NDAWI ENGGA 138 - Nanduk Ngget Tul Pidnak Wene

Nagawan Indo wiwa-o yosolat tepan yidnak wene Ndaut-nen ngaridnak ndawi.

¹ Nagawan Indo wa-e. An-e nindi misiget tak puruk, kat nak wiwa-o luk yak kurusu-o. Nin mbal pem nagawan ereba na imbiri bem-et kat nak kerembel wanosolat ndawi yusu-o.

² Kar-e tugup lak pempa nenabuwa kaso me, an nanggul-e kat kuwi ambigit ndimirik puruk, tud luk, kat kunu kek tak pusu-o. Kat-nen-e ap-nen yebet keyali iri-ge marik tak puruk, kat-nen kwat unpurak urul yak indidnak wene-ge kar-e mondok nggok tak poso-o.

³ An-nen kat keram wene pil luwasola-ge, kat-nen nene erep nggarosolat, kat-nen nindi uwi yabosola, an-e kwiye kaso bug-o.

⁴ Nagawan Indo wa-e. Nggweyakma yu me nagawan oboksa-nen urul pigen wene ereba na kulidnak me, kat nak kerembel wanuwa-o.

⁵ It-nen-e kat-nen kwiye worak kwaroso min kat-nen mondok kek tak woraso min-e ndawi bem tak puruk yuwa-o.

⁶ Kar-e mondok kek tak-net nde, ap mondok ebe lak no mende nggal-e kwara yebet eneyasu-o. Ap inndi kek yugwi nab-e kat kerengen pem-e kurak yuwa bug-o.

⁷ Anggun panggun nebem mbidnak tarem-e kat-nen an tena nuburuk worasu-o. An nuwim nap-nen an nebem mbud yogola-ge, kat-nen inmin wim mbarosolat, kamawi bem-nen nimiri yusu-o.

⁸ Kat-nen ”Irit kwat kibimin-o” luk urul yak nirigen iri na ndak ndag-et kwat nibi-o. Nagawan Indo wa-e. Kat-nen-e enabuwa kaso-ge pem irit kundugu woraso-o. Kat-nen kilirak kwat onposo iri na-ge pok tak purak pug-o.