NDAWI ENGGA 73 - Nanduk Ngget Tul Pidnak Wene

Baku 3: Ndawi 73-89 Nagawan Indo-nen mot mot kwaroso wene Asap-nen ngaridnak ndawi.

¹ Mbal Pem Nagawan iri-ge Isarael nap, inndi kopkap lak woragwi nap inmin-e mondok ndemeret konak kwat onposo-o.

² Alat nde, an nindi kabak yigi-o. An-nen nindi angin tubu yidnag-e komo ondoro yij-o.

³ Iri kwarigi iri-ge an-nen yik kasoma, inndi-nen kek yugwi nap ininggem-e ebe worak ala karuk, ”Ar-e iri nggal-et nde, an-e noluk-nen-o?” luk nerengen ale yosoma, iri nggal kwat yigi-o.

⁴ Ir-e andi bandi kagwi buk me, it enpe-ge enmawi worak, mbenak irit worali-o.

⁵ Ir-e anggun panggun mende-ge ap erep enpem mbusu nggal-e angin worak mende-ge enpem mbusu bug-o.

⁶ Iri-nen ndowaga ir-e inndi kek tak pem woragolar-e, it-nen yi kwatlik ndi kwatlik kwarogolar-e, insilepma min nak kwatli-o.

⁷ Meya kwarugwi elem-e it inndi arem-nen mbetla mburusu-o. Ir-e meya kwarurak wene nak nggok tak perenak worali-o.

⁸ It-nen-e pesel onpogolat, meya kwat unpurak wene mbatli-o. Ap lel mberel unpurak wene-ge inndi kek tak pem mbatli-o.

⁹ It-nen-e aid arem woraso Mbal Pem Nagawan iri na obok pogolat, nggweyakma worali nab-e inmin mumnggupmanggi rak inpili-o.

¹⁰ Iri yogola, Mbal Pem Nagawan ilirak min-et nden karuk, it endam nggwe mbitli-o. Mborogolar-e, it-nen amburu ndagidnak wene ereba na-ge ndemerer-o luk yebet kali-o.

¹¹ It-nen yogolar-e: ”Mbal Pem Nagawan iri-ge aru buk-nen yusu-o. Mondok Kek tak Woraso iri-ge kwara yebet kaso bug-o” luk yili-o.

¹² Meya yugwi nab-e iri nggal kwarak woragolar-e, yamuksa woragolat, enarengge mende na kwarat nambena mbo lasolat woragwi-o.

¹³ Wewesa an-e nindi kik lumu ma naru yik karok worasu kagi-a! No manggim-nen meya nebem ma naru inggi mbal tenak worasu-o?

¹⁴ Imbiri lamut mende nak tag-et nebem mbosolat, pempa kuplila andi bandi rak nobosolat worasu-o.

¹⁵ An-nen nde wene iri nggal yosolat nggal-e, kat kilirak enare posolat-nen yeleb-o.

¹⁶ Alat nde, an-nen wene yu kwara yebet kayekluk yigi-t nde, mondok angin kwiye worak nde kagi-o.

¹⁷ Iri ala karug-e, an-e Mbal Pem Nagawan ama nde nggwigi-o. Iri yosolat-nen perak meya yugwi nap kwat unpuwa iri na-ge naru yigi-o.

¹⁸ Kat-nen-e it iri-ge tulabiyem oro bem unpusu-o. Kat-nen-e oro-nen wosa mbogolat lak makluk keya unpusu-o.

¹⁹ Iri rak onposoma, we enlengen sambok yidnak nggal nak lak yili-o. Iri yogolat abu abu lak yili-ge mondok meya lombog-o.

²⁰ Nabi kaidnak kuplila meme yoso nggal, Nagawan Indo wa-e. Kat men yosola-ge, it iri-ge mondok lak luk ondoro yili-o.

²¹ An nindi kalok yosolat, nindi e elem nggwidnak nggal marok yosola-t nde,

²² an-e wid yebet kagit lak, wam nggal kat keram nde woragi-o.

²³ Iri nggal worasolar-et nde, an-e pempa kat kimin kundik worala, kat-nen-e ninggi kigit nggwe tena nuburuk woraso-o.

²⁴ Konggomo bem-net tu mirik nobosolat, kek tak nobosolat-net abok wok nubugun-o.

²⁵ Aid arem-nen-e an-e ta nggal winde yimin-o? An narengge kat nag-er-o. Nggweyakma yu me-nen-e ta nggal nindi ebem pimin-o? Mondok lag-o, kat kebem nak pimin-o.

²⁶ An nindi min nebe min-e namawi lak ma-t nde, Mbal Pem Nagawan wa-e. Kar-e an namawi-nen yusu-o. Pem irit an narengge-ge kat nak worasu-o.

²⁷ Kat keya kibili nab-e mondok lak ma-o. Kat-nen-e tugup lak kat-nen yidnak yidnak kwatli buk nab-e lak tak unpusu-o.

²⁸ Alat nde, an perak nde Mbal Pem Nagawan eram wolmomtag-e mondok konak lombog-o. Nagawan Indo Mbal Pem Nagawan-e an-nen-e an kurak yoso nondoro rak pusu-o. Iri kwarusu iri-ge at-nen kwaroso wene-ge an-nen wigareyekluk-nen kwarusu-o.