NDAWI ENGGA 118 - Nanduk Ngget Tul Pidnak Wene

Ombol nggwe rak pidnak pem wiwa-o yak tosolat yidnak ndawi

¹ Nagawan Indo iri-ge konak, at-nen enabuwa kaso iri-ge mondok pem irit enabuwa kaso me, at nak wiwa-o yak turag-o.

² Isarael nap-nen yogolar-e: ”At-nen enabuwa kaso iri-ge mondok pem irit enabuwa kaso-o” luk yuwag-o.

³ Kit tepan ombo-nen yogolar-e: ”At-nen enabuwa kaso iri-ge mondok pem irit enabuwa kaso-o” luk yuwag-o.

⁴ Inndi at aye worak woragwi nap oboksa-nen yogolar-e: ”At-nen enabuwa kaso iri-ge mondok pem irit enabuwa kaso-o” luk yuwag-o.

⁵ An-e anggun panggun arem woralat-nen Nagawan Indo eram wene pil lasola-ge, at-nen nene erep nggarosolar-e, wisirik nibij-o.

⁶ Nagawan Indo-ge an nimin worala me, an-e kwiye kamin pug-o. Nde, an nimbiriwak pem-e ab-e enmawi kunduwa bug-o.

⁷ Nagawan Indo-ge an yongga norosolat, nimin worala me, an-nen nuwim nap eneyarug-e, urugwe nggwe rak inpimin-o.

⁸ Ki nap enpem inndi wat tak puruk wolmomtak iri keya buruk, Nagawan Indo eram kurak tak wolmomtak iri perak mondok konak lombog-o.

⁹ Enne kulugwi nap iri na enpem inndi wat tak puruk wolmomtak iri keya buruk, Nagawan Indo arem kurak tak wolmomtak iri perak mondok konak lombog-o.

¹⁰ Wim nap kwarat-nen an-e lop lop niriga-t nde, it iri-ge Nagawan Indo amawi bem urugwe nggwe rak inpigi-o.

¹¹ It-nen-e tu ponok nggwe ponok nggwe oboksa-nen lop lop niriga-t nde, it iri-ge Nagawan Indo amawi bem urugwe nggwe rak inpigi-o.

¹² It iri-ge ngin ija nggal an lenggek nutluk woraiga-t nde, tusuangge pagosoma, nigirik pugwi nggal Nagawan Indo amawi bem it iri-ge urugwe nggwe rak inpigi-o.

¹³ An-e mondok kwiye worak nebem mbud yogolat, komo urugwe nggwe rak nibiga-t nde, Nagawan Indo-nen yongga nirij-o.

¹⁴ Nagawan Indo iri-ge an namawi min nendawi min-nen yusu-o. At-net nimiri yamu-o.

¹⁵ Mbal Pem Nagawan ilirak woragwi sa-nen ombol nggwe rak inpidnak pem korang pili ereba koler-o. It-nen yogolar-e: ”Nagawan Indo-nen at amawi kwiye worak pem-nen kwarij-o!

¹⁶ Nagawan Indo amawi-nen nir-e ombol nggwe rak ninpij-o! Nagawan Indo-nen at amawi kwiye worak pem-nen kwarij-o!” luk yili-o.

¹⁷ An-e mondok wat yimin pug-o. Are, nuruk irit woralar-e, Nagawan Indo-nen kwaroso wene ereba na wigarosolat woramin-o.

¹⁸ Nagawan Indo-nen-e an-e mondok kwarat andi bandi rak nibij-et nde, niminep wesera wat yugwi inggem nibigit lag-o.

¹⁹ An-e at ama ngguruk, Nagawan Indo wiwa-o yak teyek-nen Nagawan Indo uwi tu mende-ge an namanggim kuwarak per-o.

²⁰ Nagawan Indo uwi tu mende-ge yu-o. Mot mot kwarugwi nap nak-nen tumende iri nggwe-ge ngguwa-o.

²¹ Nagawan Indo wa-e. Kat-nen an-nen tepan yidnak kolosolat, kat-nen ombol nggwe rak nobosolat kwarigen pem-e an-e kat kerembel wanusu-o.

²² O wurugwi nap-nen o worogolat lena keya bidnak kerep iri na nde tugup lak o mabin kwat yij-o.

²³ Iri-ge Nagawan Indo-net kwarij-o. Nit-nen wi yurak irit kwarij-o.

²⁴ Nagawan Indo-nen lenak pidnak tarem-e yur-o. Yu tarem-et nir-e nenalen pem nggok sakolat wolmog-o.

²⁵ Nir-e ninmiri yonokluk Nagawan Indo nggi yak kitli-o. Nagawan Indo wa-e. Kat-nen ombol nggwe rak ninpi-o!

²⁶ Nagawan Indo unu bem lobok yusu iri-ge imbiringgat ebem puwag-o. Nit-nen-e Nagawan Indo ama-nen imbiringgat tak kunpul-o.

²⁷ Nagawan Indo iri-ge Mbal Pem Nagawan-nen yusu-o. At-nen-e konak nak kwat nonposo-nen yusu-o. Mburugupndik, e sit kere sit kininggem yud kud Nagawan Indo amanggim wam wosa kan pugwi ondoro iri wangget ker-o.

²⁸ Kar-e an Nembal Pem Nagawan-nen yusu-o. An-e kat wiwa-o yak kurusu-o. Nembal Pem Nagawan wa-e. An-e kat kek tak kubusu-o.

²⁹ Nagawan Indo iri-ge konak, at-nen enabuwa kaso-ge mondok pem irit enabuwa kaso me, at nak wiwa-o yak turag-o.