NDAWI ENGGA 49 - Nanduk Ngget Tul Pidnak Wene

Silobulo bem indi wat tak puruk wolmomtak iri-ge meya-o Ndawi imid lit kaso nap amanggim enlem Kora nap-nen ngaridnak ndawi.

^1-2 Unnu worak woragwi nap min unnu lak nap min enarengge lak nap min enarengge worak nap min ap enlem oboksa wa-e. Wene yu kwara koler-o. Yi wi ndi wi woragwi nap wa-e. Kwara keneyanggo palak wolmer-o.

³ An-nen-e kwara nindi-net lid puruk wene-ge wirik pimin-o. Nde, an-nen yebet kaso iri-ge mondok arem-nen yusu-o.

⁴ Nden karuk wene-ge an-nen kwara yebet karuk, ”Ebe-ge iri nggal-o” luk para yosolar-e, kecapi poba ene rak posolat-nen yimin-o.

⁵ An nimin sirid nap meya yugwi ereba na-nen lop lop nutluk woragola, anggun panggun arem woralar-et nde, kwiye kamin pug-o.

⁶ It iri-ge it enarengge bem nak inndi kwid puruk woragolat, enarengge mende ereba na bem nak inndi kek tak puruk worali-o.

⁷ Ndemeret ap misiger-o luk mbi-nen anggam imiri yosolat, anggam iri na keya buwakluk onggo Mbal Pem Nagawan wok turag-e meya-o.

^8-9 Wuruwa naru onggo posola, keya obosoma uruk pem wolmomtak pem enarengge mende oboksa wok tuwa-t nde, inmiri yogolat onggo pugwi iri onggo-ge mondok kek tak me, enarengge mende oboksa Mbal Pem Nagawan wok tuwa-t nde, ndag-e ma bug-o.

¹⁰ Ap inndi nggat nggat worak iri na wat yogolar-e, ap wid min enne lak num kum tak min-et misikmu lambuksa lak yogola, iniyujwa-o. Wat yuwama, enarengge-ge ap erep-nen wanuwa-o.

¹¹ Nanduk unluk woragolar-e, onggweyak kwarat ombo wolma na-t nde, wat marig-e, yapma inpidnak sa iri na me-t pem irit woralik nalik irit wolma-o.

¹² Nggweyakma nab-e yi mende ndi mende bem ndak enalen pem na-ge woragwi bug-o. Lok lok noso mende wat yoso nggal-et wat ma-o.

¹³ It ondomok enmawi bem inndi wat tak puruk woragwi nab-e yanem iri nggal kwasa lak ma-o. Nde, it ereba na enne kulugwi nap na iri nggal-et kwasa lak ma-o.

¹⁴ It iri-ge lomba wam wat mag-o luk, lud tak pidnak nggal lomba wam nggal wat yogola, wat yugwi elem iri-nen it tena unpuruk worasu-o. It iri-ge mot mot kwarugwi nap-nen urugwe nggwe rak unpuwama, enpe-ge ap yapma unpugwi sa iri na me enmben to yuwa-o. Iri me-ge it-nen woragwi konak ma ereba na nggal-e lag-o.

¹⁵ Alat nde, Mbal Pem Nagawan-nen wisirik nubuwa-o. Wat yugwi elem inggem-nen nimiri yuwa-o.

¹⁶ Ap misik yi mende ndi mende ombo yosolat, arengge mende kwarat yosola-ge, kir-e kwiye yurak pug-o.

¹⁷ Wat yosolar-e isilobulo ereba na-ge misiger-o luk mbi waruk mburuwa bug-o. Arengge mende min-et nduguluk nggweyak arem ngguwa bug-o.

¹⁸ Ap-nen silobulo bem konak alen pem nak woralat, at-nen kwaridnag-e konak ebe worak nak kwarosola karuk, kek tak obogolat wolma-t nde,

¹⁹ at iri-ge omborak inmbirig-et mburuwarik, ndamuk arem iri na me pem irit woralik nalik irit wolma-o.

²⁰ Nggweyakma nab-e yi mende ndi mende-nen ndak enalen pem nag-e woragwi bug-o. Lok lok noso mende wat yoso nggal-et wat ma-o.