NDAWI ENGGA 146 - Nanduk Ngget Tul Pidnak Wene

Imiri yoso nap Mbal Pem Nagawan erembel wanugwi ndawi

¹ Nagawan Indo nak erembel wanurag-o! Nindi wa-e. Nagawan Indo nak erembel wani-o!

² An nuruk woralar-e, Nagawan Indo nak erembel wanosolat, an woralar-e, Nembal Pem Nagawan nak ebem ndawi ngarosolat woramin-o.

³ Nggweyakma nap nagawan-nen-e kinmiri yurak meya me, nagawan ereba na enpem kinndi wat tak puruk wolmomtak pug-o.

⁴ It wat yogolar-e, tuguruk nggweyak kwat ma-o. Wat yogolar-e, it-nen kwarurak yemnak pidnak oboksa ereba na min-et lak ma-nen yusu-o.

⁵ ”An yongga noroso-nen yusu-o” luk Yakup Embal Pem Nagawan iri na winde luk woralat, Nagawan Indo at Embal Pem Nagawan ebem indi wat tak puruk worasu nab-e mondok alen kasolat wolmag-o.

⁶ Nagawan Indo-net mbal min nggweyak min yi koma min ebem woraso mende oboksa min ndak worak pamu-o. At iri-ge at-nen urul pidnak ereba na pempa tugup lak ndak ndak kwat onposolat woraso-o.

⁷ At iri-ge anggun panggun tak inpili nap enambigit yosolat, enmanggim wene mot mot mbenaroso-nen yusu-o. Nere arem woragwi nab-e nunggwi mende mak ondoso-nen yusu-o.

⁸ Enlengen ngguru woragwi nab-e enlengen kuwara keya bosola, kona yik kagwi rak onposolat, wosa mbidnak nab-e at-nen mendak onposolat, mot mot woragwi nab-e enabuwa kasolat kwaroso-nen yusu-o.

⁹ Nagawan Indo iri-ge ap sal nggetlel unpuruk woralat, kweyap togwe min li mul ineid iniya lak min-e yongga ondosolar-et nde, meya yugwi nap-nen kwarurak yemndak pidnak ereba na-ge yugwi rugwi rak poso-nen yusu-o.

¹⁰ Nagawan Indo iri-ge pem-et woralik nalik yoso Nagawan-nen yusu-o. Sion wa-e. Kembal Pem Nagawan iri-ge o tena worasolat mondok pem irit yi olengen ndi olengen lak yoso-nen yusu-o. Nagawan Indo nak erembel wanurag-o!