NDAWI ENGGA 142 - Nanduk Ngget Tul Pidnak Wene

Yongga wuruwakluk tepan yidnak ndawi Kerep yanggoma woralat, Ndaut-nen mul ondosolat ngaridnak ndawi.

¹ Nene nggoksa-t Nagawan Indo eram nene pil lasu-o. ”Yongga niri-o” luk emengen mbarusu-o.

² ”Ngge kwarimin-o?” luk nindi kabak yosolat at eram wene wirik pusu-o. An-nen anggun woraso mende oboksa-ge at aru rak pusu-o.

³ An nindi kabak yidnak tarem-e an-nen kwarurak kar-e karu-o. An nurulabiyem an nimin sirid nap-nen-e mbik mbok nak an nabuwok sabu logo bili-o.

⁴ An-nen neram lombot posoma-ge, yongga nururak nap na lak, nimiri yurak nap na lak, an inndingen tak nubugwi nap mbi mondok lak eneyasu-o.

⁵ Nagawan Indo wa-e. An-e kat keram wene mbo bil luwasu-o. Kar-e an kurak yoso nondoro-nen yusu-o. An worasolar-e, nindi kundig-e kat nag-o.

⁶ An-e kwarat andi bandi kasu me, an nene kwara kuli-o. An nuwim nab-e enmawi kwarat me, nuruwa naru nimiri yi-o.

⁷ An-e o kubu me-nen wisirik nubugunmu, kat-nen konak nak kwat noboso iri bem-e kat kilirak ndok worak ennggendumu-nen kat kerembel wanimin-o.