NDAWI ENGGA 46 - Nanduk Ngget Tul Pidnak Wene

Mbal Pem Nagawan ninmin woralat yongga nundusu wene Ndawi imid lit kaso nap amanggim enlem Kora nap-nen Alamot pem yogolat ngaridnak ndawi.

¹ Mbal Pem Nagawan iri-ge nit kurak yugwi nondoro min nenmawi elem min-nen yusu-o. Mangonokma rak ninpidnak woragola-ge, at iri-ge yongga nundurag-e pempa ndak lid lud tak puruk woraso-o.

² Iri ala-ge, o nggweyak lele yosolat, ndobo yubuksa yi koma yiriwak pem mbosolat kwaruwa-t nde, nir-e kwiye yul pug-o.

³ Yi koma-ge ap nayekluk nggweyerep nggwayerep mbosolat, ndobo lel kasola, ndobo ereba na-ge lele yuwa-t nde, kwiye yul pug-o.

⁴ Mbal Pem Nagawan mondok kek tak iri na woraso uwi siri iri na-ge yi inggi sid mborosolat amburu rak pusu-o.

⁵ Nde, Mbal Pem Nagawan-e iri me worasu me, o siri iri-ge lak ma bug-o. O kil posola-ge, at-nen yongga wuruwa-o.

⁶ Mbal Pem Nagawan ene o nggu nggal yosolat, o yu-ge yigisa ndamera nggururak pusu-o. Yi ap ndi ap oboksa-nen enne lek kagolat, nggweyakma nagawan-nen tenagidnak wi ereba na nari wari mbosolat yusu-o.

⁷ Nagawan Indo amawi worak iri na-ge nit ninmin worasu-o. Yakup Embal Pem Nagawan-e nggetlel nunpuruk worasu-o.

⁸ Nagawan Indo-nen kwaroso mende nggweyakma yu me kwiye worak kwarusu yeba kabok-nen lobok yer-o.

⁹ At-nen-e yi wi ndi wi wim mbatli oboksa lak tak pusu-o. Yalawi min san min yigisa keya bosolat, ndumno ereba na-ge kan posolat kwarusu-o.

¹⁰ Iri yosolat-nen yosolar-e: ”Kenaru mer-o. An-e Mbal Pem Nagawan-nen yusu-o. Wim nggwili ereba-ge keya ber-o. An-e yi nap ndi nap enlem oboksa ennggendumu mondok kek tak-nen yusu-o. Yi wi ndi wi oboksa-nen mondok kek tag-e an narig-et nak-nen yusu-o” luk yij-o.

¹¹ Nagawan Indo Mondok Amawi Worak iri na-ge nit ninmin worasu-o. Yakup Embal Pem Nagawan-e nggetlel nunpuruk worasu-o.