NDAWI ENGGA 95 - Nanduk Ngget Tul Pidnak Wene

Nagawan Indo erembel wanugwi ndawi

¹ Nagawan Indo ebem ndawi wanuwog-o! Nenalen pem nit Ninmiri Yoso Nap erembel wanogolat ndawi yuwog-o!

² ”Wiwa-o” yak togolat yugwi ndawi bem-et at eram mburuwog-o. At erembel wanogolat nenalen pem-et ndawi yuwog-o.

³ Nagawan Indo iri-ge Mbal Pem Nagawan mondok kek tak-nen yusu-o. Ar-e nagawan mondok amawi worak, erembel wanugwi mende oboksa ombol pem kek tak-nen yusu-o.

⁴ At iri-ge nggweyak arem ena abu woraso oboksa at inggiyapma-nen yusu-o. Ndobo anggul yorok korok ereba tet at arengge-nen yusu-o.

⁵ Yi koma min-et at-nen ndak wiridnak me, at inggiyapma-nen yusu-o. Nggweyak worak sa na at inggi-nen pidnak me, at arengge-nen yusu-o.

⁶ Nir-e at erembel wanogolat, nentare nggwe tud yuwog-o. Nit ndak wat ninpid nap Nagawan Indo iri na eram nendaru yunggusa tud yuwog-o.

⁷ At iri-ge nit Nenmbal Pem Nagawan me, nir-e at ilirak at-nen ndegel nonposo-nen yili-o. Lomba yik karok woraso nap-nen olomba ndogoroso nggal, nir-e at-nen ndegel nonposo-nen yili-o. O nda yid yu bem-e at ene yu kuluwog-o:

⁸ ”Nanduk konmborak-nen o Meriba iri me-nen eneyanggo lak yiga iri na nggal-e kwarurak pug-o. Nembaga o Masa iri me-nen kwariga iri na nggal-e kwarurak pug-o.

⁹ It enlengen-nen-e an-nen kwat unpusu-ge kagotlat-net nde, O Masa iri me it-nen-e an nabut mbarogolat nindi ngariga-o.

¹⁰ It iri-nen an nisili rak pogolar-e, olengen empat pulu irit woraiga-o. An-nen yosolar-e: ’It ap enlem yu-ge yidnak yidnak ndemeret kwarugwi buk nab-et kagi-o! It iri-ge an-nen enpem pidnak wene-ge mondok kwarugwi bug-o’ luk yukmu-o.

¹¹ Iri yogola, an-e nisilepma min mondok owak mbarosolar-e: ’Kir-e an nimin kenpabok kwarogolat wolmomtak sa iri na me-ge mondok nggugup pug-o’ luk owak mbirigi-o” yij-o.