NEMIA 4 - Nanduk Ngget Tul Pidnak Wene

Nemia-nen Yewuri nap unuwim nap inmin kwaridnak wene 4:1-23

¹ Nde, Sanmbalat-nen kulidnggal-e, nit Yawuri nap-nen o siri kerep pak leget wirili iri na kulurug-e, mondok isilepma kwarat yosolat pesel nonposo tel kwirij-o.

² Iri yosolar-e, at imin yabu misiget erep wanugwi nap min Samaria nap san ombo ereba na min inmbiri bem yosolar-e: ”It Yawuri nap enmawi lak yeba nggal-nen-e no kwatli-o? ’O siri yu-ge tuguruk wurul-o’ luk perali-a? It inndi nen yebet kagolar-e: ’Mbal Pem Nagawan amanggim wam wosa kan pul iri bem nak-nen yabu iri-ge misik tarem nak-nen lak tak pul-o’ luk yebet kali-a? Nde, eneyakngen mbo bidnak kan ninggidnak isik logo logo ereba-ge kerep pak leget wururak kerep tak puwa-a?” luk pesel ninpij-o.

³ Iri yosoloma, eram Tobia mendak woragid iri na-nen yosolar-e: ”It-nen kerep leget witli ereba mbi yik ker-o! Ndakngge-nen na nggilara mberak purak ndak-nen yusu-o!” yij-o.

⁴ Yosoloma, an-nen-e tepan yigi-o. Tepan yosolar-e: ”Mbal Pem Nagawan wa-e. Nit pesel ninpili ereba-ge kuli-o. It-nen pesel ninpili ereba-ge tuguruk it ondomok enpem mberak pi-o. Nde, it enarengge oboksa-ge mengga wanogolat, enpe na kugun pem wok unpuruk o it enaru buk sa wok unpuruk mburuwag-o.

⁵ Nde, nit-nen kerep pak leget yu worogola, pesel ninpili me, it-nen lugud tak kwarugwi mende-ge kamberam tak purak pug-o. Nde, it-nen meya kwarugwi na meme rak purak pug-o” luk tepan yigi-o.

⁶ Irit yogola, nir-e kerep pak leget panggarogolar-e, ap oboksa-nen yabu kwara tebeksa wanogolat me, teram nggwe-ge wosa enggendumu si sa pil laige-o.

⁷ Iri kwarogola, Sanmbalat min Tobia min it Amon nap min Asndot nap min iri-nen Arap nap min-nen kologolar-e: ”Yerusalem kerep pak iri na-ge mondok enmawi-t kondogolar-e, kerep pak uru ereba na-ge abu-t nggilil lobok yili-o” yogola kulurug-e, mondok insilepma kwarat yiga-o.

⁸ Iri yogolar-e, nari wari rak nunpurak pem nit Yerusalem nenpem mbud yuwokluk wene mbariga-o.

⁹ Iri kwarogola-ge, nir-e Mbal Pem Nagawan eram tepan yogolat, o siri iri na-ge kubu-nen lengge-nan pap tak nak woraige-o.

¹⁰ Iri kwarogolar-e, Yewura nap-nen-e ndawi-ge yu nggal ngariga-o: ”Angin worak kud turag-e nenmawi lak yosola-t nde, eneyakngen mbo bidnak mende awo ligik worasu-o. O siri kerep pak leget yu nggal nit-nen wururag-e meya yusu-o” luk ngariga-o.

¹¹ Nde, nit nunuwim nap-nen wene mbarogolar-e, mimo nit nenpem kore yogolat, nondogolar-e, nit-nen kwatli iri na-ge yugwi rugwi rak purak yogola-t nde,

¹² it Yawuri nap it endam worali ereba na-nen-e wim nap-nen wene mbatli ereba na-ge pempa yak nindil lobok yogolat woraiga-o.

¹³ Iri yogola-ge, an-nen-e yalawi min wuru min san min tembesa ap erep wok undurug-e, it onowe onowot-nen pak ombol nggwe yabu wanili sa awo nggeret konurak sa ereba na me pak tak inpil lobok yigi-o.

¹⁴ Nde, an-nen yik kasoma-ge, it ereba na-ge kwiye yogola-ge, an-nen it min ap onowe nggal ereba na min it-nen enne kulugwi nap ereba na min yak ondosolar-e: ”Kir-e wim nap enaye-ge yurak pug-o. Nagawan Indo amawi worak kwiye worak iri na kinndi yebet ker-o. Mondok kennggamirak min kinlirak min konkwerak min kunuwi min inmiri yurak pem mondok kenmawi konder-o” luk yak indigi-o.

¹⁵ Nde, nit nunuwim nap-nen wene mbaridnak wene ereba na abu nit nenaru yidnak karug-e, it-nen yebet kagolar-e: ”Nit-nen wene mbarige ereba na-ge Mbal Pem Nagawan-net yugwi rugwi rak pij-o” luk enaru yidnak ala karug-e, nir-e tuguruk kerep pak leget witli ereba na wat tenak woraige-o.

^16-17 Nde, ereya tarem-nen-e an nowosirag-e enpe menggesa ereb-e yabu wanogolat, nde, ereb-e pak tak woragolar-e, wim pem yurugwi sum yutluk, ndumno yatluk, tege min san min ininggem-nen pak tak woraiga-o. Nde, it enne kulugwi nap ereba-nen-e it unuwokma woragwi nap ereba na-ge o siri pak leget iri na worogola, kwara yaruk onpogolat woraiga-o. Nde, pak leget iri na wururak egere kud turuk lobok yugwi nap-nen-e ininggi ponok nggwe-ge san tena-nen ininggi ponok nggwe-ge yabu wanogolat woraiga-o.

¹⁸ Nde, kerep pak leget wurugwi nab-e yalawi unpugulwak pem kamasa puruk worogolat, nde, wim ala ene pu yurak nab-e neram irit woragij-o.

¹⁹ Iri kwarogolat-nen an-nen ap ereba na min ap enne kulugwi nap min lit unpuruk mburugwi nap min yak ondosolar-e: ”Yabu yu-ge awo nggok ebis worala me, ab-e mboksa kerep pak leget mandil ya men nda men mbitli-o.

²⁰ Iri kwasa wanukmu-nen nde wim eneyarug-e, ene pu kologolar-e, mondok ndag-et nit nendam yu me ndok wiril lobok yurag-o” yak indigi-o.

²¹ Iri nggal kwasa nit-nen yabu wanogolar-e, o kil posola-nen tel kutluk, wok tenak worakmu, o ndamuk yosolat wonaru nam yil lobok yosola, ndong yogolat woraige-o. Iri kwarogolar-e, ap ereb-e yabu wanogola-ge, ap ereb-e tege tenasa pak tak woraiga-o.

²² Nde, iri kwarogolat woragolat ereya na-ge yabu iri wanugwi nap min it yongga undugwi nap min-e an-nen-e: ”Yerusalem yu me nene yogolat wolmer-o” yak ondosola, Yerusalem nene yogolat woraiga-o. Iri kwarogolar-e, kubu-ge o siri yik karok pak tak woragola-t nde, lengge-ge kerep pak leget iri na wanogolat kwat tenak woraige-o.

²³ Nde, an min an nimin yabu misiget erep wanugwi nap min an nimin nugwi nap min an yik neyarok woragwi san ombo min oboksa nunsum-e lengge-nen kubu-nen yabu wanogolat-nen yurugwi sum nak yirik woraige-o. Iri kwarogolar-e, pempa san-e mondok nininggem tena nak woraige-o. 5:1–7:73 Pasal 5 min 6 min 7 min ya arem-e Nemia-nen-e Yawuri nap ennggendumu it na it-net lugud tak kwarugwi ereba na mot tak pid wene min it inmin sirid nap-nen kerep pak leget iri na wuruwa naru enpem mbud tenak woraiga wene min mbarak worasu-o. Pasal yeba arem na kerep pak leget iri na abu worak piga wene mbarogolat, iri-nen nandug-et mbo inpidnak sa Mbabilonia-nen Yewura lobok yiga Yawuri nap ereba na wonasa unnu mbarak worasu-o.