NDAWI ENGGA 90 - Nanduk Ngget Tul Pidnak Wene

Buku 4: Ndawi 90-106 Mbal Pem Nagawan-e ap kurak yugwi ondoro-nen yusu-o Mbal Pem Nagawan ndegel oboso nap Musa-nen tepan yid wene.

¹ Nagawan Indo wa-e. Kar-e ap pem lud woragolat nit kurak yugwi ondoro-nen yusu-o.

² Ndobo ndak wirigit lak ma, nggweyak min o yu min kwarak pigit lak ma-ge, kar-e woroksiyem na lak, tel kwiridnak na lak, kar-e pem irit woraso-nen yusu-o.

³ Kat-nen ap yak tosolar-e: ”Kar-e tuguruk ndak wat kibidnak kerem nggal irit kwat min-o. Nanduk woraso nggal nggweyak kwat min-o” luk yak tigenma-o.

⁴ Kat kambigir-e olengen seribu iri-ge o misiget tarem nda yidnak tono woraidnak iri nggal-nen yusu-o. Kubu nggwe siyak nene luk, indi luk yili ereya nggal-nen yusu-o.

⁵ Kat-nen wok nunpuruk mborosolar-e, nabi karuk lak yoso nggal lak tak nonposo-o. Nir-e tusuangge nggeret tup yosolat nggal

⁶ kuplila-ge tup luk isi pusu-t nde, keyama-ge terabet yusu iri nggal-nen yili-o.

⁷ Nir-e kat kisilepma-nen wendet tak nunpuruk, kat korot age-nen lak tak nunpusu-o.

⁸ Kat-nen-e nit-nen lugud tak kwarugwi ereba na waga nam tak posolat keram pusu-o. Nit-nen meya kwarugwi-ge kura ma-t nde, kat kerengen pem-e nam nak kasu-o.

⁹ Kat kisilepma-nen ndowaga nit nunluk wolmomtag-e poro yusu-o. Nit-nen nunluk wolmomtak olengen-e indisep wirik pidnak nggal lak yusu-o.

¹⁰ Nit nunluk woragolar-e, olengen tuju pulu (70) nak worali-o. Nde, nit nde siyak nenmawi woragolat-nen-e olengen-e delapan pulu (80) nak worali-o. Alat nde, ereya woragolar-e, anggun panggun min andi bandi min nak worali-o. Nunluk marig-et worarug-e, nir-e mondok lak yili-o.

¹¹ Ta nggal-nen kat kisilepma kwiye worak iri na-ge ebem mbosolat, kat kisilepma iri na-nen ndowaga eyanggo wat yidnak aru worasu-o?

¹² Nir-e ninndi nggat nggat worak nap kwat mok-nen nit nunluk poro bem woragwi yu-ge nenaru mokluk mul nindi-o.

¹³ Nagawan Indo wa-e. Mepme-nen kisilepma keya bugun-o? Kar-e tuguruk lobok yosolat, kat ndegel kubugwi nab-e enabuwa ki-o.

¹⁴ Nit nunluk woragolar-e, nenalen pem ndawi yogolat wolmok-nen kuplila-ge pempa kat-nen enabuwa kaso elem-e kwarat wok nondosolat wolmin-o.

¹⁵ Nit andi bandi kwarat kagolat yi olengen ndi olengen woraige ereba na ndak ndag-et nenalen elem-e wok nindi-o.

¹⁶ Kat-nen kwaroso-ge nit kat ndegel kubugwi nap mirik ninpi-o. Nde, kat kabinal-e nit-nen nderak mirik inpi-o.

¹⁷ Nagawan Indo Nembal Pem Nagawan wa-e. Nit-nen yabu wanugwi ebe worak makluk, imbiringgat tak ninpi-o.