NDAWI ENGGA 19 - Nanduk Ngget Tul Pidnak Wene

Nagawan Indo-nen kek tak woraso-ge ndak worak pidnak mende bem min imiri mbarak pidnak wene bem min-nen kali wene Nagawan Indo-nen kek tak woraso-ge ndak worak pidnak mende bem-nen kali wene 19:1-6 Ndawi imid lit kagwi nap enmanggim Ndaut-nen ngaridnak ndawi.

¹ Mbal-nen-e Mbal Pem Nagawan kek tak woraso nam tak pusu-o. Nde, o yu pilang yaga nenasa keya bid yu-nen-e at-nen kwaroso obok wigarusu-o.

² At-nen kek tak woraso obog-e o yawo nda yidnak nggal-nen-e kup nda yuwa iri na yak tosolat, kubu misik-nen na imbirik kubu yuwa iri na yak toso-o.

³ Iri kwarosolar-e, enne bem wirik pugwi na lak, enne yogola na kulugwi bug-et nde,

⁴ enne anggungga-ge yi wi ndi wi lung yusu-o. It-nen yidnak wene-ge o kuri nggweyak kuri wok yij-o. Nagawan Indo-nen-e molengen amanggim o-ge mbal pem iri me wirij-o.

⁵ Kubu kabu molengen wasolar-e, kwe wanurak nap-nen nene yoso sa-nen waso nggal, pong kaso nap-nen pong kudtak pem lid lud tak puruk woraso nggal irit waso-o.

⁶ Molengen iri-ge mbal erep yoboksa-nen pil waruk, mburu, mburu, mbal erep yoboksa ponok nggwe mboso-o. Mo eyak inggiyapma-nen misiget mbi kurak yoso bug-o.

Nagawan Indo-nen kek tak woraso-ge imiri mbarak pidnak wene bem-nen kali wene 19:7-14

⁷ Nagawan Indo-nen idnak imiri mbarak pidnak wene iri-ge inndi uruk tak poso iminep mbarak-nen yusu-o. Nagawan Indo-nen ”Irit kwarurag-o” yidnak wene iri-ge ndemerer-o luk ebem inndi wat tak pugwi-nen yusu-o. Inndi lak ala, inndi nggat nggat worak tak poso-nen yusu-o.

⁸ Nagawan Indo indi-n pidnak wene iri-ge ndemeret ap inndi alen tak poso-nen yusu-o. Nagawan Indo-nen ”Irit kwarurag-o” luk pidnak wene iri-ge inndi ngarak posola, nam-et yenggerak poso-nen yusu-o.

⁹ Nagawan Indo erembel wanogolat wolmomtak iri-ge pem irit kwat tenak wolmomtak konak-nen yusu-o. Nagawan Indo-nen yidnak wene iri-ge oboksa ndemeret mot mot-nen yusu-o.

¹⁰ Ndemeret emas iminep mbarak iri-ge nggok tak pugwi-t nde Nagawan Indo-nen idnak imiri mbarak pidnak wene iri-ge mondok terak minik ija lombok-nen yusu-o. Tamuk amburu mondok konak iri na undu konag-et nde, Nagawan Indo-nen idnak imiri mbarak pidnak wene undu-ge mondok terak minik konak-nen yusu-o.

¹¹ Ndegel koboso nap an-e kat-nen yidnak wene ereba oboksa-nen mul nurusu-o. Ereba oboksa-nen yidnak yidnak kwarugwi nap enmanggim-e onggo abu lid lud tak pidnak worasu-o.

¹² Ap-nen-e it-nen meya kwatli ereba na-ge kwara kali-ge bug-o. An-nen meya kwarigi-t nde, yebet kagit lak worasu-ge kat-nen lak tak puruk, marak nibi-o.

¹³ Inndi-nen yebet karuk, meya kwarugwi mende iri an nebem wolma naru, kat-nen lak tak pi-o. Meya elem iri-nen an tena nuburuk wolma naru, nimiri yurag-o. Iri ala, an-e iminep mbara labuk yosolat, meya nggok kwarigit lak worayeg-o.

¹⁴ An-nen yoso wene min an-nen yebet kaso min-e kat kalen tak purak mende kwat mag-o. Nagawan Indo wa-e. Kar-e an nggetlel nobosolat, nonggo boso-nen yusu-o!