NEMIA 2 - Nanduk Ngget Tul Pidnak Wene

Nemia iri na Yerusalem mbiridnak wene 2:1-20

¹ Waneya empat worak puruk, misik tarem-e waneya Nisan pem-e Nagawan Aratatasta iri na-ge nunggwi mende nasolat worasoma-ge, an-e nerare puru rak min irit anggut engen amburu kenangga eram pil lobok yigi-o. Nde, worasolat ereba-ge nerare puru rak yanem iri nggal-e mondok nagawan-nen-e neyaso bug-o.

² Neyaso buk me-ge at-nen kin wok nobosolar-e: ”Kar-e kugwi worag-e lag-et nde, kerare ndenak yu-ge ngge-o? Kar-e kindi puru yidnak keyagi-o” luk yak nirij-o. Yosoloma-ge, an-e wendet yigi-o.

³ Wendet luk, an-nen onggo yosolar-e: ”Nagawan wa-e. Kar-e kuruk pem irit wolmin-o! Nde, nomborak yapma unpugwi sa o siri iri na ndamera nggururak woralat, iri-nen pak tumende ereba na kan-nen nuruk lak tak pidnak woralat, nde, ndegel koboso nap an-e nggesa-nen nindi puru yigit lak wolmomtag-o?” luk yigi-o.

⁴ Yosolakmu, nagawan iri na-nen kin wok nobosolar-e: ”Kar-e kindi-ge no kwat kuburak perasu-o?” luk yak nirij-o. Yosoloma-ge, an-e narem nak-nen Nagawan Indo aid arem tena woraso iri na eram tepan yigi-o.

⁵ Yosoluk, an-nen nagawan iri na yak tosolar-e: ”Nagawan kat-nen nde kindingen tak nobosolat, an-nen kebem nggi yimin yu nde nene kolosolar-e, nab-o. Ndegel koboso nap an-e Yewura nggweyak pem wirik nubugunmu, nomborak yapma unpugwi sa o siri ereba tuguruk wereyek-nen wirik nibi-o” luk yak tigi-o.

⁶ Yosolakmu, nagawan iri na-ge ogwe eralu koreyak woralar-e, an-nen nggi yak tigi iri na-ge ”Ob-o” luk yak nirij-o. Yak nutluk-nen yosolar-e: ”Kat ereba me mburugundig-e, nunggwirik tarem nggal woraruk, mepme tarem nggal-nen lobok yugun-o?” luk kin wok nibij-o. Iri yosola-ge, ”An-e iri nggal tarem lobok yimin-o” luk tul yak tigi-o.

⁷ Iri lug-e, ”An-e terag-et Yewura iri me wok yurak pem-e it nguberenot o Eperat mo mboso (barat) ambigit nggwe worali ereba na enmanggim engga mbal niri-o” luk yak tigi-o.

⁸ ”Nde, engga misig-e an mbirimindik, Nagawan Indo uwi iri na eralu o siri pak tumende iri na konurak min o siri kerep pak leget iri na wururak min an mbirimindik wolmomtak o wururak min amanggim e wok nuruwakluk, o wal tena woraso nap Asap iri na amanggim min-et engga mbal niri-o” luk yak tigi-o. Yak tosola, Nagawan Indo-nen an yongga norosolar-e, Nagawan Aratatasta-nen-e an-nen nggi yigi ereba na-ge oboksa ndak ndak kwarij-o.

⁹ Iri yamu mborosola-ge, nagawan iri na-nen yak indidnak pem-et ap san ombo onowe erep min san ombo erep min kura wam ombol pem koreluk, an ndegel nuburuk mborogolar-e, an-e o Eperat mo mboso ambigit (barat) nggwe-t mbirigirig-e, nagawan-nen mbaridnak engga ereba na-ge iri me woragwi ngguberenot ereba na wok indigi-o.

¹⁰ Alat nde, Mbet-Oron nap Sanmbalat min Amon iri me-nen yabu tena woraso nap Tobia min-nen kuliganggal-e, ”Nemia iri-ge Isarael nap yongga undurag-et lobok yusu-o” yidnak kulurug-e, mondok enarem nggowaru yij-o.

¹¹ Nde, an mbirigirik Yerusalem wok yosolar-e, nowak memesa kenan pem woragi-o.

¹² Nde, ereya na woralar-e, an-nen-e ”O Yerusalem yu-ge Mbal Pem Nagawan-nen-e tuguruk wururag-o luk yak neramu-o” luk mondok ap misiger-o luk mondok yak indigit lak yigi-o. Nde, kenan pem woraruk kup nggal-e an nanggamirak siyak mbi inmin: ”O siri ombol nggwe endeba mburuwog-o” yak undurug-e, kubu irit menluk mbirige-o. Mborogolar-e, ombol pem koreluk mbururak kelerai wam erep mbi wanigit lag-o. Are an-nen ebem koreluk mboroso kelerai iri na nak ebem koreluk mbirigi-o.

¹³ O silmu-nen mborogolar-e, kubu irit mbirige-o. Mborogolar-e, Mbirik Pak Tumende mo mboso nggwe (barat) ambigit iri na nggwe-t mborogolar-e, Waro Naga Yilusu iri na nggwe-nen-e Eneyakngen Mbo Bugwi Pak Tumende abare ena nggwe (selatan) iri na me wok yige-o. Nde, ereba na mborogolar-e, o pak leget mijara labuk yid ereba na min pak tumende kan ninggidnak ereba na min limbinil limbinil mbirige-o.

¹⁴ Iri rak puruk, o silmu mo luwaso (timur) ambigit nggwe-nen mbirigerik, nok abare abam (utara) nggwe Yi Pilana Waso Pak Tumende min Nagawan Yi ugup min ereba na me wok yil mbirige-o. Alat nde, iri me-nen mbururak tula-ge kerep pak leget ndamerak-nen nari wari rak me, an-nen ebem koreluk waring kasu kelerai iri na mbururag-e meya ala karug-e,

¹⁵ Kitoron Mbirikmu mbigerig-e, iri me-nen kubu irit mborogolar-e, kerep pak leget ereba na limbinil limbinil mbirige-o. Lembena keya burug-e, tuguruk nden karuk, Mbirik Pak Tumende iri na nggwe-nen-e tuguruk o silmu lobok yige-o.

¹⁶ Nde, iri tarem-e an-e nelem Yawuri nap tepan ombo na irit, o iri me-nen enne kulugwi nap na irit, yabu winde na irit, iri-nen o Yerusalem siri iri worogola nimin wururak nap na mondok misiger-o luk mbi mondok yak indigit lak me, an-nen limbinil waring kagi min an-nen kwarurak yumnusu min-e o iri me-nen enne kulugwi nap ereba na-ge ap misiger-o luk mbi enaru rak pigit lag-o.

¹⁷ Alat nde, abok nggwe an-nen it yak ondosolar-e: ”Yawo nit-nen anggun panggun worali yeba mbi ker-o! O Yerusalem yu-ge nggurusa nggweyak pem labuk yil yosolat, nde, kerep pak tumende ereba na kan-nen nuruk lak tak posolat kwat yidnak yeba ker-o. Iri bem-e naptag-o. Ap-nen tuguruk pesel nunpuwa naru, o Yerusalem siri pak yu-ge tuguruk wuruwog-o” luk yak indigi-o.

¹⁸ Yak undurug-e, Mbal Pem Nagawan-nen an yongga nirid wene min nagawan-nen yak nirid wene min ereba na-ge ndindera yak indigi-o. Yak ondosola karug-e, it-nen onggo yogolar-e: ”Ob-o, Wuruwog-o!” luk yiga o. Iri lug-e, kerep pak leget iri na wururak wet tak piga-o.

¹⁹ Nde, nit-nen iri kwarurak wene mbarige iri na Sanmbalat min Tobia min Arap nap Nggesem min-nen kulurug-e, nda nondogolat nggweyel ninpiga-o. Iri yogolat-nen yogolar-e: ”Kir-e no kwaruwokluk nen yili-o? Kir-e nagawan imin wim mbatluk kenarik yuwokluk yili, lak?” luk yiga-o.

²⁰ Iri yak nondogoloma, an-nen wene onggo yosolar-e: ”Aid arem tena woraso Mbal Pem Nagawan iri na-nen-e nit-nen yabu wanul iri-ge ebe-t kwarak puwa-o. Nir-e at ndegel ubugwi nap-nen yili-o. Nir-e kerep pak leget yu-ge wurul-er-o. Alat nde, Yerusalem nggweyak yu-ge kit kinmin kundig-e mondok lag-o. Nde, ap-nen Yerusalem obok yogolar-e, kit kunnu mondok yuwa bug-o” luk yak indigi-o. 3:1-32 Pasal 3 yu arem-e Yerusalem kerep pak leget iri na tuguruk worogolar-e, kuri wosa mbo mbal indil lobok yidnak nap unnu mbarak worasu-o.