NDAWI ENGGA 89 - Nanduk Ngget Tul Pidnak Wene

Anggun worak enpem mbamu woragolat yidnak ndawi Nagawan Indo Mondok Amawi Worak iri na-nen mot mot tugup lak kwaroso wene Eserai nap Etan-nen mul ondoso ndawi.

¹ Nagawan Indo wa-e. Kat-nen nenabuwa kwarat kaso iri na bem an-e pempa ndawi ngarosolat woramin-o. Kat-nen mot mot tugup lak kwaroso-ge pem irit wigal tenak woramin-o.

² An-e naru-o. Kat-nen enabuwa kaso iri-ge pok tak pigit lak, pem irit kaso-nen yusu-o. Kat-nen mot mot tugup lak kwaroso-ge mbal nggal pem irit woraso-o.

³ Kat-nen yosolar-e: ”An-e an-nen lenak pidnak nap imin urul pigi-o. An-nen owak mbara ndegel noboso nap Ndaut imin urul posolar-e:

⁴ ’Kat-nen nagawan woraso kondoro iri-ge an-net puksa tena worasola, ap pem lud kat-nen wigarak-nen-e kondolma nagawan-e mendak nak wolma-o’ ” luk yigen-o.

⁵ Nagawan Indo wa-e. Aid arem woragwi-nen-e kat-nen kwiye worak mende kwaroso ereba na bem kerembel wanogolat, kat-nen mot mot tugup lak kwaroso bem ndawi ngarogolat kwatli-o.

⁶ Nagawan Indo wa-e. Mbal pem-e kat nggal mbi misik worasu bug-o. Aid arem woragwi-nen kat ndak ndak mbi worali bug-o.

⁷ Marak nap ennggendumu-nen na kar-e kek tag-et kibili-o. Kat keralu ereba enaye-ge kali-t nde, kat kaye-ge terak minig-et kali-o.

⁸ Nagawan Indo Mbal Pem Nagawan Mondok Kamawi Worak wa-e. Kat kamawi nggal amawi worag-e ta-o? Nagawan Indo wa-e. Yi mende ndi mende bem oboksa-ge kar-e mot mot tugup lag-et kwaroso-o.

⁹ Yi koma nggurabu mbusu iri na kat kinggem-et worasu-o. Yi saberep mbaberep kwiye worak lobok yoso iri na-ge kat-net kondok tak poso-o.

¹⁰ Yi koma arem woraso nanggu nggok pare nggal (naga) Aragap iri-ge kat-nen anggulwak ndamera worak pigen-o. Kat kuwim nab-e kinggi amawi bem urugwe nggwe rak inpigen-o.

¹¹ Mbal min nggweyak min iri-ge kat karengge-nen yusu-o. O yu min ebem woraso mende oboksa min-e kat-nen ndak worak pigen-o.

¹² Kat-nen nak abare abam (utara) nggwe min abare ena (selatan) nggwe min-e ndak worak pigenma-o. Ndobo Tabot min Eremon min-e enalen pem kat kebem ndawi ngatli-o.

¹³ Kat kamawi-ge nggok lombog-o! Kat karong-e ija lombog-o!

¹⁴ Kat-nen ndemeret mot mot kwaroso min kat-nen kwarurag-o luk wat tak pidnak wene min iri-ge kat-nen tenagidnak wi paro-nen yusu-o. Kat-nen enabuwa kaso min mot mot tugup lak woraso min-e kat-nen kwaroso mende bem-nen nam tak pusu-o.

¹⁵ Ap enlem enalen min-et kat kerembel wanili nab-e enalen kagolat wolmag-o. Ir-e kat keyaya arem worali-o.

¹⁶ It iri-ge kat-nen konak nak kwat unpusu iri na bem pempa tugup lak enalin enalen kagolat worali-o.

¹⁷ Kat-nen-e kwiye worak kwasa ombol nggwe rak nonposo-o. Kat-nen konak kwat nonposo bem-net nir-e ombol nggwe rak nonposo-o.

¹⁸ Nagawan Indo wa-e. Nit nggetlel nonposo nab-e kat-nen lenak pigen irir-o. Nit-nen idnak nagawan-e Isarael Enmbal Pem Nagawan Marak iri na arengge-nen yusu-o.

Mbal Pem Nagawan-nen urul Ndaut yak tidnak wene

¹⁹ O nanduk-net nabi nggal pem ndegel kubugwi nap tugup lak ereba na yak ondosolar-e: ”An-nen wim wari misik yongga worosolat, ap oboksa ennggendumu-nen ap misik lenak uburuk, kek tak ibigi-o.

²⁰ An-nen ndegel noboso nap Ndaut karuk, lenak posolar-e, amburu anggul pem kiligi-o.

²¹ An narong-nen-e pempa at nggetlel uburuk woralat, an namawi-ge at amawi rak posolat wolma-o.

²² At iri-ge wim nap-nen-e mondok urugwe nggwe rak puwa bug-o. Meya yugwi nap-nen na anggun panggun tak ubuwa bug-o.

²³ At uwim nab-e an-nen mondok lak tak inpimin-o. Ta-nen nde at imin insili yuwa nab-e oboksa indimin-o.

²⁴ An-e pempa at abuwa kasolat, mot mot tugup lak kwat obosolat woramin-o. An-nen yongga worosola, at-nen yidnak amawi-ge nambena mbo lasolat wolma-o.

²⁵ At-nen tenagidnak wi an-nen wigak tak posolar-e, Yi Koma Nggulok iri na kuri-nen lingsa Yi Eperat kuri irit mburuwa-o.

²⁶ At-nen yak norosolar-e: ’Kar-e an neid min Nembal Pem Nagawan min-net yusu-o. Kar-e nggetlel nobosolat, nimiri yosolat yoso-net yusu-o’ luk yuwa-o.

²⁷ Iri yosola, an-nen kwarak obosolar-e, an nambara manggiya rak ibimin-o. Iri rak pumu, nagawan oboksa ennggendumu-nen nagawan anggu obok worak tak pimin-o.

²⁸ An-nen-e mondok pem irit abuwa kasolat woramin-o. An-nen at imin urul pigi iri-ge tugup lak pem irit wolma-o.

²⁹ Nggweyak anggul pem mbal eid worala-ge, at-nen nagawan woraso ondoro iri-ge an-nen pem irit tena woramin-o. At ilirak-nen nderag-e ap pem lud pem irit nagawan mendak wolma-o.

³⁰ Alat nde, at-nen wigarak-nen nde an-nen kwarurak yidnak wene iri na kwid togola, an-nen enpem pidnak ndak ndak kwarigit lak yogola,

³¹ it-nen nde kwarurak an-nen enpem pidnak ereba na kwarigit lak yogola, an-nen kwarurak pidnak ereba na nano nano rak pogola-ge,

³² it-nen wene kwid tuwa bem an-nen-e linggamburok indimin-o. It-nen meya kwaridnak pem angin worak mende enpem pil lobok yimin-o.

³³ Iri kwarimin-et nde, an-e pem irit Ndaut iri na abuwa kasolat woramin-o. An-nen mot mot tugup lak kwaroso iri-ge lugud tak pimin pug-o.

³⁴ An-nen ’Kwat kibimin-o’ luk urul yak tigi iri na-ge mondok nden kamin pug-o. An-nen urul yak tigi-ge misiger-o luk mondok nggibik tak pimin pug-o.

³⁵ Pem wolmomtak amanggim an-nen misik pem urul posolat-nen owak mbarosolar-e: ’An nunu marak iri na bem owak mbarusu-o. An-e Ndaut imin-e mondok nenesiget yimin pug-o.’

³⁶ At-nen nagawan woraso iri na-ge pem irit mo worala-ge, an-nen amawi rak puruk woramin-o. Ap pem lud at ilirak-nen wigarak-nen-e nagawan wolma-o.

³⁷ Mbal pem woraso waneya iri-ge mondok aru-o. At-nen tenagidnak wi-ge waneya nggal pem irit wolma-o” luk yigen-o.

Nagawan iri na urugwe nggwe rak pidnak pem yip tidnak wene

³⁸ Alat nde, kar-e yawo-ge kisilepma-ge nagawan ebem pusu-o. Kat-nen-e kat-nen lenak pigen nab-e mbo buruk, keya bigen-o.

³⁹ Kar-e kat-nen ndegel koboso nap iri na ”Kwat kibimin-o” luk urul pigen ereba na-ge lak tak pigen-o. Nagawan at-nen yoroso oropi-ge mirilmu mbo bigen-o.

⁴⁰ At uwi siri kerep pak leger-e kat-nen mijara keya bigen-o. Uwim pak ereba na-ge mijara langgona ngguru rak pigen-o.

⁴¹ Ap oboksa-nen iri nggwe mborogolar-e, arengge-ge mengga wanili-o. Ar-e at imin woragwi nap-nen pesel ubugwi kwat yij-o.

⁴² Kat-nen at uwim nab-e ombol nggwe rak unpuruk, it oboksa enalen tak pusu-o.

⁴³ At esan-e kat-nen ebe lak mende kwasa keya bigen-o. Wim pem-e kat-nen-e yongga wurusu bug-o.

⁴⁴ At-nen idnak abinal worak woraso iri na-ge kat-nen lak tak pigen-o. At-nen nagawan woraso ondoro-ge kat-nen mbo bigen-o.

⁴⁵ Kat-nen-e ndag-et nak ap indi worak tak pigen-o. Iri rak puruk, inggiri nak lom wosa keya bigen-o.

Wisirik puwakluk tepan yidnak wene

⁴⁶ Nagawan Indo wa-e. Kar-e pem irit kura woragun-o? Kar-e pempa kisilepma kan mare nggal mborosolat wolma?

⁴⁷ An-nen nuruk wolmomtak abu poro yidnak yu kindi yebet niyi-o. Kat-nen-e nggweyakma nab-e luru koreyak irit ndak worak ninpigenma-o.

⁴⁸ Ta nggal-nen wat yigit lak, uruk nak irit wolma-o? Ta nggal-nen yapma-nen mbela mburuwa-o?

⁴⁹ Nagawan Indo wa-e. Nanduk kat-nen tugup lak enabuwa yoso iri na-ge ngge me worasu-o? Kat-nen mot mot tugup lak kwaroso bem Ndaut urul yak tigen iri na-ge ngge me worasu-o?

⁵⁰ Nagawan Indo wa-e. Ndegel koboso nap an pesel nibili yu kindi yebet niyi-o. Ap enlem kwarat-nen pesel nobogola, nindi abi kalok yusu-o.

⁵¹ Nagawan Indo wa-e. Kuwim nap-nen-e kat-nen lenak pigen nagawan iri na enlengenma nggal tak ibili-o. At mbiridnak sa-ge pesel nag-et ibil nili-o.

⁵² Pem iri woragolat, Nagawan Indo nak erembel wanogolat wolmag-o. Iri nggal-et kwat mag-o! Amin!