NDAWI ENGGA 148 - Nanduk Ngget Tul Pidnak Wene

Kit mbal min nggweyak min-e Nagawan Indo nak erembel waner-o!

¹ Nagawan Indo nak erembel wanurag-o! Aid arem woragwi wa-e. Nagawan Indo nak erembel waner-o! Teram kek tak eid me woragwi oboksa wa-e. At nak erembel waner-o!

² At-nen idnak aid nap oboksa wa-e. at nak erembel waner-o! Aid arem woragwi san ombo oboksa wa-e. At nak erembel waner-o!

³ Mo min waneya min wa-e. At nak erembel waner-o! Wonaru abinal worak wa-e. At nak erembel waner-o!

⁴ Mbal mondok kek tak teram eid wa-e. At nak erembel wani-o! Mbal ombol pem worasu yi wa-e. At nak erembel wani-o!

⁵ Ereba oboksa-ge at ene nak-nen yidnak pem ndak wat yidnak me, ereba oboksa-nen Nagawan Indo unu nak kek tak puwag-o!

⁶ Ereba woraso ondoro ereba-ge at-nen ondoro lombok pil lobok yamu-o. Nde, pil lobok yid ereba na-ge pem irit ondolma lombok wolmakluk pamu-o.

⁷ Nggweyakma yu bem woraso wa-e. Nagawan Indo nak erembel waner-o! Yi koma arem woraso nanggu min yi koma yubuktak oboksa min wa-e. At nak erembel waner-o!

⁸ Pinel min talme engen min pyry min nggan nggan min Nagawan Indo-nen yidnak pem o wija amawi worak puk kaso min wa-e. At nak erembel waner-o!

⁹ Ndobo marik min nggok min e engen yoso min wal oboksa min

¹⁰ inggi ijok empat worak parugu woragwi min erengen kege min nggweyak nggwe lok lok noso min towe pubu noso min oboksa wa-e. At nak erembel waner-o!

¹¹ Nagawan nagawan min ap enlem oboksa min nagawan-nen wigarak min o tena woragwi nap oboksa min

¹² sujwe min ndugum min inndi worak min li marik min wa-e. At nak erembel waner-o.

¹³ It oboksa-nen Nagawan Indo unu nak kek tak pogolat wolmag-o. Ap unnu oboksa teberak puruk, at unu nak mondok terak minik kek tak me, at anggu obog-e mbal min nggweyak min ombol nggwe-t lasu-o.

¹⁴ At-nen-e at ilirak amawi wok ondosola, at ilirak indi kundik Isarael nap-nen-e at nak erembel wok tenak worali-o. Nagawan Indo nak erembel wanurag-o!