NDAWI ENGGA 84 - Nanduk Ngget Tul Pidnak Wene

Mbal Pem Nagawan uwi iri na bem indi kundik woragid wene Ndawi imid yoso nap amanggim ndawi Nggitit yugwi ndak ndak enlem Kora nap-nen ngaridnak ndawi.

¹ Mbal Pem Nagawan Mondok Kamawi Worak wa-e! Kat woraso sa iri na bem nindi kundik woraso-ge mondok ija lombog-o.

² An nindi-ge mondok kat kuwi iri na bem mbung mbung tak worasu-o. An nebe min nindi min-e Mbal Pem Nagawan kuruk nak woraso kebem nalin nalen-nen nene nggoksa yusu-o.

³ An-nen idnak Nagawan, Nembal Pem Nagawan, Nagawan Indo Kamawi Worak wa-e. Towe marik towe-t nde, o misik wanij-o. Towe wamsa na uwi-ge worasur-o. Kat kamanggim kan pugwi eralu iri me unuwi arem-e enmarik piga-o.

⁴ Ap kat kama pempa woragolat kat kerembel ndawi yik tenak worali nab-e mondok ndemeret enalen pem worali-o.

⁵ It enmawi-ge kat kebem-nen amawi wanili nap min ap inndi Ndobo Sion kil mbururak inndi wat tak puruk worali nap min-e enalen pem worali-o.

⁶ Nde, it iri na yi lak Mbaka Mbirik iri na nggwe mborogolar-e, it-nen-e iri na me-ge yi ulusu kwarak pili-o. Nde, talme nandug-et mbusu iri-nen-e imbiringgat tak posolat yi kobong tak pil mboso-o.

⁷ It ondomok Mbal Pem Nagawan imbiri bem nuk kagwi Sion iri na bem lagola-ge, it enmawi-ge ebem lud kwarat yusu-o.

⁸ Nagawan Indo Mbal Pem Nagawan Kek tak Kamawi Worak wa-e. An-nen tepan yusu yu kuli-o. Yakup Embal Pem Nagawan wa-e. Nene kwara kuli-o.

⁹ Mbal Pem Nagawan wa-e. Nit-nen idnak nagawan imbiringgat tak ibi-o. Kat-nen lenak pidnak nagawan-e kat-nen nggetlel uburuk wolmin-o.

¹⁰ Seribu hari nin me wolmomtag-e ob-et nde, misik tarem nak kat kama wolmomtak iri-ge konak lombok-nen yusu-o. Meya yugwi nap enma wolmomtak nggal, Nembal Pem Nagawan uwi tu mende yik karok woraso nap kwat yurak perak an-e nindingen-o.

¹¹ Nagawan Indo Mbal Pem Nagawan-e nit nggetlel nunpuruk woraso nagawan kek tak-nen yusu-o. At-nen-e nenabuwa kasolat, kek tak nonposolat yoso-nen yusu-o. Lugud tak kwarugwi buk nap wok ondosolar-e, at-nen-e konak mende ala-ge oboksa wok ondoso-o.

¹² Nagawan Indo Mondok Kamawi Worak wa-e. Kat kebem inndi wat tak puruk worali nab-e enalen kagolat irit wolmag-o.