NDAWI ENGGA 42 - Nanduk Ngget Tul Pidnak Wene

Buku 2: Ndawi 42-72 Mbo ibidnak sa woralat tepan yidnak wene Ndawi imid yoso nap amanggim enlem Kora nap mul undugwi ndawi.

¹ Mbal Pem Nagawan wa-e. Urusa wam-nen yi ene worak mboroso norak indi eberek yusu iri na nggal an-e kat nere-nen nindi eberek yusu-o.

² An-e Mbal Pem Nagawan uruk nak woraso iri na nere-nen nindi eberek yusu yu-ge mepme-nen at ama mbirimindik, erembel wanimin-o?

³ An-e kubu-nen lengge-nen yip nak tenak woralat, nunggwi mende nggal-e yip nak nok tenak worasu-o. Pempa an nuwim nap-nen kin wok nobogolar-e: ”Kembal Pem Nagawan-e ngge me worasu-o?” luk yak nererenak worali-o.

⁴ An-e nanduk woralat, ap kwarat inmin Mbal Pem Nagawan erembel wanurak at ama mborogolat, an-e nandug-et anggul tak puruk mborosola, Mbal Pem Nagawan erembel wil wil nenalen-nen ndawi bem mburugwi ereba na nindi yebet karug-e, nindi puru kwarat yusu-o.

⁵ An-e noluk-nen nindi puru yosolat, yane wurusu-o? An-e Mbal Pem Nagawan ebem nak nindi wat tak puruk worasu-o. Iri kwarosolar-e, an-e tuguruk at erembel wanosolat, Nembal Pem Nagawan, nimiri yoso nap iri nak wa yak tosolat woramin-o.

^6-7 Mbo unpugwi sa yu me woralar-e, nindi-ge meya sa kala labuk yosolat worasu-o. Iri ala karuk, an nindi-ge Nagawan Indo yebet kasu-o. An-e inndi puru bera woragwi elem arem worasu-o. Nari wari rak onposo elem-nen yemen nubusu-ge Ndobo Eremon min Ndobo Misat min ereya bem-nen Yi Yareren mberak pil lobok yusu iri na nggal yemen nibil lobok yusu-o.

⁸ Nagawan Indo-nen enabuwa kaso elem lengge-net mirik nobosola, kubu-ge an-e ndawi yosolat, nuruk tak poso elem Mbal Pem Nagawan iri na eram tepan yosolat kwat tenak worayeg-o.

⁹ An-nen an nambigit yoso Nembal Pem Nagawan yak kurusu-o: ”Kar-e noluk an meme rak nubusu-o? Noluk-nen an nuwim nap-nen anggun panggun tak nobogola, an-e andi bandi kundugu kasolat worasu-o?”

¹⁰ Nuwim nap-nen nggweyel nobogolat-nen yogolar-e: ”Kembal Pem Nagawan-e ngge me worasu-o?” luk yak nererenak worali iri bem nindi abi kalok yosolat worasu-o.

¹¹ Noluk-nen an-e nindi abi kalok yosolat, yane wat tenak worasu-o? An-e Mbal Pem Nagawan ebem nindi mbung mbung tak woralat, an-e Nembal Pem Nagawan, nimiri yoso nap iri na wiwa-o yak tosolat woramin-o.