak nab-e pempa anggun panggun nak woragwi-o. Lud tak nak kwarugwi nab-e anggun panggun woragwi elem-e enpem mboso bug-o.

²⁰ Li inndi worak-nen-e ineidtak inndi alen tak pugwi-o. Li inndi lak-nen-e iniyarak enne kulugwi bug-o.

²¹ Wid-nen kwarugwi mende iri-ge wene tarugwi nap-nen-e enalen kagwi-nen yusu-o. Nde, inndi worak nap-nen-e mot mor-et kwarugwi-o.

²² Inndi-nen yebet kagit lak nde kwarogolar-e, kwarurak yidnak iri na-ge ebe kwat yoso bug-o. Alat nde, ap kwarat-nen nggomo ondogola-nen kwarogolar-e, ”Irit kwaruwog-o” luk inndi pidnak iri na-ge ebe kwat yoso-o.

²³ Yurak tarem-et wene yogola-ge, ab-e enalin enalen yugwi-o.

²⁴ Inndi worak nap-nen-e lak tak unpurak sa mbugwi tu iri na nggwe keya buruk, tula unluk wolmomtak sa lagwi tu eid na nggwe-t lali-o.

²⁵ Nagawan Indo-nen-e ap inndi kek tak unuwi-ge langgona tud tak puwa-t nde, kweyap togwe onnggweyag-e imiri yoso-o.

²⁶ Nagawan Indo-ge meya kwarurak yemnak puruk woragwi-ge isili rak puruk woraso-o. Alat nde, wene konag-et wirik pugwi iri-nen-e indi alen tak pugwi-o.

²⁷ Ta-nen nde ukwe ukwe iri bem lesa wanugwi mende nde kwarurak pug-o luk yidnak ereba na kwarosolar-e, at ambik ogwela inmin enlengenwak lak tak posolat-nen kwarusu-o. Ukwe-nen ndowaga uang lesa wanugwi isili rak pusu nab-e konak alen pem-et wolma-o.

²⁸ Konak nap-nen-e indi-nen yebet karuk, wene-ge wirik poso-o. Meya yoso nap-nen-e imbiri lamut wene nak wirik poso-o.

²⁹ Konak nap iri-nen nde tepan yosola-ge, Nagawan Indo-nen-e ene koloso-o. Alat nde, wene taroso nap ene-ge koloso bug-o.

³⁰ Entare yik yek tak iri-nen-e inndi alen tak poso-o. Konak wene iri-nen-e ap inndi yek tak poso-o.

³¹ Nggomo ondogolat-nen met inpili ereba na kulili nab-e inndi nggat nggat worak nap ereba na entep inndi nggat nggat worak-net yusu-o.

³² Ap-nen nde at nggomo ebem purak puk yusu nab-e at ondomok-nen ar-e ebe lak mende nggal tak pusu-o. Alat nde, nggomo ebem purak indingen yusu nab-e inndi nggat nggat worak nap kwat yoso-o.

³³ Nagawan Indo indi aye worak wolmomtak iri-ge enaru yugwi mende enaru yurak mabin-nen yusu-o. Kek tak woragwi iri-ge inndi teberak woragwi iri-nen pil lobok yoso-o.