NDAWI ENGGA 96 - Nanduk Ngget Tul Pidnak Wene

Mbal Pem Nagawan iri-ge nagawan mondok kek tak-nen yusu-o

¹ Nagawan Indo amanggim ndawi ngget mbi ngarer-o! O yu ebem woragwi oboksa wa-e. Nagawan Indo kek tak pogolat ndawi yer-o!

² Nagawan Indo erembel wanogolat ndawi yer-o. Pempa konak wene wigarogolar-e: ”At-nen ninmiri yamu-o” luk wigarogolat wolmer-o.

³ At-nen kek tak woraso wene-ge ap enlem oboksa yak ender-o. At-nen kwaroso mende kwiye worak iri-ge nggweyakma nap oboksa yak ender-o.

⁴ Nagawan Indo-ge nggok me, mondok kek tak pugwi irit wolmag-o. Erembel wanugwi ereb-e aye kagwi-t nde, at nag-et aye kagolat wolmomtag-o.

⁵ Ap erep-nen erembel wanugwi-ge ininggi-nen ndak wiridnak mende-nen yusu-t nde, Nagawan Indo iri-ge mbal ndak wiridnak nap-nen yusu-o.

⁶ At iri-ge mondok kek tak abinal worak-nen yusu-o. At ama-ge mondok konak, amawi kobong tak-nen yusu-o.

⁷ Nggweyakma nap oboksa-nen Nagawan Indo nak kek tak uburag-o. At-nen kek tak amawi worak woraso-ge erembel wanurag-o.

⁸ At unu abinal worak iri nak kek tak uburag-o. At amanggim purak mende-ge at ama waruk lobok yurag-o.

⁹ At erembel wanogolat-nen yurugwi sum yutluk, Nagawan Indo erembel waner-o. Yi wi ndi wi woragwi nap oboksa-nen at aye-nen kot kot yogolat wolmer-o!

¹⁰ Ap enlem oboksa yak ondogolar-e: ”Nagawan Indo iri-ge nagawan-nen yusu-o! O yu-ge sil kudtak puk, tugup lak-nen yusu-o. At-nen ap enlem oboksa enpem wene mbenarosolar-e, mot mot pem-et mbaruwa-o” luk yak ender-o.

¹¹ Mbal min nggweyak min wa-e. Kenalen ker-o! Yi koma oboksa min arem woraso oboksa min wa-e. Kene nggurabu mber-o!

¹² Yabu min kebem yaidnak mende oboksa min wa-e. Kenalin kenalen yer-o! Walma woraso e oboksa wa-e. Kenalen-nen kenne lek kagub-o.

¹³ Iri yugup iri-ge Nagawan Indo-ge nggweyakma wi yu me tenageyekluk lobok yosolar-e, at-nen ap enlem oboksa enpem wene mbenarosolar-e, ndemeret mot mot, lud tak pem-et enpem wene mbenaruwa-o.