NDAWI ENGGA 40 - Nanduk Ngget Tul Pidnak Wene

Wiwa yak tosolat, nggi yosolat tepan yidnak wene Ndawi imid lit kaso nap amanggim Ndaut-nen ndawi ngaridnak.

¹ Nde, an-e mondok mamak puruk irit Nagawan Indo-nen yongga nururak yik karok worasola-ge, at-nen lombot nuburug-e, nene kulij-o.

² At-nen-e lak tak unpurak mbun arem-nen lesa nibil luwasolat, yi iminep kwaroso sa-nen lesa nibil luwagij-o. At-nen lit neyaga kerep ndobo bem nebamu, nuwog-e konat pusu-o.

³ At-nen-e ndawi ngget misik an-nen yurak ndawi mirik nobosolar-e, nit Nenmbal Pem Nagawan erembel wanurak ndawi irit mirik nibij-o. Ap kwarat-nen at yik karug-e, kwiye yuruk, Nagawan Indo ebem inndi wat tak puwa-o.

⁴ Nagawan Indo ebem inndi wat tak puruk woralat, kugwiwak erembel wanugwi buk nap min inndi-nen kek yugwi nap inmin ”Yongga nender-o” yugwi buk nap min-e enalen kagolat wolmag-o.

⁵ Nagawan Indo Nembal Pem Nagawan wa-e. Kat-nen-e kwarat kwat nonposo-o. Kat kimin ndak ndak wururag-e mondok lak-nen yusu-o. Kat-nen nit kwat nunpurak yusu-ge mondok wi yurak me, an-nen oboksa ndindururak na mondok meya-o.

⁶ Kar-e kamanggim wosa bidnak mende min kamanggim pidnak mende min-e kindingen tak poso bug-o. Kat kamanggim ebis-et kan purak min meya yidnak yumnduwakluk wosa purak min-e kat-nen-e nggi yoso bug-o. Alat nde, kat-nen-e kat kene kuluwakluk neyanggoru kuwarak pigen-o.

⁷ Kuwarak posola, an-nen yosolar-e: ”An-e yu-o. Engga ket mbet iri na arem-nen an nimin yosolar-e:

⁸ ’Mbal Pem Nagawan wa-e. Kat kindi-n pidnak kwarurak iri-ge an-e nindingen-o. Kat-nen idnak imiri mbarak pidnak wene-ge an narem pukmu-o’ luk mbarak worasu-o” yigi-o.

⁹ An-nen-e kilirak ndok worak ennggendumu enalen kudtak wene yak ondosolar-e, kat-nen ninmiri yoso wene yak indigi-o. Iri kwarosolar-e, an-e ndong yigit lak, mondok yak ondosolat woragi-o. Iri kwarigi oboksa-ge kar-e karu-o, Nagawan Indo wa-e.

¹⁰ Inmiri yurak wene iri na-ge an narik narem na-ge yemndak pigit lag-o. Kat-nen tugup lak yongga nenderenak woraso wene iri na-ge pempa an-e yak ondosolat woraso-o. Kat kilirak ndok worak ennggendumu-ge an nene lak woraso bug-o. Alat nde, kat-nen tugup lak nenabuwa kaso wene iri na-ge wigal tenak woraso-o.

¹¹ Nagawan Indo wa-e. Kar-e nabuwa kaso iri na-ge pok tak purak pug-o. Kat-nen tugup lak enabuwa kaso bem pempa nggetlel nuburuk wolmin-o.

Nggi yosolat tepan yidnak wene

¹² An-e lak tak onposo mende mondok kwarat, wonarurak puk-nen lop lop nerarik worasu-o. An-nen meya yoso ereba na-nen muk neyasola, an-nen yik kudtag-e meya-o. Nde, an meya yoso ereba wonarag-e an nanggulsu nggal-e lak, mondok terak minik kwarat me, an nindi engga nggwe mburusu-o.

¹³ Nagawan Indo wa-e. Kat-nen nimiri yi-o. Kat-nen ndag-et nak yongga niri-o!

¹⁴ An nururak yili nab-e mondok urugwe nggwe rak unpugunmu, inndi kabaksa mburuwag-o. Anggun panggun kaidnak pem nigid pogolat enalen kali nab-e innggiri yaga wirik inpi-o.

¹⁵ Ap an nda nitli nab-e wendet luk, innggiri yuwag-o.

¹⁶ Kat kek tak kibili nap oboksa-ge kijik kijak worogolat, enalen kujwag-o. Nde, kat-nen inmiri yoso iri na bem inndi kundik woragwi nap-nen yogolar-e: ”Nagawan Indo iri-ge ndemeret kek tak-nen yusu-o!” luk pempa yogolat wolmag-o.

¹⁷ An-e ndeyak, nisilobulo lag-et nde, Nagawan Indo kat-nen lombot nubusu-o. Kar-e yongga norosolat, an nimiri yosolat yoso-nen yusu-o. Nembal Pem Nagawan wa-e. An yongga nururak pem-e erog-et kwarusu meyog-o!