NDAWI ENGGA 16 - Nanduk Ngget Tul Pidnak Wene

Mondok ndemeret Mbal Pem Nagawan ebem indi wat tak puruk tepan yid wene Ndaut-nen ndawi ngaridnak wene.

¹ Mbal Pem Nagawan wa-e. An-e kat keram-et kurak yusu me, kat-nen kwara yik neyarok wolmin-o.

² ”Kar-e an-nen idnak Nagawan Indo nalen tak poso-nen yusu-o. Kat kombol pem terak minik misik mbi worasu bug-o” luk an-nen-e yak kurusu-o.

³ Ap marak o yu me worali-ge an-e kek tak unpusu-o. An-e it inmin lambuksa wolmomtak irit nindingen perasu-o.

⁴ Kugwiwak erembel wanili nab-e pempa kwarat inndi abi kalok yogolat wolmag-o. An-e kugwiwak amanggim wam wosa kan posolat wolmomtag-e mondok nisili-o. Unu yurak tet mondok nisili-o.

⁵ Nagawan Indo wa-e. An narengge-ge kat nag-o. An-nen wolmomtak iri-ge kat kinggem nak worasu-o.

⁶ Kat-nen wok noroso mende-ge mondok konak lombok, an nindi alen tak pusu-o!

⁷ An-e nggomo noroso Nagawan Indo nak erembel wanusu-o. Kubu nggwe min-et an nindi-nen-e nggomo nurusu-o.

⁸ An-e pempa Nagawan Indo ebem nindi mbung mbung tak worasu-o. Ar-e an neram worala karuk, an-e tugup lak woramin-o.

⁹ Iri bem-e, nindi alen kasolat, nalen-nen nene nggok yosolat, nebe na yamuksa kona worasu-o.

¹⁰ An wat makluk keya noboso buk me, kat-nen enabuwa kaso nab-e lak makluk keya onposo bug-o.

¹¹ Kat-nen unluk woragwi sa tula mirik nubugun-o. Kat nak-nen enalen elem kobong tak nobosolat, pem-et enalen pem woragwi elem wok nurusu-o.