NGGALATIA 1 - Nanduk Ngget Tul Pidnak Wene

Wa yak indidnak wene 1:1-5

¹ Wirik nibidnak nap Paulus an-e ki nap inndi-n pidnak pem-nen na lak, ki nap misik-nen mendak nibidnak pem-nen na lak, are, Yesus Kerisut min at uruk tak pid Nineid Mbal Pem Nagawan min-nen wirik nibid nap Paulus an-nen engga yu mbal kundusu-o.

² An min nanggamirak totno worali oboksa min-nen-e kit Nggalatia woragwi lambuk tak inpidnak nab-e wa yak kindili-o.

³ Nineid Mbal Pem Nagawan min Nagawan Indo Yesus Kerisut min-nen we wok ondoso elem min lambuksa woragwi elem min kinmin wolmag-o.

⁴ Kerisut-nen-e nit meya yidnak pem yawo worasu nggweyak ma meya yu me-nen wisirik nenpeyeklug-e ar-e ondomok iminep wisirik pamu-o. Iri kwarosolar-e, Nineid Mbal Pem Nagawan indi-n pidnak ndak ndag-et kwarij-o.

⁵ Mbal Pem Nagawan nak pempa woragolat nagolat kek tak wolmag-o. Amen.

Aid wene-ge misiget nag-o yidnak wene 1:6-10

⁶ Kir-e Kerisut-nen we wok ondoso elem pem-net wene mbo kinpid nap na ndaget nak keya buruk, nden karuk nin aid wene langgal luk mbitli iri bem an-e wi yusu-o.

⁷ Alat nde, wene nin iri-ge ndemeret aid wene-nen yusu-ge lag-o. Are, ap erep-nen-e kit nari wari rak konpogolat, Kerisut-nen idnak aid wene na nden penden tak puwokluk kwatli-o.

⁸ Alat nde, nit-nen ala na, aid arem-nen lobok yidnak aid nap-nen ala na, nit-nen yak kindidnak aid wene keya buruk, nin aid wene yak kunduwa nab-e imbiri lamut mag-o.

⁹ Nanduk yige iri na nggal-et, yawo na an-nen tuguruk yak kundusu-o: kit-nen wanigep aid wene keya buruk, nin aid wene yak kunduwa nab-e imbiri lamut mag-o.

¹⁰ Wene yu yak kundusu yu-ge, ki nap enalen tak peyekluk-nen yusu-a? Lag-o. Mbal Pem Nagawan alen tak peyekluk-nen yusu-o. Are, ki nap-nen inndingen tak nubuwak tu kore yusu-a? Ki nap-nen inndingen tak nubuwakluk kwariginggal-e, an-e Kerisut ndegel oboso nap yelep pug-o.

Ngge kwasa-nen Paulus-e wirik ibidnak nap kwat yij-o? 1:11-24

¹¹ Nowe nowosi wa-e. Wene yu kwara yak kendeyeg-o: An-nen yak kindidnak aid wene iri-ge ki nap inndi-nen peraidnak wene-ge lag-o.

¹² Wene iri-ge ki nap-nen wok nirigit lag-o. Ap-nen mirik nubugwi na lag-o. Are, Yesus Kerisut at-net nam yaga mirik nibij-o.

¹³ An-e Yawuri nap-nen tena woragwi wene na tena worasolat-nen kwat tenak worasolar-e, Mbal Pem Nagawan-nen idnak lambuk tak inpidnak nap enabuwa lag-et lel mberel onposolat, mondok lak tak enpeyekluk kwarigi wene na kuligep nar-o.

¹⁴ An nanggul mbilit Yawuri nap-nen-e Yawuri nap-nen tena woragwi wene na tena woraiga-t nde, an-e wene na tena worasolar-e, terak minik nggal-et kwarosolat woragi-o. Ir-e nenlawingga-nen kwarugwi-ge kwarogolat woraiga-t nde, an-e terak minik irit kwara kwarosolat woragi-o.

¹⁵ Alat nde, at indi-n pidnak pem an niya arem-net Mbal Pem Nagawan-nen len nuburuk, at-nen we wok ondoso elem pem-net wene mbo nibij-o.

¹⁶ Nde, an-e owene-ge enlem nin nap yak unduwakluk Mbal Pem Nagawan indi-n puruk, at Ambara-ge an narem-nen nam tak posola-ge, an-e ki nap inmin-e ”Ngge kwarimin-o?” luk wene mbarigit lak,

¹⁷ an-e wirik nibidnak nap tak nibigit lak ma-nen wirik inpidnak nap nanduk woragwi Yerusalem woragwi na endam lagit lak, ereya na-net o Arap mbirigirik, iri me-nen-e tuguruk Ndamsik wi lobok yigi-o.

¹⁸ Olengen tiga woraruk, an-e Peterus na naru yekluk, Yerusalem mbirigirig-e, at imin lima belas nene yigi-o.

¹⁹ Alat nde, an-e wirik inpidnak nap ereb-e eneyagit lak, Nagawan Indo owot Yakup iri nak kagi-o.

²⁰ An-nen mbal kundusu wene yu-ge mondok ndemerer-o. Mbal Pem Nagawan imbiri bem me, nenesiget yusu-ge mondoklag-o.

²¹ Iri lug-e, an-e o Siria min o Kilikia min mbirigi-o.

²² Nde, Yurea woragwi Kerisut-nen lambuk tak inpidnak nap-nen-e an yenggerak neyagit lak woraiga-o.

²³ It-nen kologolar-e: ”Ap nanduk nit lel mberel ninpid na-ge yawo-ge at-nen lak tak peyekluk yid inndi angin tubu yugwi wene na ap yak indil waring kasu-o” luk yogola kuliga-o.

²⁴ Kulurug-e, an nebem ala, Mbal Pem Nagawan erembel wanogolat woraiga-o.