NEMIA 1 - Nanduk Ngget Tul Pidnak Wene

Nemia

^1a Akalya ambara Nemia-nen kwarid wene ereba na ”Iri nggal kwarigi-o” luk mbaridnak ene-ge yu-o.

Nemia-nen ”Nuwi Yerusalem ngge nggal kwarak worasu-o?” luk indi mbung mbung tak woraidnak wene 1:1b-11

^1b Nde, Nagawan Aratatasta iri na nagawan Perisia iri me menluk woralat olengen dua pulu bem, nde, waneya Kislep pem-e Nemia an-e nagawan iri-nen tenagidnak uwi iri me o siri nggok iminepma Susan iri me-t woragi-o.

² Worasoma-ge, iri tarem-e nanggam Anani-ge ap erep inmin-et Yerusalem-nen lobok yij-o. Lobok yosola-ge, an-nen-e Yerusalem wene min Yewura nap mbo inpidnak sa Mbabel yu me-nen tuguruk mbiriga ereba na wene min kin wok inpigi-o.

³ Kin wanosola, it-nen yogolar-e: ”Ap Mbabel-nen tuguruk enma mbiriga nap ereba na-ge anggun panggun kagolat, ap erem nin nap it worali sa inggi inggi worali nap ereba na-nen pesel onpogolat worali-o” luk yak niriga-o. Nde, wene erep yak norogolar-e: ”O Yerusalem kerep pak leget iri na-ge ndamera nggilarak iri na-t worasu-o. Nde, pak tumende ereba na-ge konigit lak, nanduk kan pogolat meya rak piga iri na-t worasu-o” luk yak niriga-o.

⁴ Yak norogoloma kulurug-e, an-e kore yosolar-e, yip tigi-o. Nde, ereya na tarem woralar-e, mondok nindi puru rak nak irit woragi-o. Woralar-e, nunggwi mende mondok ninggit lak, Mbal Pem Nagawan eram nak tepan yosolat woragi-o.

⁵ Tepan yosolar-e: ”Nagawan Indo Mbal Pem Nagawan aid arem tena woraso wa-e. Kar-e Mbal Pem Nagawan kek tak me, inndi kwiye min-et keram wok yugwi-o. Kar-e kat kabuwa kagwi nap min kat-nen enpem pidnak kwarugwi nap min inmin-e ’Irit kwat kinpimin-o’ luk urul pidnag-e mborok tak poso buk-nen yusu-o.

⁶ Yik niyi-o, Nagawan Indo wa-e. Kat ndegel kubugwi kilirak Isarael nap enmanggim kubu-nen lengge-nen kat keram tepan yusu yeba-ge kwara kuli-o. Nam-et para yak kereyeg-o. Nit Isarael nab-e ndemeret meya-t kwarige-o. Iri-nen an min nomborak min-e meya-t kwarige-o.

⁷ Nir-e kat kimin meya kwarogolar-e, kat-nen kwarurak nenpem pigen wene na tarige-o. Nde, nit-nen kwarurak wene kat ndegel koboso nap Musa ebem pigen ereba na-ge tarige-o.

⁸ Nagawan Indo wa-e. Kat-nen ndegel koboso nap Musa emndam tak posolar-e: ’Kit Isarael nap-nen nde an-nen yidnak kwarigit lak ala-ge, kinndi nden yaga nin tak pogola-ge, an-nen-e ap enlem nin nap ennggendumu ndibi ndi rak kinpimin-o.

⁹ Alat nde, kit-nen nde tuguruk nden karuk, an neram lobok yogolat, an-nen kenpem pidnak ereba na kwarogola-ge, kir-e nggweyak urugwe ombol ereba me ndibi ndi rak woragub-et nde, ndok worak kunpuruk, tuguruk wok kunpuruk, an-nen nerembel wanurak ondoro lenak pigi iri na me kinpil lobok yimin-o’ yigen iri na-ge meme rak purak pug-o.

¹⁰ Nagawan Indo wa-e. Nit yu-ge kat ndegel kubugwi nap, kambik kilirak-nen yili-o. Nde, kat kumbunu kamawi kwiye worak iri na bem-nen ninmiri yigen-o.

¹¹ Kar-e an-nen tepan yusu yu kolosolat, iri-nen kat kek tak kobogolat ndegel kubugwi nap oboksa-nen tepan yili erep ereba min-et kuli-o. Nagawan-nen yawo yu-t nabuwa kujwakluk kat-nen yongga niri-o” luk tepan yigi-o. Nde, ereya tarem-e an-e Perisia nap nagawan iri na yi kenang toso nap woragi-o.