NGGALATIA 6 - Nanduk Ngget Tul Pidnak Wene

Yongga yongga wolmer-o yidnak wene 6:1-10

¹ Nowe nowosi wa-e. Ap misik-nen meya mbi kwarosola-ge, Konak Indi kenarem woraso nap kit-nen-e ap iri na konak tak uburag-o. Konak tak obogolar-e, kinndi yangonak pem-et kwarugup na-e. Kit na iri nggal-et kinndi ngaruwa-o luk, kit kondomog-et kwara pil pel tak puruk wolmer-o.

² Nin nap enpem angin worak mende mbidnak ala-ge, yongga yongga kud togolar-e, Kerisut-nen ”Iri nggal kwaru-o” yidnak wene iri-ge ndak tak pugub-o.

³ Ap misik-nen perasolar-e, ar-e konag-e lag-et nde, ”An-e ijar-o” luk perasu iri-ge at na at ambikpebe ombol pem lasu-o.

⁴ Ap ondomok tak-nen at-nen kwaroso iri na eyami mbaruwag-o. Nde, at-nen kwaroso iri-ge konak nak ala-ge, at ondomok-nen kek yurak ob-o. Nde, nin nap-nen kwarogola kaidnak pem at ondomok kek yurag-e meya-o.

⁵ Ap pidsa-ge it enpem angin worak mende mbidnag-e enambik tak-nen kud tuwa-o.

⁶ Aid wene mul tidnak nap-nen-e at arengge konak mende iri na ereb-e at mul toso nap na wok tosolat wolmag-o.

⁷ Kit na kit kondomok konmbol pem lali-ge meyog-o. Ap-nen Mbal Pem Nagawan nggweyel uburag-e meya-o. Ap-nen uwi yagaidnak iri na-ge ebe yosoma, mbarugwi-net yusu-o.

⁸ Ta-nen nde at-nen ukwe ukwe yoso mende bem uwi yaguwarig-e, piri momtak mende engen irit mbaruwa-o. Alat nde, ta-nen nde Konak Indi bem-et uwi yaguwa nab-e, Konak Indi ebem-nen engen-e unluk woralik nalik momtak irit mbaruwa-o.

⁹ Iri bem-e, nir-e konak nak kwarurak na-ge perari yurak pug-o. Nir-e nenperari lag-et kwarogolat wulmulndig-e, mbarurak tarem wok yosola-ge, engen na mbarul-er-o.

¹⁰ Iri bem-e, nir-e ap oboksa konak tak unpurak worala ya-t nanongga konak tak onpogolat wolmomtag-o. Nde, mondok konak tak unpurag-e, totno ninndi angin tubu yidnak pem-nen nonowe nonowot tak inpidnak nap irit konak tak unpuwog-o.

Inndi yeberak onposolat wa yak indid wene 6:11-18

¹¹ Engga uwurup mbarak nggulok an nambik ninggi-nen mbara kenmanggim pusu yu nde ker-o.

¹² ”Kit kiniye ambasap waber-o” luk watsa yak kindili nap-nen kwarugwi mende bem ija bija yuwokluk-net iri nggal yili-o. Iri nggal kwatli iri-ge Kerisut-nen idnak e lang pang tak pem ala, it lel mberel unpuwa naru-nen kwatli-o.

¹³ Nde, it iniye ambasap wabidnak nap-nen-e imiri mbarak pidnak wene-nen yidnak yidnak nak kwarugwi-ge lag-et nde, kit kiniye ambasap waburak wene yili iri-ge we kit kenaboro mbaridnak pem it inndi kek tak puwokluk-nen yili-o.

¹⁴ An perak nde Nenagawan Indo Yesus Kerisut-nen idnak e lang pang tak iri bem nak nindi kek tak pimin-o. E lang pang tak iri-nen nggweyak ma nap-nen kwarugwi inndi-ge namanggim wat yamu-o. Nde, e lang pang tak iri bem-et an na nggweyak ma nap-nen kwarugwi inndi amanggim wat yukmu-o.

¹⁵ Iniye ambasap wabidnak na irit, iniye ambasap wabigit lak na irit, iri-ge ebe lak mende-nen yusu-o. Alat nde, nenpage ngget mende kwat yidnak iri perak nde nggulok-nen yusu-o.

¹⁶ Nde, ”Iri nggal kwaru-o” yidnak wene yu-nen yidnak yidnak kwatli nap iri na enpem-e lambuksa woragwi elem min unpud kaso elem min-e it enpem mbuwag-o. It enpem na, Mbal Pem Nagawan arengge Isarael nap pidsa enpem na mbuwag-o!

¹⁷ Yesus arengge-nen yusu-o luk yenggerak nuburak pem an nebem ud aroro worasu me, yawo kuri-nen-e ap mbi-nen an anggun panggun tak nuburag-e lag-o.

¹⁸ Nowe nowosi wa-e. Nenagawan Indo Yesus Kerisut-nen idnak we wok ondoso elem-e kit pidsa kinndi imin wolmag-o. Amen.