NDAWI ENGGA 32 - Nanduk Ngget Tul Pidnak Wene

Meya parak pogola, amberam tak poso wene Ndaut-nen mul ondosolat ngaridnak ndawi.

¹ At meya yidnak amberam tak posolat, at-nen lugud tak kwaridnak pem ”Meya kwarigi-o” yosola, ”Ereba mag-o” luk wene lak tak pidnak nab-e alen kasolat wolmag-o.

² Nagawan Indo-nen at meya yidnak wonaroso buk nap min ap enmberam laso buk nap min-e enalen kagolat wolmag-o.

³ An meya yidnak parigit lak woralar-e, pempa-nen ”Noluk kwarigi-o?” luk nindi marok tenak woralar-e, mondok namawi lak irit woragi-o.

⁴ Nagawan Indo wa-e. Kubu-nen lengge-nen angin worak nebem perenak woraigen-o. O kibi-nen tusuangge terabet tak poso nggal an namawi ndoro lak yij-o.

⁵ Iri ala karuk, an meya yidnag-e mbi kura bigit lak, oboksa kat kimbiri bem parigi-o. An-nen meya kwaroso mbi narem kura bigit lak yigi-o. An-nen-e: ”An meya yidnag-e Nagawan Indo eram pareyeg-er-o” luk parosola-ge, kat-nen-e an meya yidnag-e oboksa kamberam tak pigen-o.

⁶ Iri bem-e indi angin tubu yidnak nap enpem nde indi kabak tak poso mende mbosola-ge, tepan-et yurag-o. Iri yogola-ge, indi kabak tak onposo mende kwiye worak enpem mbuwa-t nde, iri-nen urugwe nggwe rak unpuwa bug-o.

⁷ Kar-e an kurak yoso nondoro-nen yusu-o. Kat-nen-e anggun panggun arem-nen nimiri yoso-o. Kat-nen an nimiri yidnak pem an-e mondok nalin nalen kwarat yusu-o.

⁸ Nagawan Indo-nen yosolar-e: ”An-nen-e kat-nen mbururak tula mirik kobosolat, an-nen nggomo korosolat-nen an nerengen-e kebem-et woramin-o.

⁹ Kar-e kura wam min kelerai wam min indi lak nde posid abare mbarak emndam pidnak iri na bem nak-nen ndumuluk mborogola, iri na-nen yidnak yidnak mburusu iri na nggal kindi nggat nggat lak wolmomtak pug-o” luk yij-o.

¹⁰ Meya kwarugwi nab-e andi bandi mende kwarat enpem mboso-o. Alat nde, Nagawan Indo ebem inndi mbung mbung tak woragwi nab-e Nagawan Indo-nen unpud kaso elem pem-nen nggetlel unpuruk woraso-o.

¹¹ Lud tak nak kwarugwi nap wa-e. Nagawan Indo-nen kwat kunpusu mende bem kenalin kenalen kagolat wolmer-o. Kondomok kinndi-net yidnak yidnak kwarugwi nap oboksa wa-e. Kenalen-nen kenne nggu lek kagolat wolmer-o!