NDAWI ENGGA 65 - Nanduk Ngget Tul Pidnak Wene

Wiwa-o yak tosolat erembel wanidnak wene Ndawi imid lit kaso nap amanggim Ndaut-nen ngaridnak ndawi.

¹ Mbal Pem Nagawan wa-e. Nit-nen kat kerembel wanogolat, nit-nen kat kimin ”Irit kwarul-o” luk urul pidnak ereba na ndak ndak tak pogolat yurak iri-ge Sion nak-nen kwarurag-o.

² Kar-e ap-nen tepan yidnag-e koloso me, ap oboksa-ge it meya yidnak-nen ndowaga kat keram lobok yuwa-o.

³ An-nen meya kwaroso-ge mondok kwarar-et nde, kat-nen kamberam tak pigen-o.

⁴ Kat kama wolmakluk, kat-nen wene mbo uburuk lenak ibigen nab-e alen kasolat wolmag-o. Kat woraso sa kat kama marak iri na me woraso konak mende ereba na bem-nen nenpem yamuk tak pusu-o.

⁵ Kat-nen nenne erep nggarosolar-e, ombol nggwe rak nonposolat, kat-nen ninmiri yosolar-e, kwiye worak mende irit kwaroso-o. Ap enlem oboksa-nen na irit, yi koma erep pem erepma ereba-nen na irit, inndi-ge kat kebem wat tak puruk woragwi-nen yusu-o.

⁶ Kat kamawi kwiye worak iri na nuk kasolat, ndobo oboksa kamawi bem-nen mendak pil lobok yigenma-o.

⁷ Kat-nen yi koma urugup lak tak posolat, kat-nen yi nggweyerep nggwayerep lobok yusu iri na ndong tak posolat, kat-nen ap enlem oboksa laga mbaga yugwi-ge yamuk tak onposolat kwaroso-o.

⁸ Kat-nen kwaroso mende kwiye worak ereba na kagolar-e, nggweyakma woragwi nap oboksa-nen kwiye luk tebek yili-o. Yi wi ndi wi oboksa o kuri ap kuri-nen kat-nen enalen tak onposola, enalen-nen enne lek kali-o.

⁹ Nggweyak iri-ge kat-nen yik karok woralar-e, ebem talme mberak pusu-o. Kat-nen alim tak posola-ge, ebe-ge kwarat yusu-o. Yi oboksa kat-nen kobongsa ebe rak pil lobok yusu-o. Kat-nen nggandum mbato-ge it enmanggim lid lud tak pusu-o. Iri nggal kwasa kat-nen lid lud tak pusu-o.

¹⁰ Yabu perak pidnak sa ereba na me kat-nen talme nggilara mberak posolat, amburu rak posolat, talme-nen ndamera ndiyak tak posolat yuwakluk mberak pusu-o. Kat-nen iri kwarosola, yi mende ndi mende isit puluruk alim irit mburusu-o.

¹¹ Kat-nen konak kwat onposo iri na bem-nen pempa olengen ndak wosa kat-nen mbarugwi tarem lid lud tak pusu-o. Nde, nin me nan me kat wok yoso sa-ge yi mende ndi mende emben to yusu-o.

¹² Karu me ereba-ge kambing min lomba min kobong yusu-o. Ndobo oboksa alin alen kasu-o.

¹³ Tusu enggendumu karu me ereba-ge lomba-nen muruksa keya busu-o. Yi mbirik ndi mbirik ereba na-ge nggandum mbato-nen kobong yidnak worasu-o. Oboksa enalen-nen ndawi yogolat enne nggu lek kali-o.