NDAWI ENGGA 121 - Nanduk Ngget Tul Pidnak Wene

Nagawan Indo-ge nit nggetlel nonposo-nen yusu-o Lagolat-nen yugwi ndawi.

¹ An nerengen-e ndobo ndobo ereba nggwe yik karok worasu-o. Nggeba me-nen yongga niril lobok yuwa-o?

² Yongga nuruwa iri-ge Nagawan Indo mbal min nggweyak min ndak worak pid iri na-nen yongga nuruwa-o.

³ Wosa mbonokluk keya kubuwa-ge lag-o. Nggetlel kuburuk woraso nab-e pempa nene yoso bug-o.

⁴ Isarael nap nggetlel unpuruk woraso nap iri-ge mondok ndemeret nene na yoso buk, erengen na lamboroso buk-nen yusu-o.

⁵ Nagawan Indo-ge yik keyarok worasu-o. Ar-e kat nggetlel kuburuk kimin-et worasu-o.

⁶ Lengge-ge mo-nen andi bandi rak kubuwa bug-o. Kubu na waneya-nen andi bandi rak kubuwa bug-o.

⁷ Lak tak onposo mende oboksa-nen lak tak kubuwa naru, Nagawan Indo-ge nggetlel kuburuk wolma-o. Kar-e kimiri mbarak irit woranokluk, yik keyarok irit wolma-o.

⁸ Yawo-nen na irit, worasolat nasolat-nen na irit, kar-e lobok yosolat, mborosolat kwarosola-ge, ar-e nggetlel kuburuk irit wolma-o.