NDAWI ENGGA 137 - Nanduk Ngget Tul Pidnak Wene

Mbabel-nen yi ereba na eyak pem woragolat-nen yip tidnak wene

¹ Mbabel-nen yi ereba na eyak pem nit koreyak woragolar-e, o Sion ninndi yebet karug-e, yip tige-o.

² O iri me woraso e nggandarusa ereba na bem-e nit nonpoba ndawi yugwi kecapi ereba na-ge e ereba na bem tiong tak pil lobok yige-o.

³ Nit kamat nunpuruk mbiridnak nap-nen-e: ”Nit nenmanggim ndawi yer-o” yak nondogolat, nit yemndak nunpuruk woragwi nap-nen-e: ”Nit ninndi alen tak pogolat ndawi yer-o” yurug-e, ”Sion iri me-nen yugwi ndawi-ge nenmanggim yer-o” yak nindiga-o.

⁴ Nit ap unuwi nggweyak pem woragolat-nen Nagawan Indo erembel wanugwi ndawi yurag-e ndag-er-a?

⁵ Yerusalem wa-e. An-nen nde kat meme rak kobosolar-e, ninggi kigit nggwe-nen poba ene rak pigit lak worayeg-o.

⁶ An-nen nde kat meme rak kobosolat, iri-nen an-nen nalen kaso elem kwarak kibigit lak yosolar-e, an-nen ndawi yoso iri na-ge yurak meya irit kwat mag-o.

⁷ Nagawan Indo wa-e. Erom nap-nen Yerusalem lak tak pogolat-nen kwariga ereba na-ge kindi yebet yebet tak wolmin-o. It-nen yogolar-e: ”O siri iri-ge tud tak pogolat, mondok nggweyak min mbereksa lak tak per-o” luk yiga iri na yeberak wolmin-o.

⁸ Mbabel wa-e. Kar-e mondok lak tak kubuwa-o! Kat-nen nit lel mberel ninpidnak pem kemnggo kwat kubuwa nab-e mondok enalen kujwag-o.

⁹ Kat kilirak nggisiya wanuruk, kerep pem nggwin iniyujwa nab-e enalen kujwag-o.