NDAWI ENGGA 139 - Nanduk Ngget Tul Pidnak Wene

Mbal Pem Nagawan-e mondok oboksa aru, iri-nen oboksa at inggem nak worasu-o Ndawi imid lit kaso nap amanggim Ndaut-nen ngaridnak ndawi.

¹ Nagawan Indo wa-e. Kar-e an-e neba arem min lombonosolat, an-nen woraso oboksa kar-e karu-o.

² An-nen kwaroso oboksa-ge kar-e karu-o. Kebe-ge erepma-net nde, an-nen yebet kaso oboksa-ge kar-e karu-o.

³ Kar-e an-nen yabu wanusu na, an-nen nebabok kwarusu na oboksa neyasu-o. An-nen kwaroso oboksa kar-e mondok karu-nen yusu-o.

⁴ An-nen wene yigit lak ma-t nde, an-nen wene yurak iri-ge abuwokma-net kar-e karu-o.

⁵ Kat-nen nimiri yosolar-e, lop lop nirigendik worasu-o. Kat kamawi bem nggetlel nuburuk worasu-o.

⁶ Kat-nen karu yidnak iri-ge mondok arem-et me, an-nen yebet kudtag-e meya-o. An-nen yebet kaso bem-nen yik kudtag-e meya-o.

⁷ Kat kindi aye-ge an-e ngge me nggal mbirimin-o? Kat kerengen aye-ge an-e ngge me nggal kwiye mbirimin-o?

⁸ An-e mbal pem lamin na, kar-e iri me-t worasur-o. An-e ap wat luk ndok wurugwi sa nene yimin na, iri me na kar-e worasur-o.

⁹ An-e o kil poso sa mbirimin na, mo mboso nggwe nggweyak yoboksa erepma ereba mbirimindik woramin na,

¹⁰ iri me-nen na kat-nen-e yongga-t norosolat, kinggi-nen ndemel nuburuk nosolat kwarugun-o.

¹¹ An-nen ndamuk yak tosolat nde: ”Ndamuk tak nibi-o” luk nggi yak tosola-ge, yaya bem woramin na-ge kubu yuwakluk yak tosola-ge,

¹² ndamuk iri na-ge kat kambigir-e ndamuk wolma bug-o. Alat nde, kubu iri na-ge lengge nggal ma-o. Nde, ndamuk iri na-ge yaya nggal ma-o.

¹³ An nebe yu oboksa kat-net ndak worak nibigenma-o. Kat-net an-e niya arem-net kwarak nibigenma-o.

¹⁴ Kat-nen an-e mondok kwiye worag-et kwat nibigen pem kat nak kerembel wanusu-o. Kat-nen kwaroso-ge mondok kwiye worak wi yurak irit kwaroso-nen yusu-o. An-e mondok ndemerer-o luk perasu-o.

¹⁵ Kat-nen an niya arem-nen an nowak ndak wosa posolar-e, kwara pik paksa konda pil lobok yigen-o. An niya arem-nen kuraga la kwat yosola ereba-net kat kerengen pem-e nam kaigen-o.

¹⁶ Kat-nen-e an-e nggeret niya arem kwat yosola, ereba-nen neyaigenma-o. Oboksa kat kengga bem mbarak worasu-o. An wolmomtak tarem-e nda yoso-ge misiget ter-o luk keya bigit lak, abuwokma-net kat-nen ludtak pigenma-o.

¹⁷ Mbal Pem Nagawan wa-e. Kat-nen yebet kaso-ge an nambigir-e mondok angin worak-nen yusu-o. Kat-nen yebet kaso-ge mondok wonarurak puk-nen yusu-o.

¹⁸ Ereba nde an-nen wonarosoma-ge, mondok sisiri nggal wonarurak pug-et kasu-o. An kuplila men yosolar-e, an nindi-ge kat kebem mburuk tenak irit worasu-o.

¹⁹ Mbal Pem Nagawan wa-e. Meya kwarugwi nab-e kat-nen mondok unduruk lak tak inpi-o. Ap eneyabi kagwi nab-e an neram lobok yuwa naru mondok inggi mbara wirik inpi-o.

²⁰ It-nen kat kimin meya wene yogolat, ir-e ennesiget kat kunu luk owak mbarogolat yili-o.

²¹ Nagawan Indo wa-e. Kat insili rak kibili nab-e an-nen na nisili rag-et unpusu-o. Kat kimin eyak witli nap inmin-e an-e mondok nisili eneyasu-o.

²² It iri-ge mondok nisili rak unpuruk, an nuwim nap nggal-et yik eneyasu-o.

²³ Mbal Pem Nagawan wa-e. Kwara mbenat nobosolat, nindi kwara karu yosolat wolmin-o. Kwara nindi ngarosolat, an-nen yebet kaso karu yosolat wolmin-o.

²⁴ An narem-e meya mbi worasu, lak? Kwara ki-o. Lit nuburuk pem wolmomtak tula nggwe-t nimin mbiri-o.