NDAWI ENGGA 37 - Nanduk Ngget Tul Pidnak Wene

Meya kwarugwi nap min konak kwarugwi nap min wolmomtak wene Ndaut-nen yidnak wene.

¹ Meya kwarugwi nap-nen kwaridnak pem ”O, iri kwarij-o” luk, kinndi kabak yurak pug-o. Ap-nen lugud tak kwaridnak pem kenlengen ale yurak pug-o.

² It iri-ge tusuangge nggal ndag-et nak lak ma-o. Tusuangge nggal terabet ma-o.

³ Kir-e kinndi-ge Nagawan Indo ebem wat tak puruk, konak nak kwarogolat wolmer-o. Kir-e o nggweyak iri na me woragolat, tugup lak irit wolmer-o.

⁴ It-nen kenalen pem wolmomtak elem-e Nagawan Indo eram kore yogolat wolmer-o. Kit kinndi-nen peragup mende-ge at-nen ndak tak kunpuwa-o.

⁵ Kit kenpe-ge Nagawan Indo eram nak kegera keya buruk wolmer-o. At ebem kinndi mbung mbung tak woragola-ge, at-nen yongga kunduwa-o.

⁶ At-nen-e kit-nen tugup lak woragwi-ge yaya nggal nam tak posolat, nde, kinndi-net mot mot kwarugwi-ge lengge nggal nam tak posolat kwaruwa-o.

⁷ Kir-e kinndi yamuk tak pem-et Nagawan Indo yik karok wolmer-o. Mamak puruk irit towarak worakmu, at-nen kwaruwag-o. It-nen kwarugwi bem ebe worak nak kwarogolat, enmberam lagolat kwarogola-ge, ”O” luk, kinndi kabak yurak pug-o.

⁸ Insilepma yugwi iri-nen-e lak tak onposo elem pil lobok yoso me, kinsilepma yogolat, kinndi ndururak pug-o.

⁹ Meya kwarugwi nab-e lak tak unpuwa-o. Alat nde, Nagawan Indo ebem inndi mbung mbung tak wolma nab-e o nggweyak iri-ge winde ma-o.

¹⁰ Meya yugwi nab-e ndag-et nak lak ma-o. Onkore yukmu-ge, ondoro-ret lak irit ma-o.

¹¹ Nde, inndi teberak nab-e o nggweyak iri winde ma-o. Winde luk woragolar-e, yi mende ndi mende bem ndak woralat enalen pem irit wolma-o.

¹² Meya yoso nap-nen-e konak nap iri na meya rak uburak pem wene mbarak puruk woralat, yik kasolar-e, isili min yik kaso-o.

¹³ Alat nde, Nagawan Indo-nen-e meya yugwi nap ereba na-ge lak tak unpurag-e komo panggorak ala karuk, Nagawan Indo-nen-e meya yugwi nap ereba na-ge nda wat onposolat worasu-o.

¹⁴ Meya yugwi nap ereba na-nen-e enarengge lak, anggun panggun woragwi ereba na min mot mot nak kwarogolat woragwi ereba na min undurak pem enkabo lit kagolat, ensan-e enambigit kunarak worali-o.

¹⁵ Alat nde, meya yugwi nap ereba na-ge ondomok enkabo bem kundugu onpogolat, ensan-e kalak puwa-o.

¹⁶ Meya yugwi nap-nen insilobulo kwarat wanili-t nde, lud tak kwaroso nap-nen insilobulo marig-et wanusu iri-ge mondok ija-net yusu-o.

¹⁷ Iri-ge meya yugwi nap-nen entabit amawi yugwi iri-ge Nagawan Indo-nen kalak puwa-o. Alat nde, konak nak kwarugwi nab-e nggetlel unpuruk wolma-o.

¹⁸ Nagawan Indo-nen-e ap at indi aye worak woragwi nab-e yik eneyarok woralat, mining angge it-nen winde yidnag-e pem irit it enarengge irit wolma-o.

¹⁹ Angin worak mende enpem lobok yuwa tarem-e ir-e andi bandi kujwa bug-o. Nogoro ennggendumu mbud ma tarem-e mondok ndak irit wolma-o.

²⁰ Alat nde, meya yugwi nab-e lak ma-o. Nagawan Indo uwim nab-e walma engen isi pidnak lak yoso nggal lak ma-o. It iri-ge kule nggal irit lak ma-o.

²¹ Meya yugwi nap-nen-e ap enarengge luru wanurug-e, tuguruk uwi yakwi bug-o. Alat nde, konak nap-nen-e inndi op pem-et we wok undugwi-o.

²² Nagawan Indo-nen imbiringgat tak unpusu nab-e o nggweyak iri winde ma-t nde, at-nen imbiri lamut tak unpusu nab-e iri me-nen sera wirik unpuwa-o.

²³ Nagawan Indo-nen-e lit kuruk at-nen mbururak urulabiyem-et ibil mburusu-o. Ap konag-et worala, ebem Nagawan Indo alen kaso nab-e mondok tugup lak tak poso-o.

²⁴ Ap iri-ge Nagawan Indo-nen inggi-ge tena worala me, at wosa mbuwa-t nde, tugurug-et men ma-o.

²⁵ An nusujwe woragi kuri yawo nindi worak kuri woralar-e, Nagawan Indo-nen-e lud tak nak kwarugwi nab-e wesera mbi keya onposola, eneyaso bug o. It inlirak-nen nggi nggi yogola mbi eneyaso bug-o.

²⁶ It-nen nde pempa uwi yagurak pem wok ondogolat, ereb-e we wok ondogolat yugwi-o. It inlirak-nen na inmbiringgat tak unpurak irit kwat yugwi-o.

²⁷ Meya kwarugwi iri-ge keya buruk, konak kwarugwi iri nak kwarurag-o. Iri kwarosola-ge, kat-nen wigarag-e o nggweyak iri na me-t pem irit wolma-o.

²⁸ Nagawan Indo-nen-e konak mot mot kwarugwi iri-ge mondok indi kundik me, ap tugup lak at-nen yidnak yidnak kwarugwi iri-ge we kasa ereba-t liringsa keya onposo bug-o. Ar-e pem irit nggetlel unpuruk irit woraso-o. Alat nde, meya yugwi nap-nen wigarag-e mondok lak tak unpuwa-o.

²⁹ Lud tak nak kwarugwi nab-e o nggweyak iri winde ma-o. Winde luk, pem irit ombo wolma-o.

³⁰ Konak nab-e wene-ge indi-nen lid puruk yosolat, wene wirik posolat na pempa mot mor-et yoso-o.

³¹ Embal Pem Nagawan-nen idnak imiri mbarak pidnak wene-ge at indi arem puruk woralar-e, imiri mbarak pidnak wene iri na keya buruk, lugud tak nggwe mboroso bug-o.

³² Meya yoso nap-nen-e konak nap iri na-ge tapsa yik kasolar-e, ”Nggesa-nen wirimin-o?” luk tu kore yoso-o.

³³ Alat nde, Nagawan Indo-nen-e konak nap iri na-ge kegera at uwim nap inggem keya boso bug-o. Iri-nen ebem wene mbarogolat-nen na angin worak ebem puwakluk keya boso bug-o.

³⁴ Nagawan Indo ebem nak kindi wat tak puruk woralat, at-nen kebem pidnak nak kwarosolat wolmin-o. Iri kwarosola-ge, o nggweyak iri winde yurak pem mendak kubuwa-o. Nde, meya yugwi nab-e lak tak onposola kagun-o.

³⁵ An-e ap meya yoso nap amawi worak indi kek tak mbi e mbi emengen uwi yaga yak yidnak tugup lak nggal irit kagi-o.

³⁶ Nde, an eram nggwe mbiriginggal-e, lak yij-o. Lak yosoloma, ogore yigi-t nde, mondok kagit lag-o.

³⁷ Konak nap, ondomok indi-net mot mot kwaroso nap iri na kwara lombot pi-o. Ap kona lambuk tak wolmomtak yebet kasu nab-e at-nen wigarak wolma-t nde,

³⁸ meya yugwi nab-e mondok lak tak onposolat, it-nen wigarak min-et lak tak unpuwa-o.

³⁹ Nagawan Indo-nen-e ap at indi aye worak woragwi nab-e anggun panggun enpem mbidnak tarem-e inmiri yosolat nggetlel unpuruk woraso-o.

⁴⁰ Nagawan Indo-nen it yongga ondosolat, inmiri yosolat kwaroso-o. It iri-ge at eram kura woragwi me, meya kwarugwi nap ininggem-nen mengga keya onposo-o.