NDAWI ENGGA 67 - Nanduk Ngget Tul Pidnak Wene

Nagawan Indo erembel wanosolat yidnak ndawi Ndawi imid lit kaso nap amanggim kecapi poba ene yogolat-nen yugwi ndawi.

¹ Mbal Pem Nagawan-nen nit nenabuwa kasolat, imbiringgat tak nonposolat kwaruwag-o. At-nen nit yik neneyasolar-e, erare yek tak pem-et yik niniyujwag-o.

² Mbal Pem Nagawan wa-e. Kat kindi-n pidnag-e yi wi ndi wi oboksa-nen enaru yuwag-o. Nde, kat-nen inmiri yoso elem-e ap enlem oboksa ennggendumu nam mag-o.

³ Mbal Pem Nagawan wa-e. Yi nap ndi nap enlem-nen kat nak kerembel wanuwag-o. Yi nap ndi nap enlem oboksa-nen kat nak kerembel wanuwag-o.

⁴ Kat-nen mot mor-et tena unpuruk woralat, nggweyakma woragwi nap enlem oboksa lit unpuruk nusu iri na bem-e ap enlem oboksa enalen-nen ndawi yogolat, enalin enalen pem enne nggu lek kagolat wolmag-o.

⁵ Mbal Pem Nagawan wa-e. Yi nap ndi nap enlem-nen kat nak kerembel wanuwag-o. Yi nap ndi nap enlem oboksa-nen kat nak kerembel wanuwag-o.

⁶ Mbal Pem Nagawan, nit Nenmbal Pem Nagawan iri na-nen-e imbiringgat tak nonposolar-e, nggweyak-nen-e yi mende ndi mende kwarat wok nundusu-o.

⁷ Mbal Pem Nagawan-nen-e imbiringgat tak ninpidnak pem yi wi ndi wi oboksa-nen at nak kek tak obogolat wolmag-o.