NDAWI ENGGA 132 - Nanduk Ngget Tul Pidnak Wene

Nagawan Indo uwi iri na erembel wanugwi ndawi Lagolat-nen yugwi ndawi.

¹ Nagawan Indo wa-e. Ndaut min at-nen andi bandi kagaid oboksa min-e kindi yeberak wolmin-o.

² Nagawan Indo wa-e. At-nen urul yak kirid min Yakup Embal Pem Nagawan kamawi worak iri na kimin ”Irit kwarimin-o” luk owak mbarid iri na min-e yeberak wolmin-o.

^3-5 At-nen yosolar-e: ”Yakup Embal Pem Nagawan iri na uwi wirigit lak ma min Nagawan Indo mondok amawi worak iri na wolmomtak uwi wirigit lak ma min-e an-e nebabok kwarosolat, nama worasolat, an nene yoso sa na nene yosolat mondok kwarimin pug-er-o” luk yij-o.

⁶ Urul pidnak wene labu mbarak iri na obog-e Mbetleyem-nen kuligerik, Yat karu me iri me-nen kaige-o.

⁷ Iri ala-ge, nir-e Nagawan Indo woraso sa mburulndik, at-nen koreyak woraso sa eram iri me-nen tebe luk at erembel wanuwog-o.

⁸ Nagawan Indo wa-e. Kar-e kat kama lobok yugundik, kat kamawi ut mimirik urul pidnak wene labu mbarak iri na imin kama yu me wolmin-o.

⁹ Worala-ge, kat kilirag-e enalen-nen enne nggu lek kagolat, nde, kat-nen yidnak tepan ombo-ge pempa kat-nen yidnak yidnak nak kwarogolat wolmag-o.

¹⁰ Ndegel koboso nap Ndaut ebem ala karuk, kat-nen lenak pidnak nagawan iri-ge keya burak pug-o.

¹¹ Nagawan Indo-nen urul Ndaut yak tosolat owak mbarid iri na-ge mondok lugud tak puwa bug-o. At-nen yosolar-e: ”Kat kambararak misig-e an-nen nagawan tak ibimin-o. Iri rak pumu, kat kondolma o tena irit wolma-o.

¹² Kat kilirak ereba-nen nde an-nen enpem pidnak ereba na min ndak ndag-et kwat tenak woragola-ge, kat kilirak-nen wigarag-e kat kondolma nagawan pem irit wolma-o” yij-o.

¹³ O Sion iri-ge Nagawan Indo-nen lena bamu-o. At wolmomtak ondoro-ge iri me-t wolmomtak peraruk,

¹⁴ at-nen yosolar-e: ”An pem wolmomtak sa-ge yu me-net yusu-o. An-e yu me-net o tena woramin-o.

¹⁵ Sion woragwi nap-nen ukwe pidnak mende-ge ndak yaga kwarat wok ondosolat, iri me insilobulo lak wolma nab-e kwarat inmbitsa mak indimin-o.

¹⁶ Iri me wolma tepan ombo ereba-ge an-nen inmiri yimin-o. At ilirak-nen-e enalen yogolat ndawi lek kujwa-o.

¹⁷ Yu me-ge an-nen-e Ndaut-nen wigarak misig-e nagawan tak ibimin-o. At-nen nagawan woraso amawi-ge an-nen tugup lak tak pumu, pem irit nagawan wolma-o.

¹⁸ At-nen tenagidnak wi-ge mondok kona yamuksa woragolat, enalen pem nak irit wolma-t nde, at uwim nab-e innggiri rak pimin-o” yij-o.