NGGOMO WENE 1 - Nanduk Ngget Tul Pidnak Wene

Nggomo Wene Yu-ge kwara imbirik mbururak Salomo-nen mbaridnak nggomo wene 1:1-6

¹ Wene yu-ge Ndaut ambara Isarael nap nagawan Salomo-nen nden karuk wene bem nggomo mbaridnak wene-nen yusu-o.

² Nde, iri nggal mbarid iri-ge ngge kwasa-nen inndi nggat nggat worak kwat momtag-o? luk enaru yogolat, iri-nen woragolat na nari wari-ge lak-nen kona mot mor-et woragolat, iri-nen nggomo wene yidnak mondok arem ereba na wene ebe-ge no yosolat-nen yij-o? luk enaru rak puwakluk-nen mbarij-o.

³ Nggomo wene yeba-nen mul ondosolar-e, ab-e inndi nggat nggat worag-et woragolat, ndemeret lud tak nak mot mor-et kwarogolat wolmomtak irit mul undusu-o.

⁴ Nde, nggomo wene yu-nen mirik onposolar-e, kwarugwi buk-nen ndowaga enaru buk nab-e yebet kagwi indi anggat worak tak posolat, ap sujwe mul ondosolar-e, inndi tengge rak posolat, yebet kagwi inndi worak tak onposo-o.

⁵ Iri-nen nggomo wene yu-nen-e ap inndi nggat nggat worak na, enaru yugwi mende-ge nambena enaru rak posolat, iri-nen ap sekola yidnak nap na wene yu-net tu mirik onposolat kwaroso-o.

⁶ Iri nggal kwarosolar-e, nggomo wene arem wene kura worasu ereba na-ge it enaru rak posolat, inndi nggat nggat worak nap nen enemndam nggwe-nen wirik pidnak wene ereba na enaru rak poso-o.

Sujwe nap nggomo indidnak wene 1:7-19

⁷ Enaru yugwi mende enaru yurak pem-e mondok nanduk tak posolar-e, mondok tebe luk Mbal Pem Nagawan indi aye worak irit wolmomtag-o. Nde, ap wid-nen-e inndi nggat nggat elem iri na-ge nggok tak pigit lak, it mul undurak na insili yugwi-o.

⁸ Nambara wa-e. Kar-e keid min kiya min-nen yak kuruwa wene-ge kwara yebet kudtag-o.

⁹ Nde, it-nen mul kuruwa wene ereba-nen-e kat-nen konak yebet kudtak ebem tebesa wok kuruwa iri-ge kabage konak makluk, kumuruk nggal kanggul pem posolat, engen nggal kumukmu yorosolat kwaroso iri nggal-et ma-o.

¹⁰ Nambara wa-e. Meya yugwi nap-nen nde ”Iri nggal kwari-o” luk karem worakola-ge, mondok enne erep nggarurak pug-o.

¹¹ It-nen yak korogolat nde: ”Ndak lobok yi-o. Ap onkore yulndik, eneyaruk, unduwog-o. Nenalen yurak pem meya kwarugwi buk nab-et unduwog-o.

¹² It yawo-ge enalen pem konak worali-t nde, nit-nen enpem mbud yogolar-e, unsu kundugu nok unpul-o.

¹³ Nit-nen-e it insilobulo konak onggo nggok ereba-ge nit nenma silobulo-nen kobong makluk wanul-o.

¹⁴ Ndak lobok yi-o. Yariya wanul mende ereba-ge tembesa ndak ndak wanul-o” luk yak kuruwa-o.

¹⁵ Iri nggal yak korogola-ge, nambara wa-e. Ap ereba nggal-e mondok inmin mbururak pug-o. Mondok inggi mbara karig-et wolmomtag-o.

¹⁶ It iri-ge it-nen meya kwarigit lak ma-ge mondok yobosa-ge woragwi bug-o. Ndag-et ap undurak iri nak ir-e indingen-o.

¹⁷ Towe-nen perak nde at wuruwokluk nggopngen at erengen pem logo bidnak arem-e mondok nggoso bug-et nde,

¹⁸ meya yugwi nap-nen-e it enambik enare pogolar-e, enambik ngonok yurak sabu logo pili-o.

¹⁹ Ndemerer-o. Ap insilepma bem ukwe mende kore yugwi nab-e onggo-ge it enambik indi-t wisirik pugwi-o.

Inndi nggat nggat elem-nen wene mbo unpusu wene 1:20-33

²⁰ Koler-o! Tula tula min ap ndok worak sa min-e inndi nggat nggat elem-nen wene mbo inpil nusu-o.

²¹ Pak tu mende bem min ap kwarat woraidnak sa min-e wene mbo inpil nosolar-e:

²² ”Wid kinndi worak wa-e. Kir-e pempa iri nggal nag-et kwat tenak woragub-a? Nde, kit-nen enaru yugwi mende te rak pogolat, mul kindidnak wene ereba na-ge keya bogolat irit woragub-a?

²³ An-nen nggomo korosolat met kobosola-ge, kwara kulurag-o. Kit-nen kologola-ge, an-nen-e an narem woraso wene nam tak posolat, an-nen naru yidnag-e mirik konposolat kwarimin-o.

²⁴ An-nen lobok yer-o luk wene mbo konposolat, kenmengen mbarigi-t nde, kit-nen eneyakngen nggal tak nibigeb-o.

²⁵ An-nen nggomo kindidnak wene-ge lirin lirin tak pogolat, an-nen met kinpigi wene-ge kunsu bem mbo bigeb-o.

²⁶ Iri bem-e, kit nde lak tak kunpurak mende kenpem mbosola-ge, an-e nda nak kindimin-o. Nde, kit nde kwiye kagola-ge, an-nen-e eneyakngen nggal tak kinpimin-o.

²⁷ Kit nde lak tak kunpurak mende o wija nggal lobok yuwarik, kenpem mbud yosolat, yane worogolat pabok pogola-ge, an-nen-e eneyakngen nggal tak kinpimin-o.

²⁸ Kit kenpem iri nggal mbosola tarem-e kit-nen-e inndi nggat nggat elem an neram wene mbo bil lagub-et nde, an-e kit kenne ereb-e nggarimin pug-o. Kit-nen-e an nogwere-ge nin me nan me yugub-et nde, mondok neyagup pug-o.

²⁹ Kir-e ap enaru yugwi mende mondok kinsili woragolat, Nagawan Indo-nen yidnak yidnak kwarurag-e kinmbit yogolat woragwi-o.

³⁰ Nde, kir-e an-nen nggomo kindidnak wene-ge kulurak kinsili yogolat, an-nen nggomo kondosolat met kinpidnak wene-ge kwara yebet kagwi bug-o.

³¹ Iri bem-e, kit-nen kwatli min kit-nen meya kwarurak yemnak pili min ereba-nen ndowaga-ge abog-e angin worak kenpem mbosola kagub-o.

³² Kwarugwi enaru buk nab-e an lirin lirin tak nibili-nen ndowaga wat ma-o. Wid nggal kabak woragwi yigisa labuk ma iri-ge an insili rak nibili-nen ndowaga kwat ma-o.

³³ Alat nde, an nene kulili nab-e inmiri mbarak irit woragolat, kwiye yurak na lak, yamuksa irit wolma-o” luk yij-o.