NDAWI ENGGA 8 - Nanduk Ngget Tul Pidnak Wene

Mbal Pem Nagawan kek tak woraso wene min ki nap kek tak inpidnak wene min Ndawi imid lit kagwi nap enmanggim ndawi Nggitit yugwi ndak ndak Ndaut-nen ndawi ngaridnak wene.

¹ Nenmbal Pem Nagawan, Nagawan Indo wa-e. Kat kunu-ge yi wi ndi wi wigak yusu-o. Kat-nen kek tak woraso-ge mbal kwidsa ombol nggwe-t lasu-o.

² Iri kwarusu-ge li marik marik min li nggisiya min-nen ndawi kebem ngatli-o. Wim nap min sirid nap min enemnde nggutlurak pem-e kat-nen o tena woraso kamawi-ge tugup lak sil kudtak puk-nen yusu-o.

³ Kat-nen mbal ndak worak pigen min waneya min wonaru min kat-nen pigen ereba an-nen yik kasolar-e,

⁴ nggweyakma nap iri-ge no nggal ala-nen kar-e kindi enpem woralat, no nggal ala-nen kwara ndegel unpusu-o?

⁵ Alat nde, kat-nen-e kek tak enpaga Mbal Pem Nagawan kimin ndak ndak tag-et inpigen-et nde, marig-et teberak inpigen-o. Kat-nen kek tak onposolar-e, nggok tak unpugwi mende min unnu kek tak pugwi mende min wok indigen-o.

⁶ Kat-nen kek tak unpuruk, kat-nen o yu oboksa it ininggem pigen-o. Kat-nen ndak worak pidnak mende oboksa it ininggiyapma rak posolar-e,

⁷ lomba min lembu min sapi min oboksa iri-nen nggweyakma woraso mende min

⁸ towe pubu teram nggwe noso mende min yi ma woraso keyane min yi koma arem woraso mende oboksa min it ininggem nak pigen-o.

⁹ Nagawan Indo, nit Nagawan Indo wa-e. Kat kunu-ge yi wi ndi wi wigak yusu-o!