NEMIA 9 - Nanduk Ngget Tul Pidnak Wene

Ap oboksa-nen it-nen meya kwaridnak ereba na paridnak wene 9:1-5

^1-2 Nde, waneya iri na arem tanggal dua pulu empat (24) pem-e Isarael nab-e ndok wiriga-o. Ndok wirigarig-e, it-nen yogolar-e: ”Nit meya kwarugwi-ge mondok keya bige-o” luk abu kuri bogolar-e, nunggwi mende ninggit lak tepan nak yogolat woraiga-o. Nde, ir-e enlem nin nap inmin-e mondok kundik woragit lak, enarig-et lenak irit woraiga-o. Nde, it nen meya kwaridnak pem niri nera-nen kwarigi-o luk yogolar-e unsum-e karung sum ereba na langgusa yirik woragolat, enanggul pem nggweyak ndarogolat, men luk it min onmborak min-nen meya yidnak ereba na pariga-o.

³ It enmanggim it-nen yidnak Nagawan Indo-nen idnak imiri mbarak pidnak wene iri na kuluwakluk wonat ondogolar-e tiga jam woraiga-o. Iri-nen tuguruk tiga jam pem-e it meya yidnak parogolat woraiga-o. Iri lug-e, it ereba na-ge entare nggwe tud luk, Nagawan Indo Enmbal Pem Nagawan nak erembel waniga-o.

⁴ Nde, iri na me-ge Lewi nap-nen men yil laruk, wene yugwi ondoro mbi woragij-o. Nde, iri na bem-e Yesua min Mbani min Katmiel min Serebeya min Mbani min Kenani min it iri-ge ondoro iri na me woragolar-e, enne nggoksa Nagawan Indo Enmbal Pem Nagawan iri na emengen mbariga-o.

⁵ Nde, iri tarem Nagawan Indo erembel wanugwi iri-ge it Lewi nap ya-nen tel kwiriga-o: Yesua, Katmiel, Mbani, Asapneya, Serebeya, Ondia, Sebania, Petaya it yu-nen yogolar-e: ”Menluk-nen Nagawan Indo Nenmbal Pem Nagawan nak kek tak puwog-o! Pempa at nak kek tak pogolat wolmog-o! At unu nggok kek tak iri nak mondok kek tak puwog-o. At kek tak ubugwi ereba-ge teberak puruk, At unu-ge terak minik kek tak-net yusu-o” luk yiga-o.

It meya yidnak parogolat tepan yidnak wene 9:6-37

⁶ Iri yogola, Isarael nap-nen tepan-e yu nggal yiga-o: ”Kar-e Nagawan Indo-net yusu-o. Wonaru min mbal nggwe oboksa min yi koma min o yu min ebem worasu mende oboksa min-e kat-nen ndak worak puruk, ebem-e uruk urugup worak mende pigen-o. Mbal nggwe tena woragwi amawi worak-nen na kat keram endaru yunggusa koreluk kat nak kek tak kibili-o.

⁷ Nagawan Indo Mbal Pem Nagawan-e misiget kat nag-o. Kat-nen-e Abaram iri-ge at elem nap ennggendumu-net len obosolug-e, Mbabel iri me-nen kat-nen lit karuk mborosola me, uwi Ut iri na-ge keya bamu-o. Kat-nen-e iri tarem unu ngget misik yarosolar-e, Abarakam yarigen-o.

⁸ Kat-nen kasolar-e, Abarakam iri-ge mondok tugup lak, kat-nen yidnak yidnak nak kwaroso irit karuk, kat-nen-e at imin-e: ’Urul yak kurusu yu-ge mborok tak pimin pug-o’ luk urul watsa irit yak tigen-o. Iri yak tosolar-e: ’Kanaan nap min Et nap min Amori nap min Peris nap min Yebus nap min Nggekasi nap min onnggweyak oboksa-ge an-nen kegera wok kurumu-ge, kat-nen wigarak iri-net ombo wolma-o’ luk yak tigen iri na-ge kar-e ndemeret lugud tak kwaroso buk me, urul yak tigen iri na ndak ndag-et kwat ibigen-o.

⁹ Nanduk Mesira woragolat-nen nonmborak-nen anggun panggun woragola-ge, eneyaigen-o. Teberau Koma eyak pem woragolat-nen yip tiga-ge kat-nen-e enne kuligen-o.

¹⁰ Kat-nen-e kilirak andi bandi rak inpili ereba na-ge karu me, kat-nen-e Mesira nagawan iri na min at eyabu wanugwi nap min we nap oboksa min kwat onposolar-e, kwiye worak kwarat kwat inpigen-o. Iri yigen pem-e kat kanggu kobog-e yawo-nen na mborosolat worasu-o.

¹¹ Kat-nen kilirak enmanggim tu kuwarak posolar-e, yi koma pirisa nderak pigenma, ogorak nggilarak nggwe unuwok piri ret lak ele bem inpil ndil laigen-o. Nde, it muk eneyagwi nab-e yubuk tak ma kerep mboso nggal yi ma yubuksa mberak inpigen-o.

¹² Nde, lengge ala-ge, nggan nggan laring tak pem lit unpuruk mborosolat, nde, kubu mborogola-ge, kanduk nggal yaya rak onposolat kwaril mbirigen-o.

¹³ Mbal pem-nen kar-e Ndobo Sinai bem mbuwaigen-o. Mbuwasolar-e, kar-e kambik kilirak inmin wene mbarigen-o. Kat-nen-e ndemeret imiri mbarak pidnak wene mondok lud tak konag-et kwarogolat wolmomtak wene irit wok indigen-o.

¹⁴ Kat-nen-e kababok kwarigen tarem lenak pigen iri na mondok nggok tak puwakluk wok indigen-o. Musa ebem-nen kat-nen idnak imiri mbarak pidnak wene-ge wok indigenma-o.

¹⁵ Nde, it-nen nunggwi mende lak yosolat, nere yogola-ge, kat-nen-e teram nggwe-nen oroti wok indigen-o. Kerep tulurak puk arem-nen-e yi nere lak tak poso yi pilana pil waigen-o. Kat-nen ’Wok kindimin-o luk owak mbara yak indigen o iri na me-t koreyak inpigen-o.

¹⁶ Alat nde, nonmborak-nen inndi kek yogolar-e, wene kulugwi buk irit kwat yiga-o. Iri kwarogolar-e, kwarurak enpem pigen ereba na-ge mondok kwarigit lak irit yiga-o.

¹⁷ It-nen-e kat-nen yidnak yidnak kwarigit lak yiga-o, Iri-nen kat-nen konak kwat onposo ereba na meme rak piga-o. Nde, kat-nen kwiye worak mende it enlengen pem kwarigen ereba na-ge ir-e meme rak piga-o. Iri yogolar-e, tuguruk ndegel unpugwi nap tak unpuwakluk Mesira lit unpuruk mbururak it-nen ene kulurak nap misik inndi kek tak pem liniga-o. Alat nde, kar-e ap-nen lugud tak kwaridnak kamberam tak poso Mbal Pem Nagawan-nen yusu-o. Kar-e mamak puruk woraso, kindi konak enabuwa kwarat kaso-o. Kar-e ap unpud kwiye worak kaso iri na bem-nen it iri na-ge keya inpigit lak yigen-o.

¹⁸ Nde, it nen-e kugwiwak sapi wam ut mimirik ndak worak puruk, it-nen yak kerak mbogolar-e: ’Yu-ge kit Mesira-nen anggun panggun tak konpogola, lesa wok kunpuruk lobok yid Mbal Pem Nagawan iri na-net yusu-o’ luk yiga-o. Nagawan Indo wa-e. Iri-ge kar-et pesel kibiga-o.

¹⁹ Iri kwarogola-t nde, kar-e unpud kaso elem me, kat-nen-e ir-e mondok nembaga ereba me keya inpigit lag-o. Kat-nen kubu bat lengge bat lit unpuruk mborosolar-e, kubu-nen lengge-nen it tu lit unpuruk mbururak nggan nggan laring tak min kanduk min iri na-ge kat-nen-e lak tak pigit lak irit keya bigen-o.

²⁰ Konak iri na wok ondosolat, inndi nggat nggat worak tak inpigen-o. Nde, ir-e mana mburu min yi min mondok abu ndak irit mak indigen-o.

²¹ Nde, it olengen empat pulu ereya arem tu ndumu nembaga ereba woragola-ge, kat-nen-e it-nen ukwe yidnak mende-ge ndak irit wok ondosolar-e, unsum na ndela mbigit lak, onowak andi yosolat limbirigit lag-o.

²² It wok indidnak nggweyak kuri mak mak woragwi nagawan ereba-nen tenagidnak wi min ap enlem oboksa min ereba na me nin me-nen nin me wok yukmu-ge enpem kore yogola-ge, kat-net ombol nggwe rak onposolat woraigen-o. Nde, Esmbon nap nagawan Sigon iri na uwi nggweyak min Mbasan nap nagawan Ong uwi nggweyak min-e nit nonmborak-net kore yiga-o.

²³ Nde, kat-nen-e nit nonmborak-nen wigarag-e wonaru mbal pem abu nggal-et kwarat tak inpigen-o. Kat-nen-e ’Kit wok kindimin-o’ luk nanduk nonmborak urul yak indigen nggweyak iri na-ge kat-nen-e it wolmomtak wok indigen-o.

²⁴ It-nen wigarak-nen Kanaan wi iri na me ngguruk kore yogola-ge, kat-nen-e o iri me woragwi nab-e it ininggiyapma rak inpigen-o. Kat-nen kilirak wok ondosolar-e, ap enlem Kanaan woragwi nap oboksa min nagawan nagawan iri me woragwi nap min ininggiyapma rak unpuruk woragolat-nen kwat onposolat wolmomtak amawi irit wok indigen-o.

²⁵ Kat kilirak-nen-e o siri mondok pak waga nggwidnak ereba na min nggweyak amburu worak ereba na min o silobulo kwarat arem yebet tak ereba na min yi kenanggugwi emnde mbarak ereba na min yilusu ereba na min oboksa it-nen mengga wanuruk, ombo luk larok yiga-o. Iri-nen anggut yabu min saitun elem ereba na min engen nin nan min-et kwarat nok tenak woragolar-e, enpe ge kwarat limbiriga-o. Kat-nen konak nak kwat onposola, mondok ndak nak irit woraiga-o.

²⁶ Alat nde, kilirak-nen-e kat kimin eyak nak worogolat, kat-nen yidnak yidnak kwarigit lak yiga-o. Nde, it-nen-e kat-nen idnak imiri mbarak pidnak wene ereba na-ge keya buruk, kat kene lomboksa yugwi nab-e ’Tuguruk nden karuk Kenmbal Pem Nagawan eram mberer-o’ luk yak undugwi ereba na nde indiga-o. Nagawan Indo wa-e. Iri nggal kwarogolar-e, it nen-e pempa kat enlengenma nggal tak kobogolat woraiga-o.

²⁷ Iri yogola-ge, kat-nen-e ir-e inminep wesera unuwim nap endam inpigen-o. Iri yigenma insilepma min mondok anggun panggun tak inpiga-o. Alat nde, iri nggal anggun panggun tak onpogola-ge, yongga unduwakluk kat keram wene mbo kibil lobok yiga-o. Iri yogola, kat-nen aid arem-nen kulurug-e, enabuwa karuk enne kuligen-o. Kulurug-e, kat-nen-e it unuwim nap ininggem-nen inmiri yuwakluk, it-nen ene kulurak nap min san ombo onowe min lenak inpigen-o.

²⁸ Alat nde, it woragwi sa iri na nde yamuksa woragolar-e, ir-e ndag-et nak tuguruk meya kwat tenak woraiga-o. Iri ala karug-e, kat-nen it iri-ge unuwim nap anggun panggun tak unpurak ininggem pigenma anggun panggun tak inpiga-o. Iri yogolat, eneyanggo watluk ’Niri nera-o’ luk yogolat-nen-e inmiri yuwakluk kat keram wok mbo kibil luwagola-ge, kat-nen-e enabuwa-nen aid arem-nen it enne kuluruk, kat-nen-e pempa iri nggal kwasa yongga ondosolat nak woraigen-o.

²⁹ Eneyanggo watluk, kat-nen yak indidnak wene kwara kwaruwakluk, kat-nen-e nggomo indingen-et nde, it-nen-e it-nen kwarurak enpem pidnak wene-ge inndi kek tak pogolar-e, keya biga-o. Ndemerer-e it-nen nde kat-nen kwarurak enpem pidnak ereba na nde kwarogola-ge, it unluk wolmomtak na-t nde, kulurag-e keya buruk, eneyanggo lak luk, lembe yogolar-e, kuligit lak yogolat, yidnak yidnak kwarigit lak yogolat yiga-o.

³⁰ Iri kwarogola-t nde, kat-nen mamak puruk worasolar-e, nggomo ondosolar-e, yi olengen ndi olengen lak tak pigenma-o. Iri kwarosolar-e, kat kindi-nen it yak ondosolat-nen kat kene lomboksa yugwi nap enemndam tak posolar-e, nggomo kwarat yak indiga-t nde, kilirak iri-ge eneyanggo nggitlik puruk kwarogola-ge, ap enlem lombok yi wi ndi wi worali nap ereba na ininggem kegera keya inpigen-o.

³¹ Alat nde, kat-nen mondok kwarat unpud kaso iri na-nen ndowaga, kat-nen-e abu abu keya onposolat, mondok lak tak onposolat kwarigit lag-o. Mbal Pem Nagawan kar-e erep min ndak wururag-e meya-o. Kat-nen enabuwa kaso elem nggok iri bem-net kwara unpud kaso-o!

³² Mbal Pem Nagawan wa-e. Kar-e nit Nenmbal Pem Nagawan kamawi worak-nen yusu-o! Kar-e Mbal Pem Nagawan mondok kek tak kwiye worak-nen yusu-o! Kar-e mondok tugup lag-et kat-nen urul pigen-e puksa tena woralat, kat-nen urul pidnak ereba na-ge ndak ndag-et kwaroso-o. Nde, Asiut nap nagawan nagawan woraiga kuri-nen yawo kuri anggun panggun tak nonpogola, nir-e andi bandi kwarat kagolat worali-o. Iri rak nonpogola-ge, nit-nen idnak nagawan nagawan min tepan ombo min kat kene lomboksa yugwi nap min enne kulugwi nap min iri-nen nonmborak min ap oboksa min oboksa-nen andi bandi rak ninpiga-o. Nde, nit-nen andi bandi kali iri-ge meme rak purak pug-o! Mondok yebet yebet tak wolmin-o!

³³ Kat-nen-e mot mor-et kwarosolat, nit meya kwarogola-ge, onggo angin worag-et nenpem pusu-o. Nir-e meya nak kobong tak woragola-t nde, kar-e mondok tugup lak irit kwaroso-o.

³⁴ Nonmborak min nit-nen idnak nagawan nagawan min tepan ombo min enne kulugwi nap min-nen-e imiri mbarak pidnak wene iri na-ge te rak puruk kwid tugwi-o. It-nen kwarurak enpem pigen wene min nggomo indingen min ereba oboksa-ge kulurug-e, kwarigit lak yiga-o.

³⁵ Kat-nen imbiringgat tak onposola, it nagawan-nen kat kilirak tena unpuruk woragolar-e, kat-nen wok indigen onnggweyak terak-nen amburu worak iri na me woragolar-et nde, it-nen meya kwarugwi ereba na-ge keya bigit lak, kat nak ndegel kibigit lak yiga-o.

³⁶ Nit yawo-ge kat-nen wok nindigen nonnggweyak iri na bem-et worali-t nde, mumnggupmanggi worali-o. Nonnggweyak yu-ge mondok amburu worak, nit-nen nonggolat wolmomtak nunggwi mende na kwarat worasu-o.

³⁷ Nggweyak yu-nen wirik poso mende oboksa-ge enlem nin nap nagawan nagawan o tena woragwi ereba na mondok wok indili iri-ge nit-nen kat kimin meya kwatli iri na onggo-t enmawi worak nagawan ereba-ge kat-nen kilirak tena unpuruk wolmakluk lenak inpigen-o. Nde, it-nen nit tena nunpuruk woragolar-e, nonowam min nit nenpe min kwat nonpogolar-e, we it inndi-n pidnak ereba nak kwat ninpili-o. Iri nggal kwat nonpogolat, nir-e mangonokma nggal woragolat, ninndi puru yogolat, yani yane worogolat worali-o!” luk yiga-o.

Isarael nap-nen ”Yu nggal-et kwat tenak wulmul-o” luk watsa mbaridnak wene 9:38

³⁸ Ereba nggal kwat ninpidnak pem-e nit Isarael nab-e ”Yu nggal-et kwat tenak wulmul-o” luk watsa yogolat, engga bem mbarogolar-e, nit-nen enne kulugwi nap min Lewi nap min tepan ombo min-nen-e it-nen idnak lop nok tak pugwi mende pili-o. 10:1–13:31 Pasal 10 yu arem-e ”Yu nggal-et kwat tenak wulmul-o” luk owak mbariga nap unnu min ”Yu nggal-et kwarul-o” yiga ereba na wene mbarak min worasu-o. Nde, Pasal 11 kuri Pasal 13 ya arem-e it Isarael nap woragwi ereba-ge Yerusalem-nen Yewura ereba me worali o siri marik min nggok min-nen woragwi lombok unnu mbarogolat, tepan omborak min unnu mbarogolat, kerep pak leget iri na worak puruk, Mbal Pem Nagawan amanggim lenak piga wene min Mbal Pem Nagawan ama-nen Mbal Pem Nagawan erembel wanogolat kwarugwi wene min Nemia-nen kwarugwi murugwi ereba ngget tak pil lobok yidnak wene min mbarak worasu-o.