NDAWI ENGGA 2 - Nanduk Ngget Tul Pidnak Wene

Mbal Pem Nagawan-nen linidnak nagawan

¹ Noluk-nen yi nap ndi nap enlem oboksa laga mbaga yili-o? Noluk ap enne lombok-nen we ebe lak wene ereba na ”Iri nggal kwarul-o” luk kwarurak wene mbatli-o?

² Nggweyakma yu me nagawan nagawan misik pem-et nak pugak yogolat, o tena woragwi enmawi worak ereba na-nen wene mbarogolar-e, Nagawan Indo min at-nen lenak pidnak nagawan min undurak wene mbarogolar-e:

³ ”It-nen tena nunpuruk worali iri-ge ininggem-nen wesera nit nenarig-et menluk wisirik wolmog-o!” luk yili-o.

⁴ It-nen yili iri-ge aid arem iri me nagawan woralar-e, iri me-nen nda ondosolat, nggweyel onposolat worasu-o.

⁵ Iri yosolar-e, isilepma min inil worosolat, isilepma bem wendet tak unpusu-o.

⁶ Iri yosolat-nen yak ondosolar-e: ”Nondobo Sion marak iri na bem-nen an-nen idnak nagawan irit mendak pigi-o” luk yak undusu-o.

⁷ Nagawan-nen yosolar-e: ”Nagawan Indo-nen ’Irit kwaruwa-o’ luk yidnak wene-ge an-nen yimin-o. At-nen an yak norosolar-e: ’Kar-e an Nambara-o. Yawo-net kat keid kwat yusu-o.

⁸ Nggi yi-o. Ap enlem oboksa an-nen kegera kinggem pimin-o. O yu oboksa an-nen kat karengge rak pimin-o.

⁹ Kat-nen-e it iri-ge posid wangun pem tenggerak unpugun-o. Kat-nen-e nggweyak yimbe nggal ndamera keya unpugun-o’ luk yak nirij-o” luk yij-o.

¹⁰ Iri bem-e, nagawan nagawan wa-e. Kit-nen kwarogolar-e, kwara yebet karuk-net kwarogolat wolmer-o. O tena woragwi kenmawi worak nap wa-e. Kwara yebet ker-o.

¹¹ Kwiye min-et Nagawan Indo nak kek tak eber-o.

¹² Nagawan Indo isilepma-ge mimo yoso me, Nagawan Indo isilepma yosolat ereya na-net lak tak kunpuwa naru, kwiye min-et Nagawan Indo eram tebe yer-o. Nde, Nagawan Indo indipma worali nab-e mondok enalen kagolat wolmag-o.