NGGOMO WENE 13 - Nanduk Ngget Tul Pidnak Wene

Salomo-nen nden karuk yidnak wene 13:1–22:16

¹ Ambara iri na nde indi worak-nen-e eid-nen nggomo worosola-ge, kwara yebet kaso-o. Alat nde, ap inndi kek tak-nen-e nggomo worogolat met pidnak ereba na-ge mondok koloso bug-o.

² Konak nap-nen yidnak wene bem-nen-e konak wolmomtak kwat yoso-o. Alat nde, lugud tak nak kwarugwi nap-nen-e insilepma bem kwarurak iri indingen-o.

³ Wene yogolat inndi-net kwaluk yugwi nab-e woragolar-e, kona yamuksa-t wolma-o. Wene kasa ereba nak yugwi nab-e enlengenwak lak ma-o.

⁴ Perari worak nab-e at-nen wanurak kwarat ukwe yuwa-t nde, misiget ter-o luk mondok wanuwa bug-o.

⁵ Mot mot kwarugwi nab-e ennesiget yugwi iri-ge insili-nen yusu-o. Meya yugwi nap-nen-e ap innggiri rak pogolat, unnu mbilaro ngin tak pugwi-nen yusu-o.

⁶ Mot mot kwarugwi elem-nen-e lud tak nak kwarugwi nab-e nggetlel onposo-o. Meya kwarugwi elem-nen-e meya kwarugwi nab-e lak tak onposo-o.

⁷ Ap erep-nen-e: ”An-e yi mende ndi mende ombo-o” luk inmidwak lel kali-t nde, insilobulo-ge lak-net nde yili-o. Nde, ap erep-nen-e yi mende ndi mende ombo-net nde, ”An-e nisilobulo lag-o” luk yili-o.

⁸ Ap enarengge worak nap-nen-e kona yamuksa wolmomtak pem-e ontol-et wirik pugwi-o. Alat nde, insilobulo lak nab-e enpem mbud yugwi bug-o.

⁹ Lud tak nak kwarugwi nab-e tal pago nggal yaya kererak-nen yusu-o. Meya yugwi nab-e tal nigirik nggal irit worali-o.

¹⁰ Inndi-nen kek yugwi iri-nen ndowaga-ge yuk puk mbugwi-nen yusu-o. Inndi worak nap-nen-e nggomo wene-ge kwara kulugwi-o.

¹¹ Yi mende ndi mende we ndag-et nak ndok witli iri-ge ndag-et nak tuguruk ondoro yoso-nen yusu-o. Nde, misik tarem-nen misiget, misik tarem-nen misiget ndok witli iri-ge abog-e kwarat yosolat, silobulo ombo yugwi-o.

¹² It-nen wanurak inndi mbung mbung tak woragwi iri na nde ya lak nda lak yaruruk lasola-ge, inndi abi kalok yoso-o. Alat nde, it inndi-nen pidnak iri na nde ndak yosola-ge, enalen yugwi-o.

¹³ Ta-nen nde Nagawan Indo-nen nggomo wiridnak ereba na nde te rak posola-ge, at ondomok-nen ambikpebe erengenwak lak tak pusu-o. Alat nde, Mbal Pem Nagawan-nen ”Irit kwarurag-o” luk yidnak ereba na ndak ndag-et kwarusu nab-e onggo-t wok tuwa-o.

¹⁴ Inndi nggat nggat worak-nen nggomo indili wene ereba-ge enalen pem woragwi elem-nen yusu-o. Enpem mbud yoso mende nde enpem mbosola-ge, nggomo yak indidnak wene iri na-net inmiri yuwa-o.

¹⁵ Ap inndi worak nab-e entembel wanuwa-o. Nde, ap onmbol pem lagwi nab-e anggun panggun arem wolma-o.

¹⁶ Ap inndi worak nap-nen-e awo kwarigit lak ma-net kwara yebet kagwi-o. Alat nde, ap wid-nen-e at-nen yebet kaso buk iri na-ge we ereba kenangga nak wirik poso-o.

¹⁷ Wirik ibil lobok yidnak nap nari wari rak iri na-nen-e enare purak sa mberak onposo-o. Alat nde, wirik ibil lobok yidnak nap enmberam laso buk iri na-nen-e kona lambuksa woragwi rak poso-o.

¹⁸ Ap-nen nggomo undurak inmbit yugwi nab-e enlengenma lak no mende nggal nde kwat ma-o. Alat nde, nggomo indidnak wene-t kulugwi nab-e kek tak unpuwa-o.

¹⁹ It inndi-n pidnak iri na-t wanogolar-e, mondok konak lombok-nen yusu-o! Ap wid-nen-e meya kwarugwi elem iri na keya buruk mbururag-e mondok insili yili-o.

²⁰ Ap-nen nde ap inndi nggat nggat worak nap inmin are kondogola-ge, it na inndi nggat nggat worag-et ma-o. Alat nde, ap wid ereba na inmin are kundili nab-e enare buwa-o.

²¹ Meya kwarugwi nab-e lak tak onposo mende-nen langgal unpuruk waring kasu-o. Alat nde, konak woragwi nab-e pempa enalen pem worali-o.

²² Konak nab-e at arengge mende-ge at omborak enmanggim keya boso-o. Alat nde, meya yoso nap iri na arengge ndak worak woraso iri-ge lud tak nak woraso nap iri na arengge ma-o.

²³ Nggweyak terak ereba me yabu wanurug-e, insilobulo lak nap enmanggim nunggwi mende kwara purag-et nde, wene mot mot mbarugwi buk iri-nen ndowaga nggweyak terak iri me-ge yabu wanili bug-o.

²⁴ Inlirak indigit lak yili ala-ge, enabuwa-ge mondok kagit lak yili-o. Enabuwa nde kagolar-e, mondok undurag-o.

²⁵ Konak nab-e nunggwi mende bem-e ndak woragwi-o. Alat nde, meya kwarugwi nab-e pempa nere nak woragwi-o.