NDAWI ENGGA 51 - Nanduk Ngget Tul Pidnak Wene

Meya yidnak Mbal Pem Nagawan-nen amberam tak puwakluk tepan yidnak wene Ndawi yu-ge Ndaut iri na kwe Mbatseba imin mbabi yidnak pem Natan Mbal Pem Nagawan ene lomboksa yoso nap iri na-nen met pidnak ombol nggwe Ndaut-nen ndawi imid lit kaso nap amanggim ngaridnak ndawi.

¹ Mbal Pem Nagawan wa-e. Kar-e pem irit nabuwa yoso me, nabuwa ki-o. Kat-nen ap unpud kwarat kaso me, an-nen meya yidnag-e kamberam tak pi-o.

² An-nen meya kwaroso oboksa masa lak tak nibi-o. An-nen meya yoso elem arem-nen masa mbereksa keya nibi-o.

³ An-nen lugud tak kwaroso-ge para keya busu-o. An-nen meya yoso-ge pempa meme rak pigit lak, marok tenak worasu-o.

⁴ Ndemeret kat kimin, kat kimin nag-et meya kwarigi-o. An-e kat-nen meya-o luk yik kaso mende irit kwarigi-o. Iri bem-e kat-nen ap enpem wene konoso-ge mot mor-et mbenaroso me, kat-nen nebem angin worak pugun iri-ge il pem-et pugun-o.

⁵ An-e ndemeret nanduk ndesa mbosolat-net meya elem iri na parugu ndesa mbidnak-nen yusu-o. Niya arem-net meya mbitlik-nen yusu-o.

⁶ Kat-nen-e ndemeret ab-e mot mot wolmomtak irit perasu-o. An nindi-ge kindi nggat nggat elem-nen kobong tak nibi-o.

⁷ Masa labuk yek-nen marak nibi-o. Mondok loro mbek yaga labuk yek-nen masa keya nibi-o.

⁸ Kat-nen nindi abi kala yigisa keya bigen yu nindi abi tuguruk mot makluk, enalin enalen tak unpurak wene koleyeg-o.

⁹ An-nen meya yoso iri na kisili-nen kabi misik tak puruk, an-nen lugud tak kwaroso oboksa korak pi-o.

¹⁰ Mbal Pem Nagawan wa-e. Kat-nen an nindi-ge ngget kopkap lak irit kwasa keya nibi-o. An nindi-ge kundik woraso elem iri na bem-nen ngget tak irit nibi-o.

¹¹ Kat keram-nen an-e mbo nuburak pug-o. Kat kindi marak iri na-ge an narem-nen waburak pug-o.

¹² Kat-nen idnak inmiri yoso elem iri na bem-nen tuguruk nalen elem tak nibi-o. Kat-nen yidnak yidnak kwarurak nindi rak irit pi-o.

¹³ Iri rak posola-ge, meya yugwi nab-e tuguruk kat keram lobok yuwakluk, kat-nen ”Irit kwarurag-o” luk yidnak wene-ge an-nen meya yugwi nap mul indimin-o.

¹⁴ Nimiri yoso Mbal Pem Nagawan wa-e. Wat yugwi elem inggiyapma-nen mengga keya nibi-o. Iri yugunmu, an-e nalen min-et kat-nen mot mot kwaroso wene-ge wigarimin-o.

¹⁵ Nagawan Indo wa-e. An wene yosola-ge, yongga niri-o. Iri yosola, an-e kat kerembel wanimin-o.

¹⁶ Kar-e kamanggim urusu mbara wosa bugwi ereba na kindingen kaso buk me, an-nen nde kamanggim kan pumu-ge iri-ge kar-e kindingen kagun pug-o.

¹⁷ Nde, an-e Mbal Pem Nagawan kamanggim kan posolar-e, ”Niri nera-o” luk nindi abi kalok yusu irir-o. Indi nde kondok luk tebe yidnag-e kar-e keya bugun pug-o.

¹⁸ Mbal Pem Nagawan wa-e. Kat-nen konak kwat onposo elem pem Sion iri kwat ibi-o. Iri kwarosola, Yerusalem kerep pak leget iri na-ge tuguruk wiri-o.

¹⁹ Iri kwarugunmu-ge, kindingen tak poso mende kat kamanggim pogolar-e, wosa kan pugwi min ebis-et kan pugwi min pogola, kalen kagun-o. Iri-nen sapi kusi-ge kat kamanggim kan pugwi sa kan puwa-o.