NDAWI ENGGA 119 - Nanduk Ngget Tul Pidnak Wene

Imiri mbarak pidnak wene iri na bem indi kundik wolmomtak wene

⁹⁷ An-e kat-nen idnak imiri mbarak pidnak wene iri na nindi kundik woralar-e, pempi pempa kat-nen idnak imiri mbarak pidnak wene iri na-ge mbenat tenak worasu-o.

⁹⁸ An nuwim nap enabiyem yimin naru nindi nggat nggat tak worak poso kat-nen kwarurak nebem pidnak wene iri na-ge an-e pempa nindi yebet kasolat worasu-o.

⁹⁹ Kat-nen kwarurak nebem pidnak wene mbenat tenak woraso me, an mul nurugwi nap-nen yebet kagwi-ge teberag-et nde, an-nen yebet kaso-ge terak minik-net yusu-o.

¹⁰⁰ An-e kat-nen mbaridnak wene-ge puksa tena woralat me, ap indi worak inndi nggat nggar-e mariger-et nde, an nindi nggat nggar-e terak minik-net yusu-o.

¹⁰¹ An-e kat-nen yidnak yidnak kwareyek-nen meya kwarugwi mende oboksa keya busu-o.

¹⁰² Kat-net an mul noroso me, kat-nen idnak imiri mbarak pidnak wene-ge lirin lirin tak pusu bug-o.

¹⁰³ Tamuk amburu undu-ge konag-et nde, kat-nen yidnak wene undu-ge mondok konak terak minik-nen yusu-o.

¹⁰⁴ Kat-nen idnak imiri mbarak pidnak wene-nen-e nindi ngarak posola, an-nen-e lugud tak kwarugwi iri-ge nisili rak pusu-o.

Nagawan Indo-nen idnak imiri mbarak pidnak wene iri-nen yaya rak onposo wene

¹⁰⁵ Kat-nen yidnak wene iri-ge an nuwok purak amanggim tal min an mbururak tula yaya rak purak tal min-nen yusu-o.

¹⁰⁶ Kat-nen mot mot mbaridnak wene iri na puksa tena wolmomtak pem-e an-nen ”Irit kwarimin-o” luk owak mbarigi iri na-ge ndak ndak tak pimin-o.

¹⁰⁷ Nagawan Indo wa-e. An-e andi bandi kwarat kasu-o. Kat-nen ”Kwat kibimin-o” luk urul pigen iri na ndak ndag-et an nuruk tak pi-o.

¹⁰⁸ Nagawan Indo wa-e. An-nen wiwa-o yak korosolat tepan yusu yu-ge kwara kuli-o. Kat-nen idnak imiri mbarak pidnak wene-ge kwara mul niri-o.

¹⁰⁹ An-e pempa nindi wisirik puruk nusu-t nde, kat-nen idnak imiri mbarak pidnak wene-ge meme rak pusu bug-o.

¹¹⁰ Meya yugwi nap-nen-e an nabuwok sabu logo pidnag-et nde, an-e kat-nen mbaridnak wene-ge kwid tusu bug-o.

¹¹¹ Kat-nen ”Kwarurag-o” luk yidnak wene-ge mondok an narengge pem tena wolmomtak wene-nen yusu-o. An nindi alen tak poso-nen yusu-o.

¹¹² Kat-nen ”Kwarurag-o” luk nebem pigen ereba na ndak ndag-et kwat tenak irit worasoma, wat yimin-o.

Nagawan Indo-nen idnak imiri mbarak pidnak wene-nen-e inndi yamuk tak poso-nen yusu-o

¹¹³ An-e kat-nen idnak imiri mbarak pidnak wene-ge mondok nindi kundik irit worasu-o. Nde, ap mondok kat-nen yidnak yidnak kwarugwi buk nab-e nisili rak unpusu-o.

¹¹⁴ Kar-e an nambigit yosolat, an nggetlel noboso-nen yusu-o. An-e kat-nen urul pigen ereba na bem-et nindi-ge mbung mbung tak puruk worasu-o.

¹¹⁵ Meya yugwi nap wa-e. An neram-nen mberer-o! An-e an Nembal Pem Nagawan-nen nebem pidnak ndak ndak irit kwarosolat woramin-o.

¹¹⁶ An nuruk worayek-nen kat-nen urul pigen ndak ndag-et amawi rak nibi-o. An nindi mbung mbung tak worasoma, an nindi kabak makluk keya nuburak pug-o.

¹¹⁷ Lak yigit lak nimiri mbarak woralat, kat-nen nebem pidnak wene pempa yebet kasolat worayek-nen yogo nuburuk wolmin-o.

¹¹⁸ Kat-nen ”Irit kwat tenak wolmomtag-o” yidnak wene keya buruk lugud tak nggwe mbitli nab-e kat-nen keya unpusu-o. It-nen ap enmberam lagolat yebet kagwi iri-ge ebe lak mende-nen yusu-o.

¹¹⁹ Kat-nen meya yugwi nap tak onposolar-e, eneyakngen mbo bidnak nggal tak unpusu-o. Iri ala karuk, an-e kat-nen ”Kwarogolat wolmer-o” luk watsa pidnak wene ereba na bem-et nindi-ge kundik worasu-o.

¹²⁰ An-e kat kaye-nen lele yosolat, kat-nen ap enpem wene nggaruksa mbarugun iri na bem nindi-ge purung purung yusu-o.

Nagawan Indo-nen yidnak wene ndak ndak kwarurak wene

¹²¹ An-e ndemeret mot mor-et kwarosolat worakmu-o. An-e nuwim nap ininggem kegera nuburak pug-o.

¹²² Kat-nen-e ”Yongga-t kirimin-o” luk ndegel koboso nap an urul yak niri-o. Ap inndi kek tak ereba ininggyapma rak nubuwakluk keya nuburak pug-o.

¹²³ Kat-nen nimiri yosolat yongga nurugun-o luk, yik keyarok mbot nerengen mep nggeyok yusu-o. An-e kat-nen ”Wisirik kibimin-o” yak nirigen iri na-t yik karok worasu-o.

¹²⁴ Kat-nen enabuwa kaso ndak ndag-et kwat nibi-o. Kat-nen ”Iri kwarurag-o” watsa pidnak wene-ge mul norosolat wolmin-o.

¹²⁵ An-e ndegel koboso nap-nen yusu-o. ”Iri kwarurag-o” luk nebem pidnak wene-ge yebet kayek-nen kat-nen nindi tenggerak pi-o.

¹²⁶ Nagawan Indo wa-e. Ap-nen-e kat-nen idnak imiri mbarak pidnak wene kwid togola, kat-nen it kwat unpurak tarem-e abu wok yij-o.

¹²⁷ Emas min emas kopkap lak min inndi nggok tak pugwi iri-ge ija-t nde, an-nen kat-nen ”Iri kwarurag-o” luk nebem pidnak wene ereba na bem nindi nggok tak pusu-ge mondok terak minik-net yusu-o.

¹²⁸ Iri bem-e an-e kat-nen mirik nibidnak oboksa ndak ndag-et kwarosolat woramin-o. Nde, lugud tak kwaril mburugwi iri-ge an-e nisili-o.

Nagawan Indo-nen idnak imiri mbarak pidnak wene-nen yidnak yidnak kwarurak nggok tak pugwi wene

¹²⁹ Kat-nen ”Iri kwarurag-o” yidnak wene iri-ge ndemeret wi yurak mende-net yusu-o. An-e ndemeret nindi-net yidnak yidnag-et kwarusu-o.

¹³⁰ Kat-nen mul ondoso wene ereba nde ”Iri nggal-o” luk, engen wanogola-ge, ap inndi yaya rak posolat, enaru buk nap na yebet kudtak inndi tenggerak posolat yusu-o.

¹³¹ Kat-nen nebem pidnak wene nere-nen nindi eberek yusu-o.

¹³² Kat-nen ap kat kebem inndi kundugu woragwi nap enabuwa kaso nggal-et nden yaga yik neyaruk, nabuwa ki-o.

¹³³ Kat-nen ”Kwat kibimin-o” luk urul yak nirigen ndak ndag-et an tu nosola-ge, kat-nen tena nuburuk ni-o. Meya kwarugwi elem-nen an kamat nubuwakluk keya nuburak pug-o.

¹³⁴ Kat-nen nebem pidnak wene ereba nak kwarosolat worayek-nen ap-nen anggun panggun tak nibili-t nde, kat-nen wisirik nibi-o.

¹³⁵ Kat kerare abinal pem-nen ndegel koboso nap yaya rak nibi-o. Kat-nen idnak imiri mbarak pidnak wene-ge an mul niri-o.

¹³⁶ Ap-nen kat-nen idnak imiri mbarak pidnak wene ndak ndak kwarigit lak yogola karuk, niyip lengen-e yi ugul nggal soso mburusu-o.

Nagawan Indo-nen idnak imiri mbarak pidnak wene iri-ge mot mot-nen yusu-o

¹³⁷ Nagawan Indo wa-e. Kar-e ndemeret mot mot kwaroso me, kat-nen idnak imiri mbarak pidnak wene-ge ndemeret mot mot-net yusu-o.

¹³⁸ Kat-nen ”Irit kwarurag-o” nenpem pidnak wene-ge ndemeret mot mot ap-nen ebem inndi wat tak puruk wolmomtak ndak-net yusu-o.

¹³⁹ An nimin sirid nab-e kat-nen mul ondoso wene ereba na-ge meme rak pogola karuk, an nisilepma-ge narem ket mbet mbusu-o.

¹⁴⁰ Kat-nen urul pidnak wene ereba na-ge ndemeret tugup lak, ndemerer-o luk inndi ebem wat tak pugwi-nen yusu-o. An nindi-ge kat-nen urul pidnak wene iri na ebem kundik worasu-o.

¹⁴¹ An-e no mende nggal, ebe lak-nen yusu-t nde, an-e kat-nen mul ondoso wene-ge lirin lirin tak pusu bug-o.

¹⁴² Kat-nen mot mot nak kwaroso-ge pem irit wolma-o. Kat-nen idnak imiri mbarak pidnak wene-ge pempa ndemeret lud tak nak irit wolma-o.

¹⁴³ An-e anggun panggun arem worasolat, nindi kabak yusu-t nde, kat-nen pidnak wene iri-nen-e an nindi alen tak posolat worasu-o.

¹⁴⁴ Kat-nen ”Irit kwarurag-o” luk yidnak wene iri-ge pempa mot mot irit woraso-nen yusu-o. An nuruk worayek-nen kat-nen nindi tenggerak pi-o.