NDAWI ENGGA 72 - Nanduk Ngget Tul Pidnak Wene

Nagawan amanggim tepan yidnak wene Salomo-nen yidnak ndawi

¹ Mbal Pem Nagawan wa-e. Kat-nen ”Irit kwarurag-o” luk wat tak pidnak wene-ge nagawan mul ti-o. Kat-nen mot mot kwaroso-ge nagawan ambara mul ti-o.

² Iri yugunmu, at-nen kat kilirak enpem wene mbenarosolar-e, kat-nen pidnak ndak ndag-et enpem wene mbenarosolat wolmag-o. Nde, ap anggun panggun arem woragwi nap na mot mor-et kwat onposolat wolmag-o.

³ Nit nunuwi nggweyak pem-e yi mende ndi mende bem-e ndak nak enalen pem woragolat, ap enlem oboksa mondok mot mot nak kwat onpogolat wolmag-o.

⁴ Nagawan-nen-e at ujokma woragwi nap onowene-ge mot mor-et mbenarosolat, insilobulo lak nap yongga ondosolat it anggun panggun tak unpugwi nap na lak tak onposolat mag-o.

⁵ Mo min waneya min worala-ge, ap pem lud nagawan-e mot pem-et pem irit wolmag-o.

⁶ Nagawan iri na-ge talme karu me mboso nggal, talme nggok mbosolat yabu piri rak poso nggal mag-o.

⁷ At-nen mot mot kwaroso-ge at worala tarem-e nggok yosolat wolmag-o. Waneya worala tarem-e at-nen tenagidnak wi-ge yi mende ndi mende bem-e liring liring mborosolat wolmag-o.

⁸ At-nen tenagidnak wi-ge yi koma eyak onpok nggwe-nen ponok nggwe lid tak pil mborosolat, mo luwaso nggwe-nen mo mboso nggwe yemara mbosolat mag-o.

⁹ Nembaga woragwi nab-e at eram nak tebek ma-o. At uwim nab-e at indipma tud ma-o.

¹⁰ O Tarisis woragwi nagawan nagawan min yi terapmu woragwi nagawan nagawan min-nen-e silobulo we irit at wok til lobok yuwa-o. Arap min Etiopia min nagawan nagawan-nen-e we nagawan wok undugwi mende wok til lobok yuwa-o.

¹¹ Nagawan nagawan oboksa at eram yud tud mbuwa-o. Ap enlem oboksa at ndegel ubugwi nap irit kwat ma-o.

¹² Nagawan na-ge anggun panggun arem woragolat it-nen wanurak meya worali nap min insilobulo lak nap min-nen at eram wene pil lagola, yongga undusu-o.

¹³ At-nen-e insilobulo lak nap min mondok enlengenma lak nap min enabuwa kasolat, enlengenwak lak yurak nap na inmiri yosolat kwarusu-o.

¹⁴ At-nen-e ir-e insilepma bem anggun panggun tak onpogola, mengga keya unpusu-o. Iri kwat unpusu iri-ge it unluk wolmomtak irit indingen perasolat-nen kwarusu-o.

¹⁵ Nagawan iri-ge urug-et wolmag-o! Arap-nen waruk lobok yidnak emas irit wok tuwag-o. Ar-e pempa pempa amanggim tepan yogolat, pempa imbiringgat tak nak obogolat wolmag-o!

¹⁶ At-nen tenagidnak wi iri me-ge nggandum mbato kwarat yosolat, ndobo ndobo oboksa yagidnak mende-nen yebet yosolar-e, o ndobo worak Libanon nggweyak nggal alim mag-o. Nde, at uwi siri arem woragwi nab-e tusuangge nggal kwarat mag-o.

¹⁷ Nagawan unu-ge meme rak pigit lak, pem irit yeberak woralik nalik wolmag-o. At anggu obok mboroso-ge mo worala-ge, mondok wigak yosolat wolmag-o. Ap enlem oboksa-nen at imbiringgat worasu nggal wolmomtak pem imbiringgat tak unpurak nggi yuwag-o. Ap oboksa-nen nagawan imin yogolar-e: ”Alen worak wolmag-o” luk yuwag-o.

¹⁸ Nagawan Indo Isarael nap Enmbal Pem Nagawan iri nak erembel wanurag-o! Wi yurak mende-ge at nak-nen kwaroso-o.

¹⁹ At unu kek tak pem-et woralik nalik ma iri nak erembel wanurag-o. Yi wi ndi wi oboksa-nen at abinal-nen kobong mag-o! Iri nggal-et kwat mag-o! Amin-o!

²⁰ Isai ambara Ndaut-nen tepan yidnag-e irir-o.