NDAWI ENGGA 33 - Nanduk Ngget Tul Pidnak Wene

Mbal Pem Nagawan erembel wanurak ndawi

¹ Ndemeret yidnak yidnak kwarugwi nap wa-e. Nagawan Indo-nen kwaridnak mende bem kenalen-nen kenne lek ker-o. Mot mot kwarugwi nap-nen at erembel wanurak iri-ge mondok ndak-nen yusu-o.

² Kecapi poba bem Nagawan Indo wa yak togolat, ndawi yogolat ene rak pugwi mende ene rak pogolat erembel wanogolat ndawi yurag-o.

³ Ndawi ngget irit Nagawan Indo ebem ngarurag-o. Iri yogolar-e, kecapi poba ene mondok kwara ene rak pogolat kenalen pem ndawi nggu lek kudtag-o.

⁴ Nagawan Indo emndam-nen wirik pidnak wene-ge ndemerer-o luk yebet kudtag-o. At-nen kwaroso mende-ge oboksa tugup lak ndak ndak kwaroso-nen yusu-o.

⁵ Nagawan Indo na-ge lud tak nak kwarugwi nap min wene mot mot mbarugwi nap min enabuwa kaso-o. Nggweyak ma yu me-ge Nagawan Indo-nen ap unpud kaso iri-nen yebet tak pusu-o.

⁶ Nagawan Indo-nen-e ene nak-nen ”Kwat min-o” yidnak pem mbal ndak wosa labuk yosolat, molengen min waneya min wonaru min at ene nak-nen ndak wosa keya bamu-o.

⁷ Yi koma arem worasu yi ereba oboksa-ge Nagawan Indo-net yenggera misik me pamu-o. Yi koma iri-ge at-net wamid lesa ondoro misik me pamu-o.

⁸ Nggweyak yu ebem woragwi nap-nen-e Nagawan Indo nak aye kagolat wolmag-o. Nggweyakma nap oboksa-nen Nagawan Indo nak kek tak pogolat wolmag-o.

⁹ Iri kwarugwi iri-ge at ene nak-nen ”Iri nggal kwat mag-o” yidnak pem nak oboksa ndak wosa labuk yosolat, at-nen ”Iri nggal kwat min-o” yid pem nak oboksa ndak wosa labuk yil lobok yosolat kwarid iri bem-net kwarurag-o.

¹⁰ Ap enlem oboksa-nen ”Iri nggal-et kwaruwog-o” luk wene mbaridnag-e Nagawan Indo-nen yugwi rugwi rak poso-o. It inndi-nen yebet kaidnak mende-ge at-nen lak tak poso-o.

¹¹ Alat nde, Nagawan Indo-nen ”Irit kwarimin-o” luk yemndak pidnak iri-ge pem irit woraso-o. At indi arem-nen yemnak pidnak iri-ge tugup lak pem irit woralik nalik woraso-nen yusu-o.

¹² Ap enlem mbi-nen: ”Nagawan Indo iri-ge nit Nenmbal Pem Nagawan-nen yusu-o” luk yili nab-e enalen kagolat wolmag-o. At ondomok ilirak tak enpeyekluk len inpidnak nab-e mondok enalen kagolat wolmag-o.

¹³ Nagawan Indo-ge aid arem-nen mbel kil mbuwalar-e, nggweyakma nap oboksa eneyasu-o.

¹⁴ Nagawan Indo-ge at koreyak woraso sa-nen nggweyakma yu me worali nab-e kwara lombot onposolat worasu-o.

¹⁵ It inndi-ge at-net kwarak pamu-o. Iri rak pidnak pem-e it-nen kwatli-ge oboksa ar-e aru-nen yusu-o.

¹⁶ Nggweyakma nap nagawan-e at-nen idnak esan ombo kwarat ereba na bem-nen ombol nggwe yoso bug-o. San ombo-ge amawi kwarat iri na bem nak-nen ondomok agap ndagoso bug-o.

¹⁷ ”Kura wam ereba ebem-nen ombol nggwe yimin-o” luk indi-ge iri na bem wat tak puruk wolmomtag-e meya-o. Kura wam amawi kwarat iri-nen-e inmiri yoso bug-o.

¹⁸ Nagawan Indo-nen-e at indi aye worak woragwi nap, ”Nenabuwa-t yuwa-o” luk inndi ebem mbung mbung tak woragwi nab-et kwara yik eneyarok woraso-o.

¹⁹ It iri-ge wat yugwi inggiyapma-nen Nagawan Indo-nen inmiri yoso-o. At-nen nogoro bem unluk tak posolat woraso-o.

²⁰ Iri yoso me, nit-nen nde ”Yongga-t nunduwa-o” luk ninndi at ebem wat tak puruk woragola-ge, at iri-ge nit yongga nondosolat, ninmiri yosolat woraso-o.

²¹ Nir-e at ebem ala nenalin nenalen yogolat, at unu mondok marak iri na bem ninndi wat tak puruk worali-o.

²² Nagawan Indo wa-e. Nit-nen kat kebem ninndi wat tak puruk worali bem kat-nen pempa nenabuwa kasolat wolmin-o.