NDAWI ENGGA 24 - Nanduk Ngget Tul Pidnak Wene

Nagawan abinal worak Ndaut-nen ngaridnak ndawi.

¹ O yu min ebem woraso mende oboksa min nggweyakma yu me min ebem woragwi min-e Nagawan Indo arengge-nen yusu-o.

² O yu mabin-e at-net yi koma urugwe nggwe posolat, yi koma yubuktak urugwe nggwe posolat kwaramu-o.

³ Ta nggal-nen abam Nagawan Indo ondobo bem lujwa-o? Ta nggal-nen abam at ama marak iri na me ngguwa-o?

⁴ Ap indi-nen na meya yebet kaso buk min ebe-nen na meya kwaroso buk nap min enesiget owak mbaroso buk nap min kugwiwak erembel wanoso buk nap min

⁵ iri kwaroso irit Nagawan Indo-nen imbiringgat tak obosolat, imiri yosolat yuwa-o. Iri kwaroso iri imin-e Mbal Pem Nagawan-nen-e: ”Meya kwaroso bug-o” luk yuwa-o.

⁶ Iri kwarugwi nab-et Mbal Pem Nagawan eram lobok yogolat, Yakup Embal Pem Nagawan erembel wanogolat yuwa-o.

⁷ Nagawan kek tak ngguwakluk pak tumende min obi-nen woraso tumende min ereba-ge nggoksa kuwarak per-o.

⁸ Nde, Nagawan kek tak iri-ge ta-o? At iri-ge amawi worak Nagawan Indo-o. Nagawan amawi worak, pempa wim pem-e ombol nggwe nak yoso iri-net yusu-o.

⁹ Nagawan kek tak iri ngguwakluk, pak tumende min obi-nen woraso tumende min ereba-ge nggoksa kuwarak per-o.

¹⁰ Nagawan kek tak iri-ge ta-o? Nagawan Indo mondok amawi worak iri-ge Nagawan kek tak-net yusu-o.