NEMIA 8 - Nanduk Ngget Tul Pidnak Wene

Oboksa-nen kuluwakluk Esera-nen imiri mbarak pidnak wene wonarid wene 8:1-12

¹ Nde, waneya tuju bem tak pogolar-e, Isarael nap oboksa-nen unuwi silmu lombok woraiga-o. Nde, waneya iri na arem tanggal satu iri na bem-e it oboksa-nen Yerusalem-nen tumende unu Yi Pak Tumende eralu ndok wiriga-o. Nde, ap ereba na-nen-e Nagawan Indo-nen idnak imiri mbarak pidnak wene Isarael nap enmanggim Musa wok tidnak wene kwara aru nap tepan ombo Esera-nen wanuwakluk emengen mbariga-o.

² Iri yogoloma-ge, Esera-nen-e engga iri na-ge ap min kweyap min li marik wene yebet kudtak enaru indi worak ereba na min worali sa iri na me waruk mbirij-o.

³ Waruk mberarig-e, Esera-nen it kuluwakluk wonarosolar-e, kuplila-nen tel korarik, wonat tenak irit worasoma, o lenggesilmu irit yij-o. Nde, Wonarosola-ge, it oboksa-nen kwara kolak woraiga-o.

⁴ Iri kwarosolar-e, Esera na-ge iri kwarurak amanggim e-nen konidnak e ndamak iri na bem mendak woragij-o. Worala-ge, inggi kigit ambigir-e ab-e it enpe yu woraiga-o: Matisa min Sema min Anaya min Uria min Ilkia min Maseya min irit woraiga-o. Nde, kware ambigit nggwe-ge Pendaya min Misael min Malkia min Asum min Asmbandana min Sakaria min Mesulam min it irit mendak woraiga-o.

⁵ E ndamak Esera mendak woragid iri-ge ap ereba mendag-e teberak unpuruk mondok kek tak me, ap oboksa-nen ar-e nam yik karok woraiga-o. Nde, at-nen ndag-et nak engga iri na ponggorosola-ge, ir-e ndag-et nak men yiga-o.

⁶ Nde, Esera-nen yosolar-e: ”Nagawan Indo kek tak Mbal Pem Nagawan nak erembel wanurag-o!” luk yij-o. Iri yosoloma, it oboksa-nen ininggi keksa ligik pogolat-nen yogolar-e: ”Amin! Amin!” yurug-e, Mbal Pem Nagawan erembel wanogolat entare nggwe tud yiga-o.

⁷ Iri lug-e, it oboksa-nen menluk ondolma lombok mendak woragola-ge, Lewi nap-nen-e imiri mbarak pidnak wene iri na-ge engen waga yak indiga-o. Nde, it Lewi nap iri kwariga nab-e Yesua min Mbani min Serebeya min Yamin min Akup min Sebetai min Oria min Maseya min Kelita min Asaria min Yosabat min Anan min Pelaya min

⁸ it iri-nen-e imiri mbarak pidnak wene wonaridnak iri na-ge kwara engen waga yak ondogola-ge, wene engga arem wonariga iri na-ge kwara ap oboksa-nen yenggerak piga-o.

⁹ Nde, imiri mbarak pidnak wene wonaridnak iri na kulurug-e, ap oboksa inndi puru yil lobok yiga-o. Iri yogolar-e, yip tiga-o. Iri yogola-ge, Ngguberenot Nemia min imiri mbarak pidnak wene kwara aru nap tepan ombo Esera min iri-nen imiri mbarak pidnak wene engen waga yiga Lewi nap ereba na min-nen ap oboksa yak ondogolar-e yu nggal yak indiga-o: ”Yawo-ge Nagawan Indo Kenmbal Pem Nagawan nak kek tak purak tarem me, kir-e kinndi puru yilik, yip tilik yurak pug-o.

¹⁰ Yawo-ge kenma lombok mberer-o. Mburugupndik kenalen pem-et yi nonggolat, nunggwi mende nonggolat kwarer-o. Nde, kit-nen-e nunggwi mende min anggut engen amburu min-e it ininggem lak nggal worali ereba mak ender-o. Yawo-ge Nagawan Indo nak erembel wanurak tarem me, kir-e kinndi puru yurak pug-o. Nagawan Indo-nen wok kundusu enalen kagwi elem iri-nen kenmawi rak kunpuwa-o” luk yiga-o.

¹¹ Lewi nap-nen ap ereba na inndi wi yaga enne lak tak pogolat-nen yogolar-e: ”Yawo yu-ge Nagawan Indo erembel wanurak tarem me, kir-e kinndi puru pera yurak pug-o” luk wene iri nag-et yak ondogolat woraiga-o.

¹² Yogoloma-ge, ap ereba na oboksa enmarak mborogolar-e, yi min nunggwi mende min enalen pem-et nonggolat, ereb-e ap erep ereba na mak indiga-o. Nde, it enalen yiga iri-ge it-nen imiri mbarak pidnak wene wonarogola kuliga iri na it-nen kwara yebet kaidnak pem-net yiga-o.

O Lije Engga Kerengga Wi Wiridnak Tarem yebet kagolat nggok saiga wene 8:13-18

¹³ Nene luk kub-e it enlem lombok-nen enne kulugwi nap min tepan ombo min Lewi nap min ndok wutlug-e, Nagawan Indo-nen idnak imiri mbarak pidnak wene ereba na kwara enaru rak puwakluk, Esera eram mbiriga-o.

¹⁴ Mbirigarik-nen kakmu-ge, Nagawan Indo-nen idnak imiri mbarak pidnak wene it-nen kwaruwakluk Musa ebem pid iri na arem-e O Lije Engga Kerengga Wi Wiridnak Tarem yebet kagolat nggok sakwi tarem sak tenak woragolar-e, Isarael nab-e o lije iri na arem-et nene yogolat wolmomtak wene irit mbarak kaiga-o.

¹⁵ Iri ala karug-e, o Yerusalem iri-nen o siri nggok min marik min o lombok-nen nggok sagurak wene iri na wirik pogolar-e: ”Ndobo nggwe mburugupndik, e libe min saitun min amburu wanugwi e min mbaringga min iri-nen e erep angga min-et unggumbul engga kundugu kaluruk waruk lobok yurag-o. Waruk lobok lug-e, imiri mbarak pidnak wene engga arem mbarak worasu ndak ndag-et o lije wururag-o” luk yiga-o.

¹⁶ Yogoloma-ge, ap ereba na-ge e ndumbul kere ndumbul wil mbururak yiga ereba na wil mbiriga-o. Wil mbirigarik waruk lobok yogolar-e, it unuwi ngguwa mbirik ndamuk tak ereba na me min nde, it unuwi mborom min Nagawan Indo uwi iri na mborom tumende nggwe min pak tumende unu Yi Pak Tumende iri na eralu min pak tumende unu Eperaim Pak Tumende min o lije engga kerengga wi wiril lobok yiga-o.

¹⁷ Ereba na me-ge mbo inpidnak Mbabel-nen lobok yiga nap ereba na-nen o lije wiril lobok yigarik woraiga-o. Nde, nggok yu nggal kwasa sakwi iri-ge Nun ambara Yosua woragid tarem-nen saiga kuri woraigarik, yawo-net nggok iri na sakolat me, enalin enalen yiga-o.

¹⁸ Nde, iri na sak tenak woragolar-e, tuju bem woraiga-o. Iri kwarogolar-e, sakolat woraiga irit wosa Mbal Pem Nagawan-nen idnak imiri mbarak pidnak wene-ge Esera-nen it kuluwakluk enmanggim wonarosolat woragij-o. Iri kwat tenak woraruk, delapan pem tak posolar-e, imiri mbarak pidnak engga arem worasu ndak ndag-et woroksa tu lerak pogolar-e, nggok irit saiga-o.