NDAWI ENGGA 80 - Nanduk Ngget Tul Pidnak Wene

Isarael nap inmiri yuwakluk tepan yidnak wene Ndawi imid yoso nap amanggim Asap-nen kiringgidnak ndawi.

¹ Kolomba Isarael nap Yik Eneyarok Woraso wa-e. Nenne kwara kuli-o. Yusup-nen wigarak lombo oro nggal ligik iri-ge kat-nen lit unpuruk mburusu-o. Aid nap kerup ombol pem koreyak woraso kar-e keyaya bem

² Eperaim min Mbenyamin min Manase min endam irit wasug-o. Kat kamawi elem iri-ge nit nenlengen pem nuk kasolat, lobok yugundik, nit ninmiri yi-o.

³ Mbal Pem Nagawan wa-e. Tuguruk nanduk woragwi nggal tak ninpi-o. Kar-e kalen pem-et yik neneyasola, ninmiri worag-et wulmul-o.

⁴ Nagawan Indo Mbal Pem Nagawan Kek tak Kamawi Worak wa-e. Kat kilirag-e tepan yogola-t nde, kat kisilepma-ge mepme-nen lak yugun-o?

⁵ Kat-nen-e yib-e nunggwi mende nggal mak nundusu-o. Nde, yip lengen kwarat yi nggal mak nundusu-o.

⁶ Ap enlem nit ninmin woragwi nab-e nit nonnggweyak yu wene lit lit yuk puk mbuwakluk keya unpusu-o. Nunuwim nab-e enalen pem nda nindili-o.

⁷ Mbal Pem Nagawan Kek tak Kamawi Worak wa-e. Tuguruk nanduk woragwi nggal tak ninpi-o. Kar-e kalen pem-et yik neneyasola, ninmiri worag-et wulmul-o.

⁸ Kat kilirag-e anggut uwi nggal Mesira-nen inpil lobok yosoluk, ap enlem nin ereba na-ge sera wirik onposoluk, it unuwi nggweyak pem-e anggut uwi iri na yaigen-o.

⁹ Kat-nen-e anggut uwi iri yagurak amanggim ondoro kona keya buruk, yabigenma, emengen uwi yaga nggosolat, nggweyak iri na me oboksa yimik yij-o.

¹⁰ At-nen-e ndobo oboksa yimndij-o. Nde, at inggi-nen-e e aras mondok nggok mot na-t nde, yimndij-o.

¹¹ Inggi angga-ge ponok ponok mborosolar-e, yemaluk o Isarael koroga Yi Koma Nggulok iri na ambigit nggwe mborosolat, Yi Eperat arem wok yil mborosolat yij-o.

¹² Mbal Pem Nagawan wa-e. Noluk-nen kar-e eleger-e mijarak pigen-o? Iri yigenma, ap nde iri nggwe mborosolar-e, engen-e mbal tenak worali-o.

¹³ Nggwija-nen lek kasolar-e, kona keya busu-o. Iri rak posoma, mbepme tengge-nen-e nasu-o.

¹⁴ Mbal Pem Nagawan Mondok Kek tak Kamawi Worak wa-e. Tuguruk lobok yi-o. Aid arem-nen kat kilirag-e mbel eneyaruk, inmiri yi-o.

¹⁵ Kat kilirak anggut ari nggal kat kondomok kindi-nen yaigen iri na min anggut isit kat-nen amawi rak pigen iri na min-e inmiri yi-o.

¹⁶ Wim nap-nen anggut uwi iri na-ge ndara keya buruk, kan piga-o. It iri-ge kat kisilepma-nen lak tak inpi-o.

¹⁷ Kat-nen len inpigen nap min nggweyakma nap kondomok kamanggim amawi rak inpigen min-e nggetlel inpi-o.

¹⁸ Nir-e tuguruk kat keram-nen lugudsa nin nggwe mburul pug-o. Nit woragola, kat-nen tena nunpuruk wolmin-o. Iri yosola, nir-e kat kerembel wanogolat wulmul-o.

¹⁹ Nagawan Indo Mbal Pem Nagawan Mondok Kek tak Kamawi Worak wa-e. Tuguruk nanduk woragwi nggal tak ninpi-o. Kar-e kalen pem-et yik neneyasola, ninmiri worag-et wulmul-o.