NDAWI ENGGA 22 - Nanduk Ngget Tul Pidnak Wene

Anggun panggun arem woralat tepan yosolat, Nagawan Indo erembel wanidnak ndawi O nda nda urusa ndawi Ndaut-nen imid poso nap amanggim ngaridnak ndawi.

¹ Nembal Pem Nagawan wa-e. Nembal Pem Nagawan wa-e. Kar-e noluk keya nubusu-o? An-e kat keram wene mbo bil luwasu-t nde, kar-e nene kuligit lak yosolat an-e yongga nurusu bug-o.

² Nembal Pem Nagawan wa-e. An-e lengge kat keram nene pil wasu-t nde, kar-e onggo yigit lak nak worasu-o. An-e kubu kat keram tepan yidnag-et nde, nindi na yamuk yusu bug-o.

³ Alat nde, kar-e Nagawan mondok marak, Isarael nap-nen kerembel wanogolat woragwi-o.

⁴ Nit nonmborak-nen-e kat kebem nak inndi mbung tak woragwi-o. Inndi kat kebem mbung mbung tak puruk woragola-ge, kat-nen-e inmiri yigen-o.

⁵ It-nen kat keram enne pil luwagola-ge, kat-nen mengga keya inpigen-o. Nde, it-nen inndi kat kebem mbung mbung tak woragolar-e, ”Ngge kwarul-o?” luk unmud kagit lak irit woraiga-o.

⁶ Alat nde, an-e ab-e lag-o. An-e mari-nen yusu-o. Ap kwarat-nen enlengenma nggal tak nobogolat, nggweyel nobogolat kwatli-o.

⁷ Ap oboksa-nen an yik neyagolar-e, pesel nobogolat, enemnde abi-ge an nambigit nak pogolat, enanggul warok kali-o.

⁸ Iri kwarogolat, it-nen yogolar-e: ”At indi-ge Nagawan Indo ebem wat tak puruk woraso me, Nagawan Indo-nen imiri yuwag-o! Nagawan Indo-nen nde at indingen tak obosolar-e, wisirik ubuwag-o” luk yili-o.

⁹ Kat-nen niya arem-nen nibil wasolat, kat-nen an-e kona yamuksa-t niya abem nibigenma-o.

¹⁰ An-nen wolmomtag-e ndesa mbosolat ereba-net kat kinggem nak worasu-o. Nanduk an niya arem worala ereba-net kar-e an Nembal Pem Nagawan-ner-o.

¹¹ An lak tak nuburag-e komo panggo yusu-o. Nde, an yongga nururak nab-e lak me, kar-e an keya nuburak pug-o!

¹² Wim nab-e lembu wam kusi nggal oro kwarat an lop lop nitli-o. Lembu erengen kege Mbasan woraso nggal-nen an kambuk tak nibili-o.

¹³ Singa ndakngge-nen at naso mende nayekluk urumne ngol yosolat, lobonoso nggal it iri-ge an nok nuburak onndokwak perarak an neram lobok yili-o.

¹⁴ An namawi-ge yi kirilsa mboroso nggal lak yosolat, nowak il oboksa yorok yil lobok yosolat, an nindi-ge kolpo pagosolat yi kwat yusu iri na nggal kwat yosolat,

¹⁵ noronggolem-e abu le yosolat, nama-ge namanggaruk pem panggara labuk yusu-o. Nagawan Indo kat-nen-e ap lugwinik nggal mbo nak nubusu-o.

¹⁶ Meya kwarugwi nden eneyagwi nap-nen lop lop nitli-o. It iri-ge yengge kwarat nggal an kut norogolar-e, ninggi min nuwok min kundugu nibili-o.

¹⁷ An nowag-e oboksa an-e ndak wonarusu-o. Ir-e an yik neyarok woragolar-e, no mende kaidnak nggal enlengen kere kererak yik neyagolat worali-o.

¹⁸ Ir-e an nusum tembesa wanogolat, an nusum leyok sum wanurak pem engga mbarak (undi) ligik pogolat kwatli-o.

¹⁹ Nagawan Indo wa-e. Kar-e keya nuburuk erepma-ge wolmomtak pug-o. Kar-e an namawi rak poso me, ndag-et nak lobok yugundik, yongga niri-o.

²⁰ Yalawi anggat emndam-nen mengga keya nibi-o. Yengge yeba inggiyapma-nen nimiri yi-o.

²¹ An-e abu nebabok mondok lak yij-o. Lembu kusi anggul ambo emndam-nen mengga keya nobosolat, singa emndam-nen mengga keya nobosolat kwari-o.

²² Kat-nen kwaroso-ge an nenggamirak ndindera yak indimin-o. Kat kilirak ndok wiridnak ennggendumu-nen kat kerembel wanosolat woramin-o.

²³ Kit Nagawan Indo aye worak woragwi nap wa-e. At nak erembel waner-o. Kit Yakup-nen-e wigarak-nen-e at nak nggok tak per-o. Kit Isarael-nen wigarak oboksa-nen-e at eram nak tud yer-o.

²⁴ At-nen-e ap anggun panggun tak inpili nab-e ebe lak mende nggal-e yik eneyaso bug-o. It-nen anggun panggun kagwi iri na eneyak nggal yig-e eneyaso buk me, ar-e endam-nen nden karuk mboroso bug-o. Alat nde, it-nen nde ”Yongga nindi-o” luk at eram nggi yogola-ge, it enne-t koloso-o.

²⁵ Kat-nen kwarusu mende ereba bem-e kat kerembel wanurak kilirak ndok wiridnak ennggendumu-nen an-e kat kerembel wanimin-o. Kat kilirak, inndi kat kaye worak worali nap inmbiri bem-et an-nen ”Kamanggim pimin-o” luk urul yak kirigi iri na ndak ndag-et kwarimin-o.

²⁶ Enarengge lak nab-e kwarat nonggolat inmbit ma-o. Nagawan Indo eram lobok yuwa nap-nen-e at erembel wanuwa-o. Kir-e yamuksa pem irit woralik nalik irit wolmer-o!

²⁷ Ap enlem oboksa-nen Nagawan Indo yebet karug-e, nden karuk tuguruk at eram lobok yogolar-e, ap enne lombok oboksa-nen at eram yunggusa tud luk at nak erembel wanuwa-o.

²⁸ Amawi worag-e Nagawan Indo nak me, yi ap ndi ap oboksa tena unpuruk worasu-o.

²⁹ Ap nagawan ap yok nggog-e at eram nak entare nggwe yud tud mbuwa-o. Pem woragwi buk nggweyakma nap oboksa-nen tebeluk at nak kek tak ubuwa-o.

³⁰ Ap it inmbirik unluk wolma nap-nen-e Nagawan Indo at nak kek tak obogolat wolma-o. At owene-ge ap pem lud-nen wigarogolat wolma-o.

³¹ It-nen-e abok ndesa mbuwa nap ereba na yak ondogolar-e: ”Nagawan Indo-nen at ilirag-e inmiri yamu-o” luk yak unduwa-o.