NGGALATIA 5 - Nanduk Ngget Tul Pidnak Wene

Kerisut nap-nen wisirik woragwi wene 5:1-15

¹ Ndemeret weserak ninpidnak wolmakluk, Kerisut-nen wisirik ninpij-o. Iri bem-e, wisirik kinpidnak pem-e tugup lak mendak wolmer-o. Nde, ndegel unpuwakluk kundugun pem pugwi mende-ge tuguruk purak pug-o.

² Paulus an-nen ndemeret yak kundusu wene yu koler-o. Kit kiniye ambasap mbarogola-ge, Kerisut-e mondok ebe lak mende rak pili-o.

³ Wene yu tuguruk kenggera yak kendeyeg-o. Kit kiniye ambasap mbaridnak nap oboksa wene yu yak kundusu-o: Kir-e imiri mbarak pidnak wene oboksa-ge mondok kwara kwarogolat woragup na-e.

⁴ Imiri mbarak pidnak wene-nen lud tak nak nunpuwa-o luk kinndi mbung mbung tak worali nap kir-e Kerisut ebem-nen penggel yidnak nap-nen yili-o. Kir-e Mbal Pem Nagawan-nen we wok ondoso elem na ombol nggwe-t worali-o.

⁵ Nde, Konak Indi bem-nen nit ninndi angin tubu yidnak pem lud tak nak nunpuwa-o luk ninndi mbung mbung tak worali iri kwat nunpuwakluk yik karok worali-o.

⁶ Nde, nir-e Kerisut Yesus ebem woragolar-e, niniye ambasap wabidnak ala na, ambasap wabigit lak ala na, iri-nen ebe momtak mende-ge lag-o. Nde, inndi angin tubu yidnak pem-nen ap enabuwa kagwi iri nak nggok-nen yusu-o.

⁷ Nde, nanduk kir-e konak nak kenmawi kundigeb-et nde, ndemeret wene iri na-nen yidnak yidnak nak kwarugwi-ge ta-nen nde larok tak kinpij-o?

⁸ Kit larok tak kinpid nap iri-ge wene mbo kinpid Mbal Pem Nagawan-nen-e lag-o.

⁹ Oroti lomboroso mende mariget nak pidnag-et nde, oroti kwarak pidnak iri-ge kwarat lomboroso-o.

¹⁰ Alat nde, Nagawan Indo ebem ala kir-e an nimin kundik worali me, an-nen yebet kasu irit kit-nen na yebet kagub-o luk perasu-o. Nde, nari wari rak kunpusu nab-e, ebe-ge an naru bug-et nde, Mbal Pem Nagawan-nen-e ap iri na ebem wene mbaruwa-o.

¹¹ Nowe nowosi wa-e. An-nen nde iniye ambasap wabugwi wene yil mburusu nggal-e noluk-nen an lel mberel nibili-o? An-e ndemeret iri wene yil mboroso ala-ge, Kerisut-nen idnak e lang pang tak iri-ge ap inndi mberen tak peleb-e lag-o.

¹² Kit nari wari rak kinpili nap iri-ge it-net it ondomok iniyiri wok kurujwag-o!

¹³ Nowe nowosi wa-e. Kit perak nde, wisirik kinpidnak worabok-nen wene mbo kinpid nar-o. Alat nde, wisirik kinpidnak iri na bem kit kenpe-nen ukwe yugwi mende-nen yidnak yidnak yurak pug-o. Are, nabuwa kabuwa yogolat-nen-e kit na kit-net ndegel pegerak mber-o.

¹⁴ Nde, imiri mbarak pidnak wene oboksa-ge wene misiget nak arem worasu-o. Wene iri-nen yosolar-e: ”Kat kambik kabuwa kasu nggal, kat kimin woragwi nap enabuwa kasolat wolmin-o” luk yij-o.

¹⁵ Alat nde, kit na kit-net neyak puk keyak puk mbogolat, suwal kerak mbogolat yugup ala-ge, kit na kit-net kenambikpebe lak yugub-o luk mondok kwara wolmer-o.

Konak Indi-nen yidnak yidnak kwarurak, are, nondomok ninndi-nen pidnak kwarurag-a? 5:16-26

¹⁶ An-e wene yu yak kundusu-o: Konak Indi-nen mirik konposola-ge, ki nap-nen ukwe ukwe yugwi mende iri-ge mondok langgal luk mburugup pug-o.

¹⁷ Nde, ki nap-nen ukwe ukwe yugwi mende-nen-e Konak Indi-nen isili kaso mende irit indingen-o. Nde, Konak indi-nen indingen kaso mende-ge ki nap-nen ukwe ukwe yugwi mende iri-nen isili-o. It enmbereg-e wim mbarak me, kit-nen ”Iri nggal kwaruwog-o” luk kinndi-n peraidnak iri na kwarurag-e meya-t yusu-o.

¹⁸ Alat nde, Konak Indi-nen ndemel kunpuruk waring kasola-ge, kir-e imiri mbarak pidnak wene urugwe nggwe worali-ge lag-o.

¹⁹ Ki nap-nen kwarugwi mende iri-ge nam-et kali nar-o. Ki nap-nen kwarugwi mende-nen kwarogolar-e, mbabi yugwi nde, kwami terak ya ye inpigit kwarugwi nde, ap nak ap nak yebegerak mbugwi nde,

²⁰ kugiwak erembel wanugwi nde, linggirak kwarugwi nde, wim mbarak woragwi nde, yuk puk mbugwi nde, enlengen ale yugwi nde, insilepma yugwi nde, ondomok enmanggim nggok tak pugwi nde, kuri worak woragwi nde, ap len kerak mbugwi nde,

²¹ at nak nggok yusu-a? luk insilepma yugwi nde, anggut engen amburu ndonggosa nuruk inndi wawa yugwi nde, meya kwarurak pem inik inik sakwi nde, ereba nggal erep min kwarogolat woragwi-o. Nanduk yak kindigi na nggal-et yawo na yak kundusu-o. Iri mende kwarugwi nab-e Mbal Pem Nagawan-nen tenagaidnak wi-ge winde yuwa bug-o.

²² Alat nde, Konak Indi-nen engen yosolar-e, ap enabuwa kagwi elem nde, enalin enalen woragwi elem nde, lambuksa woragwi elem nde, inndi luruk puruk woragwi nde, inndi namere woragwi nde, konak nak kwarugwi nde, yidnak yidnak nak kwarugwi nde,

²³ yamenak woragwi nde, inndi-n lid puruk woragwi nde, iri nggal yoso-o. ”Iri nggal kwarurak pug-o” luk imiri mbarak pidnak worasu-ge lag-o.

²⁴ Nde, Kerisut Yesus arengge kwat yidnak nap-nen-e ki nap-nen kwarugwi mende min at-nen ukwe ukwe yoso min, kwarurak ukwe peraso min-e e lang pang tak pem-et worak pid nar-o.

²⁵ Konak Indi-nen nunluk tak pidnak ala-ge, Konak Indi nak-nen lit niniyuruk nosolat wolmag-o.

²⁶ Nde, nit na nit-net kek yogolat, ninndi kalel kerak mbogolat, nin nap iri na nggok yusu-a? luk nisilepma kisilepma yogolat wolmomtak pug-o.