NDAWI ENGGA 135 - Nanduk Ngget Tul Pidnak Wene

Nagawan Indo erembel wanugwi ndawi

^1-2 Nagawan Indo nak erembel wanurag-o! Nit Nenmbal Pem Nagawan woraso sa Nagawan Indo ama-nen at eyabu wanugwi nap wa-e. Nagawan Indo unu nak kek tak per-o.

³ Nagawan Indo iri-ge konak me, at nak erembel waner-o. Ar-e ap enabuwa kaso me, at unu nak kek tak per-o.

⁴ At-nen-e Yakub-e ondomok amanggim-et lenamu-o. Isarael nab-e at ondomok arengge rak enpamu-o.

⁵ Ndemeret Nagawan Indo mondok nggok iri-ge an-e naru-o. At iri-ge mondok kugwiwak oboksa teberak puruk, kek tak terak minik-net yusu-o.

⁶ At-nen-e mbal pem-nen na, nggweyakma-nen na, yi koma bem-nen na, yi koma nggok ma yubuk tak na enggendumu-nen na ereba me-nen-e at ondomok indi peraruk-nen kwaroso-o.

⁷ Iri kwarosolar-e, at-nen-e nggweyak erep yobok tak ma ereba-net nggan nggan pil lobok yosolat, talme mburak amanggim obinel ndak worak posolat, at-nen-e o wija na at ndok wosa ibidnak sa-nen mborosolat wolmin-o yak tosolat irit kwaroso-o.

⁸ O Mesira-nen-e liap manggiya nderak min wam nandug-et nderak min ereba na-ge at-nen oboksa endamu-o.

⁹ Mesira-nen-e at-nen-e Nagawan Piraon min at eyabu wanugwi nap ereba na min angin worak enpem posolar-e, wi yurak kwiye worak irit kwaramu-o.

¹⁰ At-nen-e ap enlem kwarat lak tak onposolat, nagawan enmawi worak ereba na ondosolat irit kwaramu-o.

¹¹ Amori nagawan Sigon min Mbasan nagawan Ong min Kanaan nap nagawan oboksa min irit unduruk,

¹² it unuwi nggweyak ereba na-ge at ilirak Isarael nap onggweyak kwat makluk endam kegera pamu-o.

¹³ Nagawan Indo wa-e. Kat kobog-e pem irit wigal tenak woragolat, kat kunu-ge ap pem lud irit woragolat yebet yebet tak wolma-o.

¹⁴ Kat-nen-e kat ndegel kubugwi nap enabuwa karuk, kat kilirak enpem-e wene mot mor-et mbaroso-o.

¹⁵ Enlem nin nap unkugwiwag-e ininggi-nen ndak wiridnak mende emas min perak min ereba na bem-nen konidnak-nen yusu-o.

¹⁶ Unkugwiwak ereba-ge enemnde-ge worag-et nde, enne yugwi buk-nen yusu-o. Enlengen worag-et nde, kagwi buk-nen yusu-o.

¹⁷ Eneyanggo worag-et nde, enne kulugwi buk-nen yusu-o. Enemnde nggwe-nen na inndiseb-e wirik pugwi buk-nen yusu-o.

¹⁸ Kugwiwak ereba na ndak wutluk, inndi ebem wat tak puruk worali nab-e unkugwiwak ereba nggal-et kwat mag-o.

¹⁹ Isarael nap wa-e. Nagawan Indo nak erembel waner-o. Mbal Pem Nagawan-nen idnak tepan ombo wa-e. At nak erembel waner-o!

²⁰ Lewi nap wa-e. Nagawan Indo nak erembel waner-o. Kinndi at aye worak nap oboksa wa-e. At nak erembel waner-o.

²¹ At erembel wanogolar-e, Sion-nen na, at woraso sa Yerusalem-nen na at erembel wanurag-o. Nagawan Indo nak erembel wanurag-o!