NDAWI ENGGA 145 - Nanduk Ngget Tul Pidnak Wene

Nagawan Indo erembel wanosolat yidnak ndawi Ndaut-nen Nagawan Indo erembel wanidnak ndawi.

¹ Nembal Pem Nagawan min an-nen idnak nagawan min wa-e. An-e kat nak kek tak kobosolat, kat nak kerembel wanosolat pem irit woramin-o.

² An-e pempa kat nak wiwa-o yak korosolat, kat nak kerembel wanosolat pem irit woramin-o.

³ Nagawan Indo-ge nggok mondok kek tak me, at-nen kek tak woraso-ge ap-nen irit wururag-e meya-o.

⁴ Ap pem lud pem irit woragolat kat-nen kwat onposo bem kerembel wanogolat, kat-nen kamawi kwiye worak pem-nen kwaroso wene-ge wigal tenak wolma-o.

⁵ It-nen-e kat-nen kek tak woraso wene min kabinal pem woraso wene min-e ap yak ondogolat wolma-o. Kat-nen kwiye worak kwaroso ereba na-ge an-nen kwara yebet kasolat woramin-o.

⁶ It-nen-e kat kamawi bem-nen kagwi buk mende kwaroso wene-ge wigarogolat wolma-o. Kat-nen kek tak woraso wene-ge an-nen naru karu rak posolat woramin-o.

⁷ Ap-nen-e kat-nen konak kwat onposo wene-ge ndindera ap yak ondogolat, kat-nen mot mot kwaroso wene-ge ndawi bem tak puruk yogolat wolma-o.

⁸ Nagawan Indo iri-ge enabuwa yosolat, unpud kasolat, isilepma na ndag-et nak yoso buk, pempa enabuwa kaso-nen yusu-o.

⁹ At iri-ge ap enariktak inmin-e indi konak nak yoso-nen yusu-o. At-nen ndak worak pidnak oboksa enabuwa yoso-nen yusu-o.

¹⁰ Nagawan Indo wa-e. Kat-nen ndak worak pigen oboksa-nen kat nak kerembel wanuwa-o. Kat kilirak oboksa-nen kat nak wiwa-o luk yak kuruwa-o.

¹¹ It-nen-e nagawan kat-nen o tena woraso kamawi iri nak kek tak puwa-o. Kat-nen kamawi worak woraso wene-ge ap yak unduwa-o.

¹² Iri yak unduwama, ap oboksa-nen enaru yogolar-e, kat-nen kwiye worak kwarat kwaroso ereba na min kat-nen tenagidnak wi kek tak abinal worak min ereba na-ge enaru ma-o.

¹³ Kat-nen nagawan o tena woragun iri-ge mondok pem irit o tena woragun-o. Kat-nen o tena worasolar-e, pem woralik nalik irit tena woragun-o. Nagawan Indo-ge at-nen urul pidnak oboksa-ge ndak ndak irit kwaroso-o. At-nen kwaroso mende bem-e enabuwa bem-et kwarosolat woraso-o.

¹⁴ Nagawan Indo-nen-e anggun panggun arem woragwi nab-e yongga ondosolat, teberak inpidnak nab-e mendak onposolat kwaroso-o.

¹⁵ Urugup worak mende oboksa-nen indi-ge kat kebem nak mbung mbung tak woragola, kat-nen-e it-nen ukwe peragwi mende mak ondoso-o.

¹⁶ It-nen ukwe yidnak mende-ge kat-nen ndak yaga wok ondosola, ir-e ukwe lak ndak irit worali-o.

¹⁷ Nagawan Indo-nen kwaroso mende oboksa bem-e mot mot nak kwarosolat, at-nen kwaroso mende oboksa bem na enabuwa bem-et kwaroso-o.

¹⁸ At iri-ge ap-nen at eram wene mbo bogolat, ndemeret inndi-net at ebem nggi yogolat kwatli nap endam woraso-o.

¹⁹ At-nen-e at indi aye worak worali nap inndi alen tak onposolat, at-nen it enne mbo bil laidnak kuluruk, inmiri yosolat kwaroso-o.

²⁰ At-nen-e at abuwa kagwi nab-e kura unpuwa-t nde, meya yugwi nab-e lak tak unpuwa-o.

²¹ An-e pempa Nagawan Indo nak erembel wanosolat woramin-o. at-nen ndak worak pidnak mende oboksa-nen Nagawan Indo nak erembel wanogolat pem irit wolmag-o.