NDAWI ENGGA 34 - Nanduk Ngget Tul Pidnak Wene

Nagawan Indo-nen konak kwat onposo bem at erembel wanidnak wene Ndaut na ebe-net nde, Abimelek imbiri bem ”Indi lag-o” luk yuwakluk indi lak lak kwarosola-ge, Abimelek-nen langgara wirik pid tarem Ndaut-nen yid ndawi.

¹ An-e pempa ”Nagawan Indo nak wiwa-o” luk yak tosolat woramin-o. Pempa kundugu at nak erembel wanosolat woramin-o.

² Nagawan Indo-nen kwarusu bem-e an-e at erembel wanusu-o. Nde, anggun panggun arem woragwi nab-e iri wene kuluruk, enalen kagolat wolmag-o.

³ An totno Nagawan Indo nak nggok tak puwog-o. At unu nak totno kek tak puwog-o.

⁴ An-nen Nagawan Indo eram tepan yosola, at-nen onggo yij-o. Onggo yosolar-e, an-nen kwiye kaso oboksa lak tak pij-o.

⁵ Anggun panggun arem woragolat enalen pem Nagawan Indo ebem inndi wat tak worali nab-e it innggiri rak purak mende mbi worasu-ge lag-o.

⁶ Ebe lak mende nggal yik eneyagwi nap ereba na-nen nde Nagawan Indo eram wene mbo bil lagola-ge, Nagawan Indo-nen kuluruk, enne erep nggarosolar-e, anggun panggun kagwi oboksa arem-nen wisirik onposo-o.

⁷ Nagawan Indo-nen idnak aid nab-e Nagawan Indo inndi aye worak ereba na yik eneyarok woralat, it lak tak unpurak elem arem-nen mengga keya onposo-o.

⁸ Nagawan Indo konak nak woraso iri-ge kondomok-nen kwara ker-o. Nagawan Indo eram kurak tak worali nab-e enalen kagolat wolmag-o.

⁹ Nagawan Indo aye worak woragwi nab-e yi mende ndi mende ukwe lak woragwi me, kit Nagawan Indo ilirak wa-e. Nagawan Indo nak kek tak pogolat wolmer-o.

¹⁰ Singa ndakngge ereba-ge naso mende lak me nere kaso-t nde, Nagawan Indo-nen yidnak yidnak kwatli nab-e yi mende ndi mende ukwe lak, ndak irit worali-o.

¹¹ Li marik marik wa-e. Nagawan Indo indi aye worak wolmomtak wene mirik kinpimin yu kwara koler-o.

¹² Kir-e kunluk mot pem-et woragolat, konak woragwi ereba na kenlengen-nen kagolat wolmomtag-e kindingen, lak?

¹³ Kit kenemndam nggwe-nen-e meya wene wirik pogolat, ap enmberam na lagolat yurak pug-o.

¹⁴ Meya kwarugwi iri keya buruk, konak nak kwarogolat wolmer-o. Lambuksa wolmomtak elem iri nak nggok tak pogolat wolmer-o.

¹⁵ Nagawan Indo-nen inndi at aye worak woragwi nap yebet eneyasolar-e, it-nen ”Yongga nindi-o” luk eram wene mbo bogola-ge, at-nen-e enne-t koloso-o.

¹⁶ Alat nde, meya kwarugwi nab-e isilepma onposo-o. It nde wat yogola-ge, ndag-et nak meme rak onposo-o.

¹⁷ Nagawan Indo inndi aye worak woragwi nap-nen at eram wene mbo bil lagola-ge, at-nen enne kuluruk, anggun panggun kagwi arem-nen inmiri yoso-o.

¹⁸ Nagawan Indo-ge ”Ngge kwarimin-o?” luk inndi kabak yidnak nap inmin-et woraso-o. Inndi engga nggwe mbiridnak nab-e at-nen-e inmiri yoso-o.

¹⁹ Konak kwarugwi nap enpem mboso andi bandi elem-e kwarar-et nde, Nagawan Indo-nen andi bandi ereba na oboksa arem-nen inmiri yoso-o.

²⁰ At ebe-ge Nagawan Indo-nen kwara yik karok worala, at owag-e misiger-o luk mbi mondok kalak pigit lag-o.

²¹ Meya kwarugwi nab-e it-nen meya kwarugwi bem-et wat ma-o. Nagawan Indo inndi aye worak woragwi nap insili rak pugwi nab-e onggo angin worak wanuwa-o.

²² Nagawan Indo-nen-e at ndegel ubugwi nap inmiri yuwa-o. Nde, at indipma lumurak worali nab-e angin worak enpem puwa bug-o.